ລັດຖະບານ ມະນີລາ ໄດ້ຮຽກຕົວທູດພິເສດອາວຸໂສຂອງ ຈີນ ມາພົບ ໃນວັນພະຫັດມື້ນີ້ ເພື່ອປະທ້ວງຕໍ່ເຫດການຍິງທໍ່ສີດນ້ຳທີ່ໄດ້ສ້າງຄວາມເສຍຫາຍຕໍ່ກຳປັ່ນຂອງ ຟີລິບປິນ ສອງລຳໃນລະຫວ່າງການລາດຕະເວນໃນທະເລຈີນໃຕ້.
ກຳປັ່ນຍາມຊາຍຝັ່ງ ແລະ ເຮືອລັດຖະບານອີກລຳນຶ່ງ ໄດ້ຮັບຄວາມເສຍຫາຍໃນເຫດການທີ່ເກີດຂຶ້ນເມື່ອວັນທີ 30 ເມສາທີ່ຜ່ານມາ ໃກ້ກັບໝູ່ເກາະ ສກາໂບໂຣ ທີ່ມີບັນຫາຂັດແຍ້ງກັນ, ອີງຕາມກະຊວງການຕ່າງປະເທດຂອງ ຟີລິບປິນ.
ມະນີລາ ແລະ ປັກກິ່ງ ມີປະຫວັດຂອງຄວາມຂັດແຍ້ງດ້ານເຂດແດນໃນທະເລຈີນໃຕ້ມາດົນນານແລ້ວ, ແລະ ສອງປະເທດທີ່ຢູ່ໃກ້ຄຽງກັນດັ່ງກ່າວ ແມ່ນໄດ້ມີສ່ວນຮ່ວມໃນເຫດການທາງທະເລໃນສອງສາມເດືອນທີ່ຜ່ານມາ ໃນຂະນະທີ່ເຂົາເຈົ້າຢືນຢັນການກ່າວອ້າງແບບບດຽວກັນໃນເຂດນ້ຳຍຸດທະສາດດັ່ງກ່າວ.
ເຫດການຫຼ້າສຸດນີ້, ຢູ່ໃກ້ກັບໝູ່ເກາະ ສກາໂບໂຣ ທີ່ຖືກຄວບຄຸມໂດຍຈີນ, ໄດ້ເກີດຂຶ້ນໃນລະຫວ່າງການປະຕິບັດພາລະກິດເຕີມສະບຽງຂອງບັນດານັກຫາປາຊາວ ຟີລິບປິນ.
ທ່ານ ໂຊ ຊີຢອງ, ເຈົ້າໜ້າທີ່ໝາຍເລກສອງຢູ່ສະຖານທູດ ຈີນ, ໄດ້ຖືກຮຽກຕົວມາພົບໂດຍລັດຖະບານ ມະນີລາ ກ່ຽວກັບ “ການຮາວີລົບກວນ, ການຂັບເຮືອຕຳ, ການລຸມໃສ່, ການຕິດຕາມຢ່າງໃກ້ຊິດ ແລະ ກີດກັ້ນ, ການເດີນເຮືອທີ່ອັນຕະລາຍ, ການໃຊ້ທໍ່ສີດນ້ຳ ແລະ ການກະທຳທີ່ດຸຮ້າຍອື່ນໆຂອງກຳປັ່ນຍາມຊາຍຝັ່ງຂອງຈີນ ແລະ ທະຫານບ້ານທາງທະເລຂອງຈີນ,” ອີງຕາມຖະແຫຼງການສະບັບນຶ່ງຈາກກະຊວງການຕ່າງປະເທດ.
ກະຊວງໄດ້ກ່າວຕື່ມວ່າ “ການກະທຳທີ່ດຸຮ້າຍຂອງ ຈີນ, ໂດຍສະເພາະແມ່ນການໃຊ້ທໍ່ສີດນ້ຳຂອງພວກເຂົາ, ໄດ້ກໍ່ໃຫ້ເກີດຄວາມເສຍຫາຍ” ຕໍ່ກຳປັ່ນຫຼາຍລຳຂອງ ຟີລິບປິນ, ໂດຍຮຽກຮ້ອງໃຫ້ເຮືອຂອງ ຈີນ ໜີອອກຈາກໝູ່ເກາະ ແລະ ຂອບເຂດຂອງເຂົາເຈົ້າໃນທັນທີ.
ຟີລິບປິນ ໄດ້ກ່າວວ່າ ແຮງດັນໃນເຫດການທໍ່ສີດນ້ຳຂອງວັນອັງຄານທີ່ຜ່ານມາແມ່ນຮຸນແຮງກວ່າທໍ່ສີດນ້ຳ ທີ່ຖືກໃຊ້ກ່ອນໜ້ານີ້ຫຼາຍ, ແລະວ່າມັນໄດ້ເຮັດໃຫ້ເຫຼັກ ຫຼາຍສ່ວນຈີກຂາດ ຫຼື ຄົດງໍ ແລະ ອຸປະກອນຢູ່ເທິງກຳປັ່ນຂອງ ຟີລິບປິນ.
ການປະທ້ວງທາງການທູດຂອງວັນພະຫັດມື້ນີ້ແມ່ນຄັ້ງທີ່ 20 ໂດຍ ມະນີລາ ໃນປີນີ້, ແລະ ຄັ້ງທີ 153 ນັບຕັ້ງປະທານາທິບໍດີ ເຟີດີນານ ມາຄອສ ໄດ້ເຂົ້າກຳອຳນາດໃນກາງປີ 2022, ອີງຕາມການກ່າວຂອງກະຊວງການຕ່າງປະເທດ.
ສະຖານທູດ ຈີນ ບໍ່ໄດ້ຕອບຕໍ່ການຂໍຄຳເຫັນໃນທັນທີ.
ຟໍຣັມສະແດງຄວາມຄິດເຫັນ