ລິ້ງ ສຳຫລັບເຂົ້າຫາ

ປະຊາຊົນ ຟີລິບປິນ ກຽມຮັບມື ລົມໄຕ້ຝຸ່ນ ຣາມມະສູນ


ຊາວບ້ານໄດ້ພາກັນ ມັດເຮືອ ຂອງພວກເຂົາເຈົ້າໄວ້ ໃນບໍລິເວນ ທີ່ປອດໄພ ຢູ່ເມືອງ Cavite ຝັ່ງທະເລພາກໃຕ້ຂອງ ມານີລາ ເມື່ອວັນທີ 15 ກໍລະກົດ 2014.

ປະຊາຊົນຫຼາຍພັນຄົນ ໃນ​ພາກ​ຕາ​ເວັນ​ອອກສຽງ​ເໜືອ​ຂອງ
​ຟີ​ລິບ​ປິນ ​ໄດ້​ຖືກ​ຍົກຍ້າຍ ອອກ​ຈາກເຮືອນຊານ ​ຂອງພວກ
ເຂົາ​ເຈົ້າກ່ອນ​ໜ້າການ​ໄປເຖິງ​ຂອງໄຕ້ຝຸ່ນ​ຫົວທຳ​ອິດໃນ​ລະ
ດູ​ລົມໄຕ້ຝຸ່ນຂອງ​ປະ​ເທດ ໃນປີນີ້.

​ໄຕ້​ຝຸ່ນ ຣາມມະ​ສູນ (Rammasun) ຊຶ່ງມີລົມແຮງ​ເຖິງ 150
ກິ​ໂລ​ແມັດ​ຕໍ່​ຊົ່ວ​ໂມງ ​ມີ​ກຳນົດ​ຈະພັດຂຶ້ນຝັ່ງຢູ່​ເຂ​ດ​ Bicol ທີ່​
ທຸກ​ຍາກຂອງປະເທດ ​ໃນ​ວັນ​ອັງຄານ​ມື້​ນີ້.

ບັນ​ດາ​ເຈົ້າໜ້າ​ທີ່ ໄດ້ຟ້າວ​ຟັ່ງ ​ຍົກຍ້າຍ​ປະຊາ​ຊົນ​ຫຼາຍໝື່ນ​ຄົນ
​ອອກ​ຈາກ​ບໍລິ​ເວນ​ທີ່​ມັກເກີດ​ໄພ​ນ້ຳ​ຖ້ວມ ແລະດິນ​ເຈື່ອນ​ໄປ​ຢູ່​
ສູນ​ຫລົບໄພແຫ່ງຕ່າງໆ.

ໄຕ້ຝຸ່ນ ຣາມມະສູນ
ໄຕ້ຝຸ່ນ ຣາມມະສູນ

ຖ້ຽວບິນ​ພາຍ​ໃນປະ​ເທດ ຫຼາຍສິບ​ຖ້ຽວ​ໄດ້​ຖືກ​ຍົກເລີກ ​ແລະ​
ໂຮງຮຽນຫຼາຍໆ​ແຫ່ງ​ໄດ້​ຖືກປິດລົງ. ​ການຂົນ​ສົ່ງທາງ​ທະ​ເລກໍ
ໄດ້ຖືກ​ປິດ​ໝົດ ​ເຊັ່ນ​ກັນ ເຮັດ​ໃຫ້ຜູ້ໂດຍສານ ​ເຮືອຂ້າມ​ຟາກ
ຫຼາຍຮ້ອຍ​ຄົນ ຕົກ​ຄ້າງ​ຢູ່ຕາມ​ທ່າ​ເຮືອຕ່າງໆ.

ໄຕ້ຝຸ່ນ Rammasun ທີ່ມີຄວາມ​ໝາຍ​ວ່າ “ເທບພະ​ເຈົ້າແຫ່ງ
​ຟ້າຮ້ອງ”
ໃນ​ພາສາ​ໄທ ​ໄດ້ເພີ້​ມຄວາມ​ແຮງຂຶ້ນ​ ໃນ​ຄ່ຳຄືນຂອງ​
ວັນ​ຈັນ​ວານ​ນີ້ ​ຈາກລົມພາ​ຍຸ​ເຂດ​ຮ້ອນ ​ມາ​ເປັນ​ລົມໄຕ້​ຝຸ່ນ.

ຄາດ​ວ່າ​ລົມໄຕ້​ຝຸ່ນ​ດັ່ງກ່າວ ​ຊຶ່ງ​ເປັນ​ໄຕ້​ຝຸ່ນ​ ມີຄວາມແຮງອັນດັບໜຶ່ງ ຈະພັດເຂົ້າຖະ​ຫລົ່ມ
ນະຄອນຫລວງມາ​ນີລາ ທີ່​ມີ​ປະຊາຊົນ​ອາ​ໄສ​ຢູ່​ຢ່າງ​ໜາ​ແໜ້ນ ແລະມັກ​ເກີດ​ໄພນ້ຳ​ຖ້ວມ
ງ່າຍ​ນັ້ນ​ ​ໃນ​ຕອນ​ເຊົ້າວັນ​ພຸດ​ມື້​ອື່ນ​.

ມີລົມພາຍຸຂະໜາດໃຫຍ່ປະມານ 20 ຫົວ ພັດຖະຫຼົ່ມ​ປະ​ເທດ​ຟີ​ລິບ​ປິນ​ໃນແຕ່ລະ​ປີ. ບາງເຂດຂອງ​ປະ​ເທດດັ່ງກ່າວ ​ຍັງກຳລັງ​ຟື້ນຕົວຄືນ​ຈາກ​ໄຕ້​ຝຸ່ນ Haiyan ໃນ​ປີ​ແລ້ວ​ນີ້
ທີ່​ເຮັດໃຫ້ມີຜູ້ເສຍຊີວິດ ຫຼາຍກວ່າ 6,300 ຄົນ​ ຍ້ອນຟອງນ້ຳ​ທະເລທີ່ໃຫຍ່ ຄືກັນກັບ
ຄື້ນຟອງຊູ​ນາ​ມິນັ້ນ.

XS
SM
MD
LG