ຟີລິບປິນ ຮຽກຮ້ອງ ໃຫ້ພວກກະບົດ ມຸສລິມ ຍອມຈຳນົນ (ສະໄລດ໌)

ປະທານາທິບໍດີຟີລິບປິນ ທ່ານ Benigno Aquino ຮຽກຮ້ອງໃຫ້
ພວກກະບົດມຸສລິມ ທີ່ຍັງເຫລືອຢູ່ ໃນເມືອງ Zamboanga ທາງ
ພາກໃຕ້ຂອງປະເທດໃຫ້ທຳການຍອມຈຳນົນເພື່ອຫຼີກລ່ຽງຕໍ່ການ
ນອງເລືອດ.

ການຮຽກຮ້ອງຂອງທ່ານຕໍ່ພວກນັກລົບຂອງກຸ່ມກະບົດແນວໂຮມ
ປົດປ່ອຍຊາດ Moro ຫລື MNLF ມີຂຶ້ນ ໃນຂະນະທີ່ ການສູ້ລົບ ຮອບໃໝ່ເຮັດໃຫ້ພວກກະບົດ 8 ຄົນ ແລະທະຫານຄົນນຶ່ງເສຍຊີ
ວິດ. ມີຜູ້ເສຍຊີວິດໄປແລ້ວຫລາຍກວ່າ 100 ຄົນ ແລະອີກຫລາຍ
ກວ່າ 100,000 ຄົນ ຕ້ອງໄດ້ອົບພະຍົບຫຼົບໜີໄປຈາກເຮືອນຊານ
ບ້ານຊ່ອງຂອງພວກເຂົາເຈົ້າ.

ທ່ານ Aquino ທີ່ເວົ້າວ່າ ທ່ານຈະຢູ່ໃນເຂດດັ່ງກ່າວຈົນກວ່າວິກິດການສິ້ນສຸດລົງນັ້ນຍັງໄດ້ ປະກາດໃຫ້ເງິນຊ່ອຍເຫຼືອ 90 ລ້ານໂດລາເພື່ອເປັນກອງທຶນໃນການບູລະນະສ້າງສາເມືອງ Zamboanga.

ເຈົ້າໜ້າທີ່ກ່າວວ່າ ຊີວິດການເປັນຢູ່ເລີ້ມກັບຄືນເຂົ້າສູ່ສະພາບປົກກະຕິແລ້ວ ທັງໆທີ່ພວກ ທະຫານຍັງສືບຕໍ່ຕາມລ່າຫາໂຕພວກກະບົດມຸສລິມທີ່ບຸກໂຈມຕີເມືອງດັ່ງກ່າວໃນຕົ້ນເດືອນ
ນີ້.

ທຸລະກິດຫລາຍໆແຫ່ງ ຕະຫຼອດທັງທະນາຄານຕ່າງໆ ໃນເຂດໃຈກາງເມືອງ ເລີ້ມເປີດຄືນ ແລ້ວ ແລະໃນມື້ວັນພະຫັດວານນີ້ ສະໜາມບິນໃນເມືອງດັ່ງກ່າວກໍມີຖ້ຽວບິນໂດຍສານທຳ ອິດໄປລົງ ໃນໄລຍະຫຼາຍໆມື້.

ກຸ່ມກະບົດ MNLF ຮຽກຮ້ອງມາເປັນເວລາດົນນານແລ້ວເພື່ອຢາກໄດ້ສິດໃນການປົກຄອງ ຕົນເອງຫຼາຍຂຶ້ນຢູ່ໃນເຂດພາກໃຕ້ຂອງປະເທດທີ່ປະຊາຊົນສ່ວນໃຫຍ່ເປັນຊາວມຸສລິມນັ້ນ ບ່ອນທີ່ການກໍ່ກະບົດມາເປັນເວລາ 4 ທົດສະວັດເຮັດ ໃຫ້ມີຜູ້ເສຍຊີວິດໄປແລ້ວຢ່າງໜ້ອຍ 120,000 ຄົນ.