ປະທານາທິບໍດີ ສະຫະລັດ ທ່ານ Barack Obama ໄດ້ສ້າງປະ ຫວັດສາດ ໃນວັນສຸກ ອາທິດແລ້ວນີ້ ໂດຍຍ່າງຜ່ານອະນຸສອນສະຖານທີ່ສວນສັນຕິພາບ ໃນນະຄອນ Hiro- shima ກັບນາຍົກລັດຖະມົນຕີຍີ່ປຸ່ນທ່ານ Shinzo Abe. Hiroshima ແມ່ນເມືອງທີ່ເຮືອ ບິນລົບສະຫະລັດ ໄດ້ຖີ້ມລະເບີດປະລະມານູລູກທຳອິດຂອງໂລກ ລົງໃສ່ເມື່ອວັນທີ 6 ສິງ ຫາປີ 1945 ລະຫວ່າງ ສົງຄາມໂລກຄັ້ງທີສອງ ທີ່ເຮັດໃຫ້ມີຜູ້ເສຍຊີວິດຫລາຍສິບພັນຄົນ ແລະເຮັດໃຫ້ນຶ່ງຊົ່ວຄົນຕໍ່ມາເຈັບປ່ວຍຍ້ອນກຳມັນຕະ ພາບລັງສີ. ນັກຂ່າວວີໂອເອ Cindy Saine ແມ່ນຜູ້ນຶ່ງທີ່ໄດ້ຮ່ວມເປັນສັກຂີພິຍານ ຢູ່ໃນພິທີອັນມີກຽດ ຊຶ່ງ ກິ່ງສະຫວັນ ຈະນຳເອົາລາຍລະອຽດມາສະເໜີທ່ານ.
ຊາວຍີ່ປຸ່ນຫລາຍສິບພັນຄົນໄດ້ພາກັນຮ້ອງໂຮ ຕ້ອນຮັບຂະບວນລົດປະທານາທິບໍດີ ໃນ ຂະນະທີ່ທ່ານພວມເດີນທາງ ໄປສູ່ອະນຸສອນສະ ຖານ ທີ່ສວນສັນຕິພາບ ໃນນະຄອນ Hiroshima ຊຶ່ງເປັນຈຸດສູນກາງ ຂອງການຖີ້ມລະເບີດປະລະມານູ ໃນປີ 1945 ທີ່ໄດ້ທຳ ລາຍສ່ວນໃຫຍ່ ຂອງນະຄອນດັ່ງກ່າວ.
ປະທານາທິບໍດີ Obama ໄດ້ອະທິບາຍວ່າ ເປັນຫຍັງທ່ານຈຶ່ງໄດ້ຕັດສິນໃຈມາທີ່ນີ້ໃນ ຂະນະທີ່ບໍ່ມີປະທານາທິບໍດີສະຫະລັດຄົນອື່ນໃດໄດ້ກະທຳ.
ປະທານາທິບໍດີ Barack Obama ກ່າວວ່າ “ນີ້ເປັນເພາະວ່າ ພວກເຮົາມາສະຖານທີ່ນີ້. ພວກເຮົາຢືນຢູ່ທີ່ນີ້ ໃຈກາງນະຄອນແຫ່ງນີ້ ແລະບັງຄັບໃຫ້ພວກເຮົາວາດພາບເຖິງ ເວ ລາ ທີ່ລະເບີດຕົກລົງມາ. ພວກເຮົາບັງຄັບເຮົາເອງ ໃຫ້ມີຄວາມຮູ້ສຶກ ເຂົ້າໃຈເຖິງ ຄວາມ ຢ້ານກົວ ຂອງພວກເດັກ ນ້ອຍ ທີ່ສັບສົນໃນສິ່ງທີ່ເຂົາເຈົ້າເຫັນ. ພວກ ເຮົາພາ ກັນຟັງການ ຮ້ອງໃຫ້ທີ່ບໍ່ມີສຽງ. ພວກເຮົາຈື່ຈຳຜູ້ໄຮ້ດຽງສາທຸກໆຄົນທີ່ ເສຍ ຊີວິດ ຈາກສົງຄາມອັນຮ້າຍ ແຮງຢູ່ທົ່ວທຸກຫົນແຫ່ງແລະສົງຄາມຕ່າງໆທີ່ເກີດຂຶ້ນກ່ອນ ແລະ ສົງຄາມທີ່ໄດ້ ຕິດຕາມມາ.”
ສະຖານທີ່ແຫ່ງນີ້ ໃນຄັ້ງນຶ່ງເປັນທີ່ແຕກຕ່າງທີ່ສຸດ ຊຶ່ງໄດ້ຖືກປະປ່ອຍໃຫ້ເຫລືອແຕ່ຊາກ ຫັກພັງ ແລະປະຮ້າງໃນຕອນທ້າຍຂອງສົງຄາມໂລກຄັ້ງທີສອງ.
ແຕ່ດຽວນີ້ ນະຄອນ Hiroshima ອີກຄັ້ງນຶ່ງໄດ້ເປັນເມືອງທ່າ ທີ່ເຕັມໄປດ້ວຍຊີວິດຊີວາ. ແຕ່ກໍຍັງມີຄວາມຊົງຈຳອັນເຈັບປວດທີ່ເຫລືອຢູ່. ປະທາ ນາທິບໍດີໄດ້ພົບກັບຜູ້ລອດ ຊີວິດ ສອງຄົນຈາກການຖິ້ມລະເບີດແລະຄອບ ຄົວຂອງເຂົາເຈົ້າ.
ປະທານາທິບໍດີ Obama ກ່າວວ່າ ໃນຂະນະທີ່ອະດີດຜ່ານມາບໍ່ສາມາດລືມໄດ້ນັ້ນ ຄວາມ ຊົງຈຳແມ່ນສາມາດ ແລະ ຊ່ວຍໃຫ້ມີອະນາຄົດອັນດີຂຶ້ນໄດ້.
ປະທານາທິບໍດີ Obama ກ່າວອີກວ່າ “ໂລກໄດ້ມີການປ່ຽນແປງແຕ່ນັ້ນມາຢູ່ທີ່ນີ້. ແຕ່ ວ່າມື້ນີ້ພວກເດັກນ້ອຍຢູ່ໃນນະຄອນນີ້ຈະດຳເນີນຊີວິດໃນ ແຕ່ລະມື້ດ້ວຍຄວາມສະງົບ. ນັ້ນແມ່ນສິ່ງທີ່ປະເສີດສຸດ. ມັນຄຸ້ມຄ່າທີ່ຈະ ປົກປ້ອງແລະຂະຫຍາຍໄປສູ່ເດັກນ້ອຍ ທຸກໆຄົນ. ນັ້ນແມ່ນອະນາຄົດທີ່ເຮົາສາມາດເລືອກໄດ້. ອະນາຄົດອັນທີ່ນະຄອນ Hiroshima ແລະເມືອງ Nagasaki ເປັນທີ່ຮູ້ຈັກ ບໍ່ແມ່ນໃນການເລີ້ມຕົ້ນຂອງການເຮັດສົງຄາມປະລະມານູ ແຕ່ວ່າເປັນບ່ອນເລີ້ມຕົ້ນໃນຄວາມຕື່ນໂຕກ່ຽວກັບສິນ ລະທຳ.”
ປະທານາທິບໍດີ Obama ແລະນາຍົກລັດຖະມົນຕີ Shinzo Abe ຍັງໄດ້ວາງພວງມາລາ ເພື່ອໄວ້ອາໄລໃຫ້ຫລາຍສິບພັນຄົນ ທີ່ໄດ້ເສຍຊີວິດຍ້ອນການຖີ້ມລະເບີດ ແລະຫລາຍ ລ້ານຄົນທີ່ໄດ້ເສຍຊີວິດໃນລະຫວ່າງສົງຄາມໂລກຄັ້ງທີສອງ.
ນະຄອນ Hiroshima ເປັນບ່ອນຢຸດແວ່ສຸດທ້າຍໃນການເດີນທາງຢ້ຽມ ຢາມເອເຊຍ ຂອງ ປະທານາທິບໍດີ Obama ຊຶ່ງນອກນັ້ນ ທ່ານຍັງໄດ້ໄປຢ້ຽມຢາມຫວຽດນາມ ແລະເຂົ້າ ຮ່ວມ ກອງປະຊຸມສຸດຍອດປະຈຳປີຂອງກຸ່ມ G-7. ການສ້າງຄວາມປອງດອງເພື່ອຄືນດີກັບອະດີດສັດຕູປາກົດວ່າເປັນເນື້ອຫາທີ່ສຳຄັນໃນການເດີນທາງໄປຫວຽດນາມ ແລະ ຍີ່ປຸ່ນຄັ້ງນີ້.
