ພວກກະບົດຈາກພັກກຳມະກອນຊາວ ເຄີດ ຫຼື PKK ໄດ້ທຳການໂຈມຕີລະເບີດສະຫຼະຊີບໃນວັນອາທິດມື້ນີ້ ທີ່ສະຖານີຕຳຫຼວດທະຫານ ໃນພາກຕາເວັນອອກຂອງ ເທີກີ, ເຮັດໃຫ້ທະຫານສອງຄົນເສຍຊີວິດ ແລະ ບາດເຈັບອີກ 24 ຄົນ.
ຫ້ອງການຜູ້ປົກຄອງແຂວງໃນທ້ອງຖິ່ນໄດ້ກ່າວວ່າ ການໂຈມຕີໃນແຂວງ Agri, ໃກ້ກັບ ຊາຍແດນປະເທດ ອິຣ່ານ, ລວມມີຍານ ພາຫະນະຮັບ ໃຊ້ການກະສິກຳບັນຈຸດ້ວຍລະເບີດ 2 ໂຕນ.
ການລະເບີດນີ້ເປັນການເພີ່ມທະວີຄວາມຮຸນແຮງຄັ້ງຫຼ້າສຸດ ລະຫວ່າງພວກ PKK ແລະ ເທີກີ, ເຊິ່ງໄດ້ເລີ່ມຂຶ້ນດ້ວຍການ ໂຈມຕີ ທາງອາກາດຢ່າງຕໍ່ເນື່ອງພຽງໜຶ່ງອາທິດຜ່ານມາ ໂດຍແນເປົ້າໃສ່ ພວກກະບົດຊາວ ເຄີດ ຢູ່ໃນ ເທີກີ ແລະ ພາກເໜືອ ອິຣັກ.
ປະທານຂອງພື້ນທີ່ຊາວ ເຄີດອິຣັກ ໄດ້ອອກຖະແຫຼງການໃນວັນເສົາວານນີ້ ຮຽກຮ້ອງໃຫ້ ທັງສອງຝ່າຍດຳເນີນຂະບວນການທາງສັນຕິພາບ.
ທ່ານ Massud Barzani ໄດ້ກ່າວວ່າພວກ PKK ຄວນຖອນໂຕ ອອກຈາກດິນແດນຂອງ ຊາວ ເຄີດອິຣັກ ເພື່ອປ້ອງກັນຄວາມ ເສຍຫາຍແກ່ພົນລະເຮືອນຈາກການໂຈມຕີທາງ ອາກາດ, ໃນຂະນະດຽວກັນກໍໄດ້ກ່າວປະນາມການໂຈມຕີທາງອາກາດຂອງ ເທີກີ.
ທ່ານ Barzani ກ່າວວ່າ “ພວກເຮົາກ່າວປະນາມການຖິ້ມລະເບີດ, ເຊິ່ງໄດ້ນຳໄປສູ່ ຄວາມທຸກ ທໍລະມານຂອງປະຊາຊົນ ໃນດິນແດນຂອງ ຊາວ ເຄີດ.”
ທ່ານ Barzani ສັງກັດໃນພັກປະຊາທິປະໄຕຂອງຊາວ ເຄີດ ມັກມີ ຄວາມຂັດແຍ້ງກັບ ພວກ PKK ເລື້ອຍໆ, ແຕ່ວ່າໄດ້ອະນຸຍາດໃຫ້ ນັກຮົບຂອງພວກເຂົາ ໄປຫຼົບລີ້ຢູ່ໃນພື້ນທີ່ເຂດ ຊົນນະບົດທີ່ເປັນພູໃນ ເຂດຊາຍແດນຟາກປະເທດ ອິຣັກ.
