ເບິ່ງວິໂດຂ່າວເປັນພາສາອັງກິດ
ທ້າວນ້ອຍເຮັນຣີ (Henry) ຊຶ່ງເປັນເດັກທາຣົກ ທີ່ງາມໜ້າຮັກ ແມ່ນຢູ່ໃນທ້ອງຂອງແມ່ລາວ
ໄດ້ພຽງ 26 ອາທິດເທົ່ານັ້ນ ຊຶ່ງເປັນໄລຍະທີ່ສັ້ນກວ່າການຖືພາທໍາມະດາ 40 ອາທິດນັ້ນ
ຫລາຍ. ທ້າວເຮັນຣີໄດ້ອອກມາສູ່ໂລກພາຍນອກ ໂດຍທີ່ມີນໍ້າໜັກບໍ່ຮອດ 1,000 ກຣາມ
ແລະເກີດຢູ່ທີ່ໂຮງໝໍ ທີ່ກຽມໄວ້ສໍາລັບດູແລລາວ. ພໍ່ແມ່ຂອງທ້າວນ້ອຍເຮັນຣີ ນາງຊາຣາ
(Sara) ແລະທ້າວພອລ ຣາກ (Paul Raak) ພັນລະນາເຖິງປະສົບການອັນນີ້ວ່າ "ເປັນໜ້າ
ຢ້ານກົວ." ແລະນາງ ຊາຣາ ຍອມຮັບວ່າ, ຖ້າຫາກບໍ່ໄດ້ຮັບ ການຊ່ວຍເຫລືອ ກໍຈະບໍ່ໄດ້ຮັບ
ຜົນດີແບບນີ້. ນາງເວົ້າວ່າ:
"ລາວຈະບໍ່ມີຊີວິດຢູ່ລອດໄດ້ ຢ່າງບໍ່ຕ້ອງສົງໃສເລີຍ. ລາວຈະບໍ່ລອດແທ້ໆ ເພາະວ່າ
ມີຫລາຍສິ່ງ ຫລາຍຢ່າງໃນໂຕຂອງລາວ ທີ່ບໍ່ມີການພັດທະນາຫລືວ່າເຕີບໃຫຍ່ເລີຍ
ໃນຕອນທີ່ລາວເກີດມາ, ໂດຍສະເພາະແລ້ວກໍແມ່ນປອດ."
ກ່ອນເກີດມາ, ທ້າວເຮັນຣີໄດ້ຮັບຢາສະເຕີຣອຍ (steroids) ເພື່ອຊ່ວຍພັດທະນາປອດ
ຂອງລາວ. ຫລັງຈາກເກີດມາ ກໍໃຊ້ໝາກປິ່ນພັດເພື່ອຊ່ວຍໃຫ້ລາວຫາຍໃຈ.
ອີງຕາມບົດລາຍງານໃໝ່ ທີ່ເອີ້ນວ່າ “Born Too Soon" ຫລື "ເກີດໄວໂພດ” ທ້າວ
ນ້ອຍເຮັນຣີ ແມ່ນ 1 ໃນ 15 ລ້ານຄົນ ທີ່ເກີດກ່ອນກໍານົດໃນປີ 2010.
ພວກນັກຊ່ຽວຊານຈາກອົງການສະຫະປະຊາຊາດ,
ມະຫາວິທະຍາໄລ ແລະອົງການຕ່າງໆ ເຊັ່ນ March
of Dimes ແລະອົງການຊ່ວຍເຫລືອເດັກ (Save
the Children) ໄດ້ປະກອບສ່ວນເຂົ້າໃນການເຮັດລາຍ
ງານສະບັບນີ້ ຊຶ່ງໃຫ້ລາຍລະອຽດກ່ຽວກັບ ສິ່ງທີ່ເຂົາເຈົ້າ
ຮູ້ກ່ຽວກັບການເກີດກ່ອນກໍານົດ, ສາເຫດຂອງມັນ, ແລະ
ປະເພດການປິ່ນປົວທີ່ເດັກທາຣົກເຫລົ່ານີ້ຕ້ອງການ. ດຣ. ຈອຍ ລອນ (Joy Lawn) ຊຶ່ງ
ເປັນຜູ້ຮ່ວມຂຽນລາຍງານຜູ້ນຶ່ງອະທິບາຍວ່າ:
“ຂ່າວທີ່ອອກມາຈາກບົດລາຍງານນີ້ກໍຄືວ່າ ນີ້ແມ່ນເປັນຄັ້ງທໍາອິດທີ່ພວກເຮົາຮູ້ວ່າ ມີເດັກທາຣົກຫລາຍປານໃດຢູ່ ໃນໂລກນີ້ ທີ່ເກີດກ່ອນກໍານົດ.”
ທ່ານ ຄຣິສຕົບເຟີ ຮາວຊັນ (Christopher Howson) ຊຶ່ງເປັນຜູ້ຮ່ວມຂຽນບົດລາຍງານອີກ
ຜູ້ນຶ່ງກ່າວວ່າ ນອກນີ້ ບົດລາຍງານຍັງສະແດງໃຫ້ເຫັນວ່າ ເດັກທີ່ເກີດກ່ອນກໍານົດ ແມ່ນ
ກວມເອົາເກືອບເຄິ່ງນຶ່ງ ຂອງຈໍານວນເດັກເກີດໃໝ່ ທີ່ເສຍຊີວິດຢູ່ທົ່ວໂລກ ແລະສະແດງໃຫ້
ເຫັນເຖິງຄວາມແຕກໂຕນ ທີ່ໄກກັນຫລາຍ ໃນລະດັບການມີຊີວິດລອດໄດ້ຂອງເດັກ ຢູ່ໃນ
ປະເທດຮັ່ງມີຫລືພັດທະນາແລ້ວ ແລະປະເທດທີ່ທຸກຍາກ. ທ່ານ ຮາວຊັນ ຍັງອະທິບາຍອີກວ່າ:
“ຖ້າຫາກເຮົາເບິ່ງເດັກທາຣົກທີ່ຢູູ່ໃນທ້ອງແມ່ໄດ້ໜ້ອຍກວ່າ 28 ອາທິດ ຍົກຕົວຢ່າງ ຢູ່ເຂດໃຕ້ທະເລຊາຍຊາຮາຣາ ໃນອາຟຣິກາ ໂອກາດທີ່ພວກເຂົາຈະເສຍຊີວິດພາຍໃນ
ສອງສາມມື້ ຫລັງຈາກເກີດ ມານັ້ນ ແມ່ນສູງເຖິງ 90%. ແຕ່ວ່າໃນທາງກົງກັນຂ້າມ ຖ້າຫາກເຮົາເບິ່ງເດັກທາຣົກທີ່ຢູ່ໃນທ້ອງແມ່ໄດ້ໜ້ອຍກວ່າ 28 ອາທິດ ທີ່ເກີດຢູ່ໃນ
ປະເທດຮັ່ງມີນັ້ນ ໂອກາດທີ່ພວກເຂົາຈະມີຊີວິດລອດໄດ້ ແມ່ນສູງເຖິງ 90%.”
ເດັກທາຣົກນ້ອຍເຫລົ່ານີ້ຫລາຍໆຄົນ ອາດສາມາດ
ມີຊີວິດຢູ່ລອດໄດ້ ໂດຍໃຊ້ວິທີການທີ່ບໍ່ແພງ. ການ
ປະຕິບັດທີ່ມີປະສິດທິຜົນທີ່ສຸດອັນນຶ່ງ ກໍຄືໃຫ້ດູແລ
ເດັກທາຣົກ ແບບທີ່ເອີ້ນກັນວ່າ "kangaroo care,"
ຫລື “ການດູແລແບບໂຕຈິງໂຈ້” ຊຶ່ງກອດຫລືອຸ້ມເດັກ
ທາຣົກແນບໄວ້ກັບເອິກຂອງແມ່ ຊຶ່ງເດັກນ້ອຍຈະໄດ້
ຮັບຄວາມອຸ່ນຢູ່ຕະຫລອດເວລາ ແລະຈະຮູ້ສຶກມີຄວາມ
ຫິວຢາກຈະກິນນົມແມ່ຢູ່ເລື້ອຍໆ ແລະນັ້ນກໍແມ່ນຈະ
ສົ່ງຜົນໃຫ້ເດັກຈະເລີນເຕີບໂຕຂຶ້ນ.
ບົດລາຍງານຂ່າວ "ເກີດໄວໂພດ” ຍັງສະແດງໃຫ້ເຫັນວ່າ ຈໍານວນເດັກທີ່ເກີດກ່ອນກໍານົດ ກໍາລັງມີທ່າອ່ຽງເພີ້ມຂຶ້ນ ບໍ່ມີໃຜຮູ້ວ່າເປັນຫຍັງ ແຕ່ວ່າເປົ້າໝາຍຂອງບົດລາຍງານ ແມ່ນຢາກຊຸກຍູ້ໃຫ້ລັດຖະບານປະເທດຕ່າງທ ແລະພວກນັກຄົ້ນຄວ້າ ຊອກຫາວິທີທາງທີ່ຈະຫລຸດຜ່ອນ ຈໍານວນເດັກເກີດກ່ອນກໍານົດນັ້ນ ແລະສະໜອງການຊ່ວຍເຫລືອທີ່ເປັນໄປໄດ້ ໃຫ້ແກ່ເດັກທີ່ເກີດກ່ອນກໍານົດ ດັ່ງທີ່ທ້າວ ເຮັນຣີ ຣາກ ໄດ້ຮັບ ເພື່ອໃຫ້ມີຊີວິດເຕີບໃຫຍ່ຂຶ້ນແບບປົກກະຕິ ແລະມີສຸຂະພາບສົມບູນໄດ້.