ພັກຝ່າຍຄ້ານຂອງ Portugal ໄດ້ປົດພັກສັງຄົມນິຍົມ
ອອກຈາກອໍາ ນາດ ໃນການເລືອກຕັ້ງສະພາແຫ່ງຊາດ
ຂອງປະເທດທີ່ກໍາລັງປະເຊີນກັບບັນຫາໜັກທາງເສດຖະ ກິດນັ້ນ ໃນວັນອາທິດວານນີ້.
ຫລັງຈາກມີການນັບບັດຄະແນນສຽງໝົດແລ້ວ ນອກຈາກ
ບັດຂອງພວກພົນລະເມືອງ Portugal ທີ່ອາໄສຢູ່ໃນຕ່າງ
ປະເທດນັ້ນ ຜົນຂອງການເລືອກຕັ້ງຢ່າງເປັນທາງການ ໄດ້
ມອບ 105 ບ່ອນນັ່ງໃຫ້ພັກສັງຄົມປະຊາທິປັດທີ່ນິຍົມແນວ
ທາງເດີມ ໃນຂະນະທີ່ພັກສັງຄົມນິຍົມຂອງລັດຖະບານໄດ້ ຮັບພຽງ 73 ບ່ອນນັ່ງ.
ນາຍົກລັດຖະມົນຕີ Jose Socrates ໄດ້ຍອມຮັບເອົາການປາໄຊໃນຕອນແລງວັນອາທິດວານນີ້ ຫລັງຈາກການສໍາຫລວດຫາງສຽງປະຊາຊົນຫລັງຈາກປ່ອນບັດແລ້ວຂອງໂທລະພາບສະແດງໃຫ້ເຫັນວ່າ ພັກສັງຄົມປະຊາທິປັດໄດ້ມີສຽງນໍາໜ້າຢ່າງຫລວງຫລາຍ ແລະທ່ານກ່າວວ່າ ທ່ານຈະລາອອກຈາກຕໍາແໜ່ງຫົວໜ້າພັກສົງຄົມນິຍົມເຊ່ນກັນ.
ມີທ່າທາງວ່າ ທ່ານ Pedro Passos Coelho ຫົວໜ້າພັກສັງຄົມປະຊາທິປັດຈະຂຶ້ນເປັນນາຍົກລັດຖະມົນຕີຄົນໃໝ່ ແລະປະກອບຄະນະລັດຖະບານປະສົມຂຶ້ນ ກັບພັກປະຊາຊົນທີ່ນິຍົມແນວທາງເດີມນັ້ນ.
ທ່ານ Socrates ໄດ້ເຮັດໃຫ້ມີຈັດການເລືອກຕັ້ງຂຶ້ນກ່ອນກໍານົດໃນວັນອາທິດວານນີ້ ຫລັງຈາກທ່ານປະກາດລາອອກຈາກຕໍາແໜ່ງໃນເດືອນມີນາຜ່ານມາ ເວລາສະພາປະຕິເສດຕໍ່ແຜນການປະຕິຮູບດ້ານເສດຖະ ກິດແລະຕັດລາຍຈ່າຍລົງຕື່ມອີກຂອງທ່ານ.
ຫລັງຈາກນັ້ນ Portugal ຈໍາເປັນຕ້ອງໄດ້ຫັນໜ້າໄປຫາສະຫະພາບຢູໂຣບແລະກອງທຶນສາກົນ ເພື່ອຂໍກູ້ຢືມເງິນຈໍານວນ 110 ຕື້ໂດລາເພື່ອຊ່ອຍກູ້ເສດຖະກິດ ອັນເປັນການເຄື່ອນໄຫວທີ່ທ່ານ Socrates ໄດ້ພະຍາຍາມຫລີກເວັ້ນນັ້ນ.
Portugal ກໍາລັງແບກຫາບພາລະໜີ້ສິນເປັນຈໍານວນມະຫາສານ ເສດຖະກິດກໍກໍາລັງຫົດໂຕ ແລະມີຄົນຫວ່າງງານຢ່າງຫລວງຫລາຍ.
Portugal ເປັນປະເທດທີສາມທີ່ປະເຊີນກັບບັນຫາເສດຖະກິດໃນສະຫະພາບຢູໂຣບ ຕໍ່ຈາກ Greece ແລະ Ireland ທີ່ຈໍາເປັນຕ້ອງຮ້ອງຂໍການຊ່ອຍເຫລືອໃນປີຜ່ານມານີ້ ເພື່ອກອບກູ້ເສດຖະກິດຄືນມາ.
