ປະທານາທິບໍດີສະຫະລັດ ທ່ານ ບາຣັກ ໂອບາມາ ໄດ້ປະກາດ
ແຜນການທີ່ຈະສົ່ງເຮືອບິນໄປຍັງເຂດທະເລ Baltics ຕື່ມອີກ
ໃນຂະນະທີ່ທ່ານ ຊອກຫາຊ່ອງທາງ ທີ່ຈະໃຫ້ຄວາມໝັ້ນໃຈແກ່
ບັນດາປະເທດທີ່ເປັນຫ່ວງ ກ່ຽວກັບການພົວພັນທາງດ້ານທະ
ຫານຂອງຣັດເຊຍ ຢູ່ໃນຢູເຄຣນ ແລະ ອາດເປັນໄປໄດ້ວ່າ
ຣັດເຊຍຈະຂົ່ມຂູ່ບັນດາລັດໃນເຂດ ເຂດທະເລ Baltics ນັ້ນ.
ທ່ານ ໂອບາມາ ໄດ້ໃຫ້ຄຳເຫັນດັ່ງກ່າວ ຢູ່ໃນການຖະແຫລງ
ຂ່າວເມື່ອວັນພຸດມື້ນີ້ ຢູ່ ນະຄອນຫລວງ Tallinn ຂອງ Estonia
ນຶ່ງມື້ກ່ອນທີ່ຈະເລີ້ມກອງປະຊຸມສຸດຍອດອົງການ NATO ຄັ້ງ
ສຳຄັນຢູ່ Wales.
ປະທານາທິບໍດີສະຫະລັດ ຍັງໄດ້ກ່າວວ່າ ສະມາຊິກຂອງອົງການ NATO ທັງໝົດ ຕ້ອງ
ປະກອບສ່ວນອັນສົມຄວນ ເຂົ້າໃນງົມປະມານທາງດ້ານການປ້ອງກັນປະເທດຂອງຕົນ
ເພື່ອເຮັດໃຫ້ພັນທະມິດເຂັ້ມແຂງຂຶ້ນ.
ໃນຂະນະທີ່ຖະແຫຼງ ຢູ່ຄຽງຂ້າງກັບປະທານາທິບໍດີແອັສໂທເນຍ ທ່ານ Toomas Hendrik Ilves ທ່ານໂອບາມາ ໄດ້ຍົກເອົາແອັສໂທເນຍ ຂຶ້ນມາເປັນຕົວຢ່າງ ກ່ຽວກັບວ່າ ບັນດາສະມາຊິກອົງການ NATO 28 ປະເທດທັງໝົດ ຕ້ອງປະຕິບັດຕາມຄຳໝັ້ນສັນຍາ ທີ່ຈະສະໜອງ 2 ເປີເຊັນ ຂອງຍອດຜະລິດຮວມພາຍໃນທັງໝົດ ຫຼື GDP ຂອງຕົນ ເຂົ້າໃສ່ໃນກຸ່ມພັນທະມິດ.
ທ່ານ ໂອບາມາ ໄດ້ໄປເຖິງ ແອັສໂທເນຍ ໃນຕອນເຊົ້າ ຂອງວັນ
ພຸດມື້ນີ້ ແລະ ຈະມີການເຈລະຈາເຕັມມື້ ກັບບັນດາປະທານາທິບໍດີ
ຈາກປະເທດ ແອັສໂທເນຍ ລັດເວຍ ແລະລີທົວເນຍ.
ປະທານາທິບໍດີ ໂອບາມາ ໄດ້ກ່າວເຖິງການເຈລະຈາ ເປັນວິທີ
ຂອງການສະແດງໃຫ້ອະດີດ ສາທາລະນະລັດຂອງໂຊຫວຽດທັງ 3 ປະເທດ “ວ່າ ພວກ
ເຮົາຈະເຮັດສິ່ງທີ່ ພວກເຮົາໄດ້ເວົ້າ ກ່ຽວກັບພັນທະ ຕ່າງໆ ໃນສົນທິສັນຍາຂອງ
ພວກເຮົານັ້ນ.”
