ຜູ້ສະໝັກເລືອກຕັ້ງຈາກພັກຣີພັບບລິກັນ ທີ່ຊີງເອົາບ່ອນນັ່ງໃນລັດຖະສະພາສະຫະ
ລັດ ຢູ່ລັດ Montana ໃນພາກຕາເວັນຕົກຂອງປະເທດ ໄດ້ຖືກຂໍ້ຫາວ່າ ກະທໍາຮຸນ
ແຮງ ພາຍຫລັງທີ່ທ່ານໄດ້ຖືກກ່າວຫາວ່າ ດຶງຄໍຂອງນັກຂ່າວ ແລ້ວປ້ຳລາວໃຫ້ລົ້ມລົງ
ພື້ນນັ້ນ ໄດ້ກ່າວຂໍຂະມາໂທດທີ່ໄດ້ກະທໍາການດັ່ງກ່າວ ພາຍຫລັງທີ່ໄດ້ຊະນະຄູ່ແຂ່ງ
ຂອງທ່ານຈາກພັກເດໂມແຄຣັດ.
ທ່ານ Greg Gianforte, ຜູ້ສະໝັກທີ່ເປັນເສດຖີ ກ່າວວ່າ "ຄືນວານນີ້ຂ້າພະເຈົ້າໄດ້
ກະທໍາຜິດ. ຂ້າພະເຈົ້າໄດ້ເຮັດໃນສິ່ງທີ່ບໍ່ສາມາດເອົາຄືນມາໄດ້ ແລະຂ້າພະເຈົ້າກໍບໍ່ມີ
ຄວາມພູມໃຈຕໍ່ສິ່ງທີ່ເກີດຂຶ້ນນັ້ນ. ຂ້າພະເຈົ້າບໍ່ສົມຄວນທີ່ຈະຕອບໂຕ້ໃນລັກສະນະທີ່
ຂ້າພະເຈົ້າໄດ້ເຮັດໄປ ເພາະສະນັ້ນ ຂ້າພະເຈົ້າຂໍໂທດຫລາຍໆ."
ພາຍຫລັງເກີດເຫດການບໍ່ຮອດ 24 ຊົ່ວໂມງ ທ່ານ Gianforte ກໍໄດ້ຊະນະ ທ່ານ Rob
Quist, ທີ່ເປັນນັກຮ້ອງ ແລະນັກແຕ່ງກາບກອນນັ້ນ ແບບສູສີ ໃນວັນພະຫັດວານນີ້,
ຊຶ່ງໄດ້ຮັກສາບ່ອນນັ່ງ ທີ່ມີພຽງບ່ອນດຽວຢູ່ໃນສະພາຕໍ່າຂອງສະມາຊິກພັກຣີພັບບລິ
ກັນທີ່ຄອບຄອງມາໄດ້ 20 ປີແລ້ວນັ້ນ.
ໃນວັນພຸດຜ່ານມາ Ben Jacobs ນັກຂ່າວຂອງໜັງສືພິມ The Guardian ທີ່ຕັ້ງຢູ່
ໃນອັງກິດ ໄດ້ຂຽນຂໍ້ຄວາມອອນລາຍລົງໃນ tweeter ວ່າ ທ່ານ Gianforte "ໄດ້ປ້ຳ
ຂ້ອຍລົງ ແລະກໍເຮັດໃຫ້ແຫວ່ນຕາຂ້ອຍແຕກ" ຢູ່ສໍານັກງານໃຫຍ່ຂອງຄະນະໂຄສະນາ
ຫາສຽງຜູ້ລົງສະໝັກເລືອກຕັ້ງຢູ່ເມືອງ Bozeman ໃນເວລາບໍ່ພໍເທົ່າໃດຊົ່ວໂມງກ່ອນ
ການເລືອກຕັ້ງພິເສດທີ່ຄາດກັນວ່າ ທ່ານ Gianforte ຈະເປັນຜູ້ຊະນະຢູ່ໃນລັດທີ່ເປັນ
ເຂດຊົນນະບົດແລະ ນິຍົມພັກຣີພັບບລິກັນຢ່າງຫລວງຫລາຍນັ້ນ.
ເຫດການດັ່ງກ່າວເກີດຂຶ້ນ ໃນຂະນະທີ່ປະມານນຶ່ງສ່ວນສາມ ຂອງຜູ້ມີສິດປ່ອນບັດ
ໃນລັດ Montana ໄດ້ໄປປ່ອນບັດໄປແລ້ວ ໃນຂັ້ນຕອນການປ່ອນບັດລ່ວງໜ້າ ທີ່ຈັດຂຶ້ນກ່ອນການເລືອກຕັ້ງ.
ການເລືອກຕັ້ງພິເສດໄດ້ຈັດຂຶ້ນເພື່ອເລືອກເອົາຜູ້ມາແທນທ່ານ Ryan Zinke ຈາກພັກ
ຣີພັບບລິກັນ ທີ່ໄດ້ລາອອກໃນຕົ້ນປີນີ້ ເພື່ອໄປເປັນລັດຖະມົນຕີກະຊວງພາຍໃນຂອງ ປະທານາທິ ບໍດີທຣໍາ.
ອ່ານຂ່າວນີ້ເພີ້ມເປັນພາສາອັງກິດ
