ມີການຍົກຍ້າຍຜູ້ຄົນອອກຈາກເຮືອບິນລຳນຶ່ງ ທີ່ລັດ Kentucky ໃນພາກກາງຂ້ອນໄປທາງຕາເວັນຕົກຂອງສະຫະລັດ ຫລັງຈາກມີລາຍງານວ່າໂທລະສັບຮຸ້ນໃໝ່ຂອງບໍລິສັດ Samsung ໄດ້ເກີດໄຟໄໝ້ ກ່ອນເຮືອບິນລຳນັ້ນຈະບິນຂຶ້ນ.
ໂທລະສັບ Samsung Galaxy Note 7 ໄດ້ຜະລິດອອກມາ ຫລັງຈາກໄດ້ມີການຮຽກຄືນເມື່ອໄວໆມານີ້ ແລະທາງບໍລິສັດເຫັນວ່າມີຄວາມປອດໄພ.
ໃນຖະແຫລງການ ທີ່ນຳອອກເຜີຍແຜ່ສະບັບນຶ່ງ ບໍລິສັດ Samsung ກ່າວວ່າ ຕົນພວມເຮັດວຽກຮ່ວມກັບເຈົ້າໜ້າທີ່ແລະຜູ້ບໍລິຫານງານຖ້ຽວບິນຂອງບໍລິສັດ Southwest ເພື່ອຈະໄດ້ຮັບໂທລະສັບທີ່ມີບັນຫາແລະພິຈາລະນາວ່າແມ່ນຫຍັງຄືສາເຫດທີ່ພາໃຫ້ເກີດໄຟໄໝ້.
ຖະແຫຼງການຂອງບໍລິສັດກ່າວວ່າ “ເວລາໃດທີ່ພວກເຮົາໄດ້ກວດສອບເບິ່ງໂທລະສັບນັ້ນ ແລ້ວ ພວກເຮົາຈະໄດ້ຮັບຂໍ້ມູນເພື່ອແບ່ງປັນໃຫ້ຮູ້ເພີ້ມຕື່ມ.”
ນາງ Sarah Green ກ່າວຕໍ່ວາລະສານ Courier-Journal ແຫ່ງເມືອງ Louisville ວ່າ ໂທລະສັບເປັນຂອງສາມີນາງ ທ້າວ Brian. ນາງ Greenເວົ້າວ່າ ໂທລະສັບແມ່ນມອດຢູ່ເວລາມັນເລີ້ມມີຄວັນແລະສົ່ງສຽງດັງອອກມາ ໃນຂະນະທີ່ເຮືອບິນກຳລັງລໍຖ້າທີ່ຈະແລ່ນອອກຈາກບໍລິເວນປະຕູຈອດ.
ໃນເດືອນກັນຍາຜ່ານມາບໍລິສັດ Samsung ໄດ້ຕົກລົງທີ່ຈະເອີ້ນຄືນໂທລະສັບ Galaxy Note 7 ຫຼັງຈາກຫຼາຍສິບຄົນລາຍງານວ່າ ໝໍ້ໄຟຫຼືແບັດແຕຣີຂອງໂທລະສັບດັ່ງກ່າວໄດ້ເກີດຄວາມຮ້ອນເກີນຂອບເຂດ. ນາງ Green ກ່າວວ່າ ໂທລະສັບສາມີນາງກໍໄດ້ຖືກເອີ້ນ ຄືນ ແລະລາວຫາກໍໄດ້ຮັບໂທລະສັບໃໝ່ ເມື່ອສອງອາທິດກ່ອນ ແຕ່ບໍລິສັດ Samsung ກ່າວຢູ່ໃນຖະແຫລງການຂອງຕົນວ່າ ຕົນຍັງບໍ່ສາມາດ ໃຫ້ການຢືນຢັນ ກ່ຽວກັບປະເພດຂອງໂທລະສັບໄດ້ເທື່ອ.
ສາຍການບິນຫລາຍສາຍເລີ້ມເຕືອນຜູ້ໂດຍສານບໍ່ໃຫ້ໃຊ້ໂທລະສັບ Samsung ໃນລະ ຫວ່າງທີ່ກຳລັງບິນຢູ່ ຫລືໃຫ້ເກັບມ້ຽນໂທລະສັບເຫລົ່ານີ້ ຢູ່ໃນຫີບເຄື່ອງທີ່ກວດກາແລ້ວຍ້ອນບັນຫາເລື້ອງຄວັນ.
