ບັນດາເຈົ້າໜ້າທີ່ກຸງໂຊນ ກ່າວວ່າ ພວກໂຈນສະລັດໃນທະເລໂຊມາເລຍ ໄດ້ຍຶດເອົາເຮືອປະມົງເກົາຫລີໃຕ້ລໍານຶ່ງໃນຕົ້ນເດືອນນີ້ ພ້ອມກັບ 43 ຄົນ ຢູ່ໃນເຮືອລໍານັ້ນ.
ກະຊວງການຕ່າງປະເທດເກົາຫລີໃຕ້ກ່າວ ຢູ່ໃນຖະແຫລງການສະບັບນຶ່ງໃນວັນອາທິດມື້ນີ້ວ່າ ເຮືອຫາປູ Keummi 305 ນໍ້າໜັກ 241 ໂຕນ ຊຶ່ງມີລູກເຮືອຊາວເກົາຫລີໃຕ້ 2 ຄົນ ຊາວຈີນ 2 ຄົນແລະຄົນເຄັນຢາ 39 ຄົນ ໄດ້ຖືກຈີ້ໃນວັນທີ 9 ເດືອນຕຸລານີ້ ຢູ່ໃກ້ໆກັບເກາະ Lamu ຂອງເຄັນຢາໃນມະຫາສະມຸດອິນເດຍ. ກະຊວງການຕ່າງປະເທດບໍ່ໄດ້ຊີ້ແຈງວ່າ ເປັນຫຍັງຈຶ່ງເປີດເຜີຍຂ່າວນີ້ໃຫ້ຊາບ ຊ້າກວ່າ 1 ສັບປະດາ ຫລັງຈາກເກີດເຫດແລ້ວ.
ອົງການຂ່າວ Yonhap ຂອງເກົາຫລີໃຕ້ ອ້າງຄໍາເວົ້າຂອງຄົນເກົາຫລີໃຕ້ຄົນນຶ່ງ ທີ່ອາໄສຢູ່ໃນປະເທດເຄັນຢາວ່າ ເຮືອປະມົງລໍານີ້ຖືກນໍາໄປຍັງທີ່ໝັ້ນແຫ່ງນຶ່ງຂອງພວກໂຈນທະເລ ໃນພາກເໜືອຂອງໂຊມາເລຍ.
ຍັງບໍ່ເປັນທີ່ຮູ້ຈັກກັນວ່າ ໄດ້ມີການເລີ້ມທໍາການເຈລະຈາກັບພວກໂຈນທະເລ ຫລືຍັງ ຫລືວ່າພວກເຂົາໄດ້ຮຽກຮ້ອງເອົາຄ່າໄຖ່ ຫລືບໍ່?