ລິ້ງ ສຳຫລັບເຂົ້າຫາ

ຟິລິບປິນ ຂໍຄວາມຊ່ວຍເຫຼືອ ເຮືອບິນສອດແນມ ຈາກສະຫະລັດ (ສະໄລດ໌)

  • ທອງປານ ເທບວົງສາ

ທ່ານ Benigno Aquino ປະທານາທິບໍດີ ຟິລິບປິນ

ຟິລິບ​ປິນກ່າວ​ວ່າ ຕົນ​ກໍາລັງ​ພິດ​ຈາລະ​ນາ​ ຫຼາຍໆ​ທາງ​ເລືອກ ​ສໍາລັບ​ຕິດຕາມສິ້ງ​ຊອມ​ເບິ່ງ​ບໍລິເວນທີ່​ເປັນ​ຂໍ້​ຂັດ​ແຍ້​ງກັນ ​ໃນ​​ເຂດ​ທະ​ເລ​ຈີນ​ໃຕ້ ​ໂຮມ​ທັງການຂໍ​ຄວາມ​ຊ່ວຍ​ເຫຼືອ​ຈາກ ເຮືອບິນ​ສອດ​ແນມ​​ທະຫານຂອງ​ສະຫະລັດ. ປະທານາທິບໍດີຟິລິ​ບປິນ ທ່ານ Benigno Aquino ​ໄດ້​​ຍົກເອົາແນວ​ຄິດດັ່ງກ່າວ​ນີ້ ຂຶ້ນ​​ມາເວົ້າ ຫຼາຍ​​ມື້ກ່ອນກອງ​ປະຊຸ​ມສຸດ​ຍອດ​ດ້ານ​ຄວາມ​ໝັ້ນຄົງ​ລະດັບຂົງ​ເຂດ​ຄັ້ງ​ສໍາຄັນ​ບັ້ນ​ນຶ່ງ ບ່ອນ​ທີ່​ສະຫະລັດ​ແລະ​ຈີນ​ເຄີຍ​​ປະ​ທະ​ກັນ​ມາແລ້ວ​ໃນ​ອະດີດ. Simone Orendain ຜູ້​ສື່​ຂ່າວ​ວີ​ໂອ​ເອລາຍ​ງານ​ຈາກມະນີລາ ຊຶ່ງ​ທອງ​ປານມີ​ລາຍ​ລະອຽດ​ ມາສະ​ເໜີທ່ານ.

ຟັງລາຍງານ:

ປະທານາທິບໍດີ​ອາ​ຄີ​ໂນ ​ໄດ້​ກ່າວເປັນ​ເທື່ອ​ທໍາ​ອິດ​ເມື່ອ​ວັນ​ຈັນ​ອາທິດແລ້ວນີ້ ຕໍ່​ອົງການ​ຂ່າວ
ຣອຍ​ເຕີ ວ່າ ຟິລິບ​ປິ​ນອາດຈະ​ຮ້ອງ​ຂໍ​ຄວາມ​ຊ່ວຍເຫລືອ ຈາກເຮືອ​ບິນ​ສອດ​ແນມ​ທະຫານ
​ຂອງ​ສະຫະລັດ ໃຫ້ທໍາການລາດຕະ​ເວນ ຢູ່​ເທິງ​ນ່ານຟ້າ​ເຂດ​ທະ​ເລ​ຈີນ​ໃຕ້.

ແຕ່ທ່ານ Ramon Carandang ເລຂາຝ່າຍ​ສື່ສານ​ປະ​ຈໍາ​ປະທານາທີ​ບໍດີ​ໄດ້​ເນັ້ນ​ຍໍ້າຜ່ານ
​ທາງ​ທີ​ວີ ​ທີ່​ລັດ​ເປັນ​ຜູ້​ຄວບ​ຄຸມເມື່ອວັນ​ອັງຄານຕໍ່​ມາ​ວ່າ ​ເວລາ​ນີ້​ຍັງ​ບໍ່​ມີ​ການ​ຕັດສິນ​ໃຈ​ໃດໆ​
ກ່ຽວ​ກັບ​ເລື່ອງນີ້ເທື່ອ ​ແລະ​ວ່າຄວາມຮັບຜິດຊອບ​ຂັ້ນ​ຕົ້ນ​ໃນການ​ຕິດຕາມເບີ່ງ​ນັ້ນ​ ແມ່ນຍັງ
​ຕົກ​ຢູ່​ກັບ​ລັດຖະບານ​ຟິລິບ​ປິນ. ທ່ານ ຄາຣັນດັງ​ກ່າວ​ວ່າ:

“ຂ້າພະ​ເຈົ້າຂໍ​ເວົ້າຕື່ມ​ນໍາອີ​ກວ່າ ຖ້າ​ຫາກ​ວ່າ​ມັນເກີດ​ຂຶ້ນ​ແທ້ໆ​ແລ້ວ ມັນກໍເປັນ​ການ
ບິນ​ປະຕິບັດ​ການ​ສອດ​ແນວ​ຫຼາຍກວ່າ ບໍ່​ແມ່ນ​ການ​ປະຕິບັດ​ການທີ່​ເກາະ​ຜິດ​ຄິດ​
ຮ້າຍ​ກັນ. ທີ່​ມີເປົ້າໝາຍ​ພຽງ​ແຕ່ເພື່ອຄວບ​ຄຸມ​ສັງ​ເກດ​ການ​ເບິ່ງດິນແດນຂອງພວກ
ເຮົາເທົ່າ​ນັ້ນ. ­­ບໍ່​ມີ​ຄວາມສາມາດໃນການໂຈມຕີໃດ​ໆ​ໃນ​ທີ່​ນີ້ ດັ່ງ​ນັ້ນ​ກໍບໍ່​ໜ້າຈະມອງ
ເບິ່ງຖ້ອຍ​ຖະ​ແຫຼ​ງນີ້​ວ່າເປັນ​ການ​ເກາະຜິດ​ຄິດ​ຮ້າຍແຕ່​ຢ່າງ​ໃດ.”

ທ່ານ ຄາຣັນດັງ​ ກ່າວ​ຕໍ່​ໄປ​ວ່າ ຟິລິ​ບປິບຍັງ​ກໍາລັງ​ພິດ​ຈາລະ​ນາຈະ​ຊື້ກໍ່າ​ປັ່ນລໍາ​ໃໝ່​ອີກ​ຫຼາຍ
​ລໍາ ​ເພື່ອ​ເສີມ​ຂະຫຍາຍ​ກອງ​ທັບເຮືອ​ທີ່​ນ້ອຍໆ​ຂອງ​ຕົນ​ໃຫ້​ມີ​ອານຸພາບ​ຫຼາຍ​ຂຶ້ນ.

​ໂຄສົກ​ກະຊວງ​ຕ່າງປະ​ເທດ​ຈີນ​ກ່າວ​ເມື່ອ​ວັນ​ຈັນ​ຜ່ານ​ມາ​ນີ້ວ່າ ປັກ​ກິ່ງ​ຫວັງ​ວ່າ ຟິລິບ​ປິນຈະ
ຢຸດ​ເຊົາກ່າວຖ້ອຍຖະ​ແຫຼ​ງ​ແບບ​ເກາະ​ຜິດ​ຄິດ​ຮ້າຍ​ ກ່ຽວ​ກັບຂໍ້ຂັດແຍ້​ງ​ເລຶ່ອງການ​ເດີນ​ເຮືອ​ນັ້ນ​.

​ໂຄສົກ ຫຼິວ ​ເຫວ່​ໝິ່ນ ກ່າວ​ວ່າ ມັນ​ເປັນຄວາມ​ຫວັງ​ຂອງ​ຝ່າຍ​ຈີນ ທີ່ວ່າ​ ສັນຕິພາບ​ແລະ​ສະ
ຖຽນ​ລະ​ພາບ ຈະ​ສາມາດ​ຮັກສາເອົາ​ໄວ້ໄດ້ຢູ່​ໃນ​ຂົງ​ເຂດ​ເອເຊຍ​ປາຊິ​ຟິກ ​ແລະ​ພັກ​ຝ່າຍ​ຕ່າງໆ​
ທີ່​ກ່ຽວຂ້ອງ​ນັ້ນ ຈະປະຕິບັດ​ການໃນ​ສິ່ງທີ່ຈະນໍາ​ມາຊຶ່ງ​ສັນຕິພາບ​ແລະ​ສະຖຽນລະ​ພາບ​ໃນ
​ຂົງ​ເຂດ.

ຟິລິບ​ປິນ ຫວຽດນາມ ມາ​ເລ​ເຊຍ ​ແລະ​ບຣູ​ໄນ ທັງ​ໝົດ​ນີ້ ​ໄດ້​ອ້າງ​ເອົາ​ບາງສ່ວນ​ຂອງ​ເຂດ
​ທະ​ເລ​ທີ່ຢູ່​ໃກ້​ຝັ່ງ​ທະ​ເລ​ຂອງ​ພວກ​ຕົນ​ ​ໃນ​ຂະນະ​ທີ່ຈີນ​ແລະ​ໃຕ້​ຫວັນ​ອ້າງ​ເອົາເກືອບວ່າ​ທັງ​
ໝົດ​ເຂດ​ທະ​ເລ​ດັ່ງກ່າວ​ ​ຊຶ່ງ​ເປັນ​ເສັ້ນທາງ​ເດີນ​ເຮືອ​ທີ່​ສໍາຄັນ ແລະອຸດົມສົມບູນ​ດ້ວຍ​ນໍ້າມັນ
​ແລະ​ແກ​ສທໍາ​ມະ​ຊາດ​.

ທ່ານ Carl Thayer ​ຊ່ຽວຊານ​ຄວາມ​ໝັ້ນຄົງ​ຂົງ​ເຂດ​ເອ​ເຊຍ​ຕາ​ເວັນ​ອອກສຽງ​ໃຕ້​ປະ​ຈໍາ​ມະຫາ
​ວິ​ທະຍາ​ໄລ New South Wales ປະເທດອອສເຕຣເລຍ ກ່າວ​ວ່າ ດຽວ​ນີ້ ຈີນແມ່ນຈະມອງ
​ເຫັນ​ທຸກ​ສິ່ງທີ່​ກ່ຽວ​ພັນ​ກັບການເຄື່ອນໄຫວທາງ​ທະຫານ​ຂອງ​ສະຫະລັດ ຢູ່​ໃນ​ເຂດ​ນ່ານນໍ້າ​ທີ່
​ເປັນ​ຂໍ້​ຂັດ​ແຍ້​ງກັນ​ນັ້ນ ວ່າ​ເປັນການ​ເກາະ​ຜິດ​ຄິດ​ຮ້າຍ. ​

​ແຕ່​ແນວ​ໃດ​ກໍ​ດີ, ທ່ານ ​ເທ​ເອີ ກ່າວ​ວ່າ ທ່ານ​ຄາດ​ວ່າ​ ສະຫະລັດ​ຈະ​ພະຍາຍາມເຮັດ​ໃຫ້​ສະຖາ
ນະ​ການ​ສະຫງົບ​ລົງ​ໄດ້ ​ໂດຍ​ສະ​ເພາະ​ຢ່າງຍິ່ງໃນຂະນະທີ່ບັນດາປະ​ເທດ​ສະມາຊິກ​ສະມາຄົມ
​ອາ​ຊ່ຽນ ກໍາລັງ​ຈັດກອງປະຊຸມ​ສຸດ​ຍອດ​ດ້ານຄວາມ​ໝັ້ນຄົງຄັ້ງສໍາຄັນຂຶ້ນໃນ​ອາທິດ​ນີ້. ທ່ານ
​ເທ​ເອີ ກ່າວ​ວ່າ:

“ສະຫະລັດ​ຈະ​ພະຍາຍາມເຮັດໃຫ້ທຸກຝ່າຍມີຄວາມເຊື່ອໝັ້ນ ໃນຄວາມ​ຕັ້ງ​ໃຈຂອງ​ຕົນ
ທີ່ຈະຮ່ວມ​ມື​ກັບ​ຈີນ ດັ່ງ​ນັ້ນ ການ​ເຄື່ອນໄຫວໃດ​ໆ​ກັບ​ຟິລິບ​ປິນນັ້ນ ຈະ​ຕ້ອງອອກມາໃນ
ຮູບ ທີ່ພາໃຫ້
ຂົງ​ເຂດ​ເອ​ເຊຍ​ຕາ​ເວັນ​ອອກ​ສຽງ​ໃຕ້ ​ມອງ​ເຫັນວ່າ ສະຫະລັດ​ກໍາລັງ​ພະຍາ
ຍາມ​ປະຕິບັດ​ງານ​ກັບ​ຈີນນັ້ນ​ຫຼາຍ​ກວ່າ ​
ບໍ່ແມ່ນພະຍາຍາມ​ສ້າງບັນຫາ​ຂຶ້ນໄປຕື່ມນັ້ນ.”

ທ່ານ ​ເທເອີ ກ່າວ​ວ່າ ມະນິລາ​ມີ​ທາງ​ເລືອກ​ທີ່ເປັນການ​ເກາະ​ຜິດ​ນ້ອຍ​ກວ່າການຂໍ​ຄວາມ​ຊ່ວຍ
​ເຫຼືອ​ຈາກເຮືອບິນ​ສອດ​ແນມຂອງ​ສະຫະລັດ ສໍາລັບ​ຄວບ​ຄຸມ​ເບິ່ງເສັ້ນທາງ​ເດີນ​ເຮືອນັ້ນ ​ໂຮມ​
ທັງການ​ໃຊ້​ເຣດ້າ​ເພື່ອ​ສັງ​ເກດເບິ່ງ ​ແລະ​ກວດຫາ​ກໍ່າ​ປັ່ນ​ຕ່າງປະ​ເທດ. ທ່ານ ​ເທ​ເອີ ຍັງເຫັນດີ
ນໍາການ​ໃຊ້​ແສງ ອິນ​ຟຣາ​ເຣດ ​ເພື່ອ​ຈັບ​ການ​ເຄື່ອນ​ໄຫວ​ນັ້ນນໍາ. ທ່ານ​ກ່າວຕໍ່ໄປວ່າ ແຕ່ມັນຈະ
ຕ້ອງ​ອາ​ໄສ​ການ​ລົງ​ທຶນ​ຢ່າງ​ໃຫຍ່​ໃສ່ອຸບປະກອນ ປ​ະ​ເພດ Hardware ທີ່​ອາດ​ມາ​ຈາກ​ສະຫະ
ລັດ ແຕ່ມັນກໍຈະ​ເຮັດໃຫ້​ສະຫະລັດ​ມີ​ບົດບາດ ​ແບບບໍ່ອອກໜ້າຫລາຍກ່ວາ ໃນຖານະເປັນ
ພຽງ​ຜູ້​ຂາຍ​ເທົ່ານັ້ນ.

ຟິລິບ​ປິນ​ແລະ​ສະຫະລັດ ມີ​ສົນທິສັນຍາ​ປ້ອງ​ກັນ​ປະ​ເທດ​ຮ່ວມ​ກັນ ​ແຕ່ສະຫະລັດກໍ​ປະຕິ​ເສດ​
ຢູ່​ຕະຫຼອດ​ມາ​ ທີ່ຈະເອົາຈຸດຢືນໃດນຶ່ງ​ກ່ຽວກັບ​ບັນຫາ​ຂັດ​ແຍ້​ງກັນເລື້ອງ​ເຂດ​ນໍ້າ​ແດນ​ດິນ​ນັ້ນ.
ພາຍໃຕ້​ສົນທິສັນ​ຍາ​ທີ່​ວ່າ​ນີ້ ຟິລິບ​ປິນກໍາລັງປັບປຸງ​ສະມັດຖະພາບ​ທາງ​ທະຫານ ​ທີ່​ມີ​ຂະໜາດ
ນ້ອຍຫລາຍ​ຂອງ​ຕົນນັ້ນ ດ້ວຍ​ອຸບປະກອນທີ່​ທັນ​ສະ​ໄໝ​ຫຼາຍ​ຂຶ້ນ ​ທີ່ຊື້ຈາກສະຫະລັດໃນລາ
ຄາ​ຫລຸດໃຫ້​. ນອກ​ນີ້​ແລ້ວ​ ຟິລິບ​ປິນຍັງ​ໄດ້ເປີດທ່າ​ເຮືອຂອງ​ຕົນ​ ​ໃຫ້​ກໍ່າ​ປັ່ນຂອງ​ສະຫະລັດ
ຊຶ່ງ​ຄັ້ງ​ນຶ່ງ​ເປັນຜຸູ້ຄຸ້ມ​ຄອງ​ຖານ​ທັບ​ເຮືອ​ສໍາຄັນ​ ທີ່​ອ່າວ Subic ຫຼື Subic Bay ນັ້ນ ເຂົ້າມາຢຸດ
​ແວ່ເລື້ອຍ​ຂຶ້ນ.

ທີ່​ກອງ​ປະຊຸມ​ສຸດ​ຍອດ​ສະມາຄົມ​ອາ​ຊ່ຽນ​ປີ 2010 ນັ້ນ ທ່ານ​ນາງ​ຮິ​ລ​ແລຣີ ຄລິນຕັນ ລັດຖະ
ມົນຕີ​ຕ່າງປະ​ເທດ​ສະຫະລັດ ໄດ້ສ້າງຄວາມ​ໂມໂຫ​ໃຫ້​ຈີນ ​ເວລາທ່ານນາງ​ກ່າວ​ວ່າ ຂໍ້ຂັດ​ແຍ້​ງ
ກັນໃນເລື້ອງນີ້ ໜ້າ​ຈະ​ຈັດການ​ແກ້​ໄຂ​ກັນບົນ​ພື້ນຖານແບບຫຼາຍ​ຝ່າຍ. ​ແຕ່​ຝ່າຍ​ຈີນ​ກໍ​ຢືນ​ຢັດ
​ຢູ່​ຕະຫລອດມາ​ວ່າ​ ຢາກ​ໃຫ້​ມີ​ການ​ເຈ​ລະ​ກັນ​ແບບ​ນຶ່ງ​ຕໍ່​ນຶ່ງ ກັບ​ບັນດາປະ​ເທດ​ທີ່​ອ້າງ​ເອົາ​ກໍາ
​ມະ​ສິດ​ໃນເຂດ​ທະ​ເລ​ຈີນໃຕ້ນັ້ນ​ ໂດຍສະ​ເພາະ.

XS
SM
MD
LG