ປະທານາທິບໍດີ Barack Obama ຮຽກຮ້ອງໃຫ້ມີການຕຽມ
ພ້ອມເພີ້ມຂື້ນ ເພື່ອຮັບມືກັບໄພຂົ່ມຂູ່ທາງຊີວະພາບ ຄືກັນ
ກັບການລະບາດຂອງອີໂບລາທີ່ຮ້າຍແຮງ ຊຶ່ງຍັງສືບຕໍ່ສ້າງ
ຄວາມຢ້ານກົວແລະຄວາມໝົດຫວັງ ຢູ່ໃນທົ່ວເຂດອາຟຣິ
ກາຕາ ເວັນຕົກ.
ປະທານາທິບໍດີ ກ່າວໃນວັນສຸກວານນີ້ ທີ່ນະຄອນຫລວງ
ວໍຊິງຕັນ ຕໍ່ຄະນະທູດ ພິເສດດ້ານສາທາລະນະສຸກແລະ
ຄວາມໝັ້ນຄົງ ຈາກກວ່າ 40 ປະເທດ ແລະອົງການຈັດຕັ້ງ
ຕ່າງໆ ໂດຍໄດ້ຊັກຊວນ ໃຫ້ຮັບເອົາຍຸດທະສາດ ທີ່ທ່ານ
ອະທິບາຍວ່າ ເພື່ອ “ປ້ອງກັນ ກວດຄົ້ນຫາ ແລະຕອບຮັບ.”
ໃນວັນສຸກວານນີ້ເຊັ່ນດຽວກັນ ອົງການອະນາໄມໂລກ ໄດ້ນຳອອກເຜີຍແຜ່ຂໍ້ມູນໃໝ່ ທີ່
ສະແດງໃຫ້ເຫັນວ່າ ໂຕເລກຜູ້ເສຍຊີວິດຍ້ອນອີໂບລາຢູ່ໃນເຂດອາຟຣິກາ ຕາເວັນຕົກ
ໄດ້ກາຍ 3,000 ພັນຄົນແລ້ວ. ຖະແຫລງການຂອງອົງການອະນາໄມໂລກ ກ່າວວ່າໂຕ
ເລກໃໝ່ນີ້ແມ່ນຮວມທັງຜູ້ເສຍຊີວິດຫລາຍກວ່າ 150 ຄົນ ໃນ Liberia ພາຍໃນລະຍະ
ສອງມື້ເທົ່ານັ້ນ.
ຖະແຫງການຂອງອົງການອະນາໄມໂລກ ຍັງໄດ້ລະມັດລະວັງຢ້ານວ່າຂໍ້ມູນໃໝ່ນີ້ ອາດ
ຈະບໍ່ໄດ້ສະທ້ອນໃຫ້ເຫັນຢ່າງເຕັມທີ່ກ່ຽວກັບຂອບເຂດຂອງການລະບາດ ຊຶ່ງເປັນທີ່ເຊື່ອກັນວ່າ ໄດ້ຕິດແປດ ຢ່າງໜ້ອຍ 6,500 ຄົນແລ້ວ. ຖະແຫຼງການ ຍັງໄດ້ກ່າວເຖິງ
ບັນດາຜູ້ເຄາະຮ້າຍອາດຈະຢ້ານໃນການເຂົ້າໂຮງໝໍ ຫລືວ່າຖືກ ປະຕິເສດ ຍ້ອນວ່າມີ
ຄົນປ່ວຍຢູ່ຢ່າງລົ້ນເຫລືອ.
