ບັນດາກຸ່ມປົກປ້ອງສິດທິມະນຸດພາກັນປະນາມຟີລິບປິນ ທີ່ຕັດສິນໃຈບໍ່ໄປຮ່ວມໃນພິທີມອບລາງວັນໂນແບລຂະແໜງສັນຕິພາບ ໃນວັນສຸກມື້ອື່ນນີ້ ໃຫ້ນາຍ Lio Xiaobo ຜູ້ຄັດຄ້ານລັດຖະບານຈີນທີ່ກໍາລັງຖືກຂັງຄຸກໃນເວລານີ້.
ໂຄສົກປະຈໍາກະຊວງການຕ່າງປະເທດຟີລິບປິນອອກຖະແຫລງການສະບັບນຶ່ງໃນວັນພະຫັດມື້ນີ້ ຢືນຢັນວ່າ ຈະບໍ່ມີຜູ້ຕາງໜ້າຂອງຟີລິບປິນໄປຮ່ວມພິທີ ທີ່ກຸງ Oslo ປະເທດ Norway ນັ້ນ.
ນາງ Elaine Pearson ເຈົ້າໜ້າທີ່ປະຈໍາກັບກຸ່ມສົ່ງເສີມສິດທິມະນຸດ Human
Rights Watch ເອີ້ນການຕັດສິນໃຈຂອງລັດຖະບານກຸງມານີລາວ່າ ໜ້າຕົກໃຈ ຍ້ອນວ່າການຕັດສິນໃຈທີ່ວ່ານີ້ ມາຈາກປະເທດນຶ່ງທີ່ມີຄວາມພາກພູມໃຈໃນຕົນເອງ ກ່ຽວກັບຄ່ານິຍົມດ້ານປະຊາທິປະໄຕນັ້ນ.
ຟີລິບປິນເປັນນຶ່ງໃນຈໍານວນ 18 ປະເທດ ນອກຈາກຈີນ ທີ່ໄດ້ແຈ້ງໃຫ້ຄະນະກໍາມະການມອບລາງວັນໂນແບລຊາບວ່າ ພວກຕົນຈະບໍ່ຮັບຄໍາເຊື້ອເຊີນໄປຮ່ວມພີທີດັ່ງກ່າວ. ສະຖາບັນໂນແບລ ກ່າວວ່າ 44 ປະເທດໄດ້ຮັບຄໍາເຊີນ ເຖິງແມ່ນໄດ້ມີການກົດດັນຈາກກຸງປັກກິິ່ງ ທີ່ຂູ່ວ່າ ຈະມີຜົນຮັບຕິດຕາມມາສໍາລັບພວກ ປະເທດໃດ ທີ່ໄປຮ່ວມພິທີດັ່ງກ່າວ.
