ອີຣ່ານແມ່ນຢູ່ໃນລາຍການຂອງຫົວຂໍ້ປະຊຸມໃນວັນອັງຄານມື້ນີ້ ໃນຂະນະທີ່ທ່ານ ໄມຄ໌ ພອມພຽວ (Mike Pompeo), ລັດຖະມົນຕີກະຊວງການຕ່າງປະເທດສະຫະລັດພົບກັບ
ປະທານາທິບໍດີ ວລາດິເມຍ ປູຕິນ ແລະທ່ານເຊີເກ ລາວຣັອຟ (Sergey Lavrov), ລັດ
ຖະມົນຕີກະຊວງການຕ່າງປະເທດຣັດເຊຍ ທີ່ນະຄອນໂຊຈີ (Sochi) ໃນຣັດເຊຍ.
ທ່ານ ລາວຣັອຟ (Lavrov) ກ່າວວ່າ ທ່ານຄາດຫວັງວ່າຈະມີ "ການສົນທະນາຫາລືກັນຢ່າງຈິງໃຈ" ກັບທ່ານພອມພຽວ (Pompeo), ລວມທັງພະຍາຍາມທີ່ຈະຊອກຮູ້ວ່າ ລັດຖະບານຂອງທ່ານທຣຳ ມີແຜນການທີ່ຈະແກ້ໄຂຄວາມເຄັ່ງຕຶງແບບໃດກັບອີຣ່ານທີ່ທ່ານລາວຣັອຟ (Lavrov) ເວົ້າວ່າຝ່າຍສະຫະລັດໄດ້ສ້າງຂຶ້ນມາເອົາເອງນັ້ນ.
ກ່ອນຈະມີການປະຊຸມກັນນັ້ນ, ຜູ້ຕາງໜ້າພິເສດຂອງກະຊວງການຕ່າງປະເທດສະຫະລັດ ຮັບຜິດຊອບເລື້ອງອີຣ່ານ, ທ່ານ ໄບຣອັນ ຮຸກ (Brian Hook) ກ່າວຕໍ່ ພວກນັກຂ່າວວ່າ ອີຣ່ານ "ມີບົດບາດໃນການເຮັດໃຫ້ຂາດສະຖຽນລະພາບໃນຊີເຣຍ" ແລະວ່າ ອີຣ່ານໃຊ້ຊີເຣຍ" ເປັນຖານຍິງລູກສອນໄຟຂີປະນາວຸດເພື່ອສົ່ງເສີມຈຸດປະສົງນະໂຍບາຍການຕ່າງປະເທດຂອງຕົນ” ໂດຍເປັນການຂັດຕໍ່ເປົ້າໝາຍຂອງຣັດເຊຍໃນການນຳເອົາສະຖຽນລະພາບກັບໄປສູ່ຊີເຣຍນັ້ນ.
ກຳລັງທະຫານຂອງຣັດເຊຍໄດ້ຊ່ວຍທະຫານຂອງຊີເຣຍມາຕັ້ງແຕ່ປີ 2015 ໃນຂະນະທີ່ອີຣ່ານໄດ້ເປັນຜູ້ໜູນຫລັງທີ່ສຳຄັນໃຫ້ແກ່ປະທານາທິບໍດີ ບາຊາ ອາລ-ອາຊາດ (Bashar al-Assad) ຊຶ່ງໃຫ້ການສະໜັບສະໜຸນ ແລະການຝຶກອົບຮົມແກ່ກຸ່ມຕິດອາວຸດ ຊີໄອ (Shi'ite).
ກອງປະຊຸມທີ່ນະຄອນໂຊຈີ (Sochi) ໃນມື້ນີ້ ຈັດຂຶ້ນພາຍຫລັງທີ່ທ່ານພອມພຽວ ໄດ້ເອົາຂໍ້ມູນລັບ ແລະລາຍລະອຽດແບ່ງປັນໃຫ້ປະເທດພັນທະມິດໃນຢູໂຣບຮູ້ກ່ຽວກັບສິ່ງທີ່ສະຫະລັດເອີ້ນວ່າ "ການນາບຂູ່ທີ່ກຳລັງເພີ້ມຂຶ້ນ" ເມື່ອໝໍ່ໆນີ້ຂອງອີຣ່ານ ໂດຍຕຳໜິເຕຫະຣ່ານວ່າ ໄດ້ເລືອກເອົາການນາບຂູ່ ແທນທີ່ຈະເລືອກເອົາການເຈລະເຈ.
ທ່ານ ຮຸກ (Hook) ກ່າວເພີ້ມອີກວ່າ "ທ່ານລັດຖະມົນຕີຢາກຈະເອົາລາຍລະອຽດ ຢູ່ເບື້ອງຫລັງຂອງສິ່ງທີ່ພວກເຮົາໄດ້ເວົ້າຢ່າງເປີດເຜີຍມາຕະຫລອດ. ພວກເຮົາເຊື່ອວ່າ ອີຣ່ານຄວນຈະເລືອກເອົາການເຈລະເຈ ແທນທີ່ຈະທຳການນາບຂູ່. ພວກເຂົາເຈົ້າໄດ້ເລືອກເຮັດສິ່ງບໍ່ຖືກຕ້ອງຫລາຍ ໂດຍການສຸມໃສ່ທຳການນາບຂູ່.”
ເຈົ້າໜ້າທີ່ຂັ້ນສູງຈາກສະຫະພາບຢູໂຣບ ກຳລັງຮຽກຮ້ອງໃຫ້ສະຫະລັດໃຊ້ "ຄວາມອົດກັ້ນໃຫ້ຫລາຍທີ່ສຸດ" ແລະຫລີກລ້ຽງການໃຊ້ວິທີທາງທະຫານເພີ້ມຂຶ້ນກັບອີຣ່ານ.
