ລິ້ງ ສຳຫລັບເຂົ້າຫາ

ຟິລິບປິນ ເສີມກໍາລັງປ້ອງກັນ ໃນເຂດໝູ່ເກາະ Spratly

  • ວັນນະສອນ ແກ້ວດາຣາ

ຜູ້ບັນຊາການກອງທັບຟີລິບປິນນາຍພົນ Eduardo Oban

ປະເທດຟິລິບປິນກໍາລັງວາງແຜນເສີມກໍາລັງປ້ອງກັນທັງທາງນໍ້າແລະທາງ ອາກາດຢູ່ໃນ
ບໍລິເວນທີ່ມີການຖົກຖຽງໂຕ້ແຍ້ງອ້ອມແອ້ມໝູ່ເກາະ Spratly ໃນເຂດທະເລຈີນໃຕ້ນັ້ນ.

ຜູ້ບັນຊາການກອງທັບຟີລິບປິນນາຍພົນ Eduardo Oban ໄດ້ກ່າວໃນວັນຈັນວານນີ້ວ່າ ທາງລັດຖະບານໄດ້ຮ້ອງຂໍໃຫ້ທາງກອງທັບກຽມບັນຊີລາຍຊືມ ສິ່ງຂອງ ຕ່າງໆທີ່ມີຄວາມ
ຈຳເປັນເພື່ອເສີມສະມັດຖະພາບຢູ່ໃນບໍລິເວນດັ່ງກ່າວ.

ທ່ານ Oban ກ່າວວ່າ ທາງກອງທັບມີງົບປະມານ 185 ລ້ານໂດລ່າເພື່ອຊື້ກໍາປັ່ນລາດ
ຕະເວນ, ເຮືອບິນ, ລະບົບເຣດາ ແລະການສ້ອມສະໜາມບິນ ທີ່ເກາະ Pagasa ທີ່ ຢູ່ໃກ້ໆກັບໝູ່ເກາະ Spratly.

ຈີນໄດ້ອ້າງກຳມະສິດເໜືອໝູ່ເກາະ Spratly ຊຶ່ງເປັນເກາະທີ່ອຸດົມສົມບູນໄປດ້ວຍນໍ້າມັນ
ນັ້ນ ວ່າເປັນດິນແດນຂອງຕົນ ແຕ່ຟິລິບປິນແລະອີກ 4 ປະເທດໃນເຂດເອເຊຍອາຄະເນ
ຕ່າງກໍອ້າງກໍາມະສິດເໜືອໝູ່ເກາະ Spratly ຄືກັນ.

ການໃຫ້ທັດສະນະດັ່ງກ່າວຂອງທ່ານ Oban ມີຂຶ້ນພຽງແຕ່ອາທິດນຶ່ງຫຼັງຈາກ ຟິລິບປິນ
ໄດ້ຍື່ນໃບປະທ້ວງຢ່າງເປັນທາງການຕໍ່ຈີນ ໂດຍອ້າງວ່າ ພວກເຮືອລາດຕະເວນຂອງຈີນ
ໄດ້ຮາວີລົບກວນກໍາປັ່ນຂອງຟິລິບປິນທີ່ພວມທຳການສຳຫຼວດຫານໍ້າມັນໃກ້ໆກັບເຂດ
ດັ່ງກ່າວ.

ໝູ່ເກາະແລະຫາດທີ່ບໍ່ມີຜູ້ຄົນຢູ່ອາໄສຢູ່ເຫຼົ່ານີ້ ເຊື່ອວ່າເປັນບໍ່ນໍ້າມັນແລະເປັນແຫຼ່ງສຳຮອງ
ຂອງແກັສທຳມະຊາດໃນປະລິມານມະຫາສານ.

ລັດຖະມົນຕີການຕ່າງປະເທດສະຫະລັດ ທ່ານນາງ Hillary Clinton ໄດ້ຮຽກ ຮ້ອງໃຫ້ມີ
ການແກ້ໄຂບັນຫາຂັດແຍ້ງແບບຫຼາຍຝ່າຍ. ທ່ານນາງຍັງກ່າວວ່າ ໃນກອງປະຊຸມຄວາມ
ໝັ້ນຄົງພູມີພາກອາຊ່ຽນໃນປີກາຍນີ້ວ່າ ສະຫະລັດແມ່ນມີຜົນປະໂຫຍດແຫ່ງຊາດ ໃນການ
ສືບຕໍ່ຮັກສາໄວ້ ຊຶ່ງການເດີນເຮືອຢ່າງເສລີຜ່ານບໍລິເວນດັ່ງກ່າວ.

XS
SM
MD
LG