ບັນດາເຈົ້າໜ້າທີ່ໃນຟິລິບປີນ ໄດ້ເພີ້ມການເຕືອນໃຫ້ຢູ່ໃນລະດັບສູງຂຶ້ນສຳຫຼັບພູໄຟ
ທີ່ຍັງມີການເໜັງຕີງຢູ່ ຫຼັງຈາກພູໄຟດັ່ງກ່າວໄດ້ສົ່ງຂີ້ເທົ່າແລະກ້ອນຫີນ ຂຶ້ນສູ່ອາກາດ
ສູງຫຼາຍໆກິໂລແມັດ ໃນວັນຈັນວານນີ້.
ການລະເບີດຂະໜາດໃຫຍ່ຂອງພູໄຟມາຢອນ ໃນວັນຈັນວານນີ້ ແມ່ນເປັນການລະເບີດ
ທີ່ແຮງສຸດນັບຕັ້ງແຕ່ ພູໄຟທີ່ສູງ 2 ພັນ 462 ແມັດ ໄດ້ເລີ່ມສົ່ງລາວາຮ້ອນສີແດງພ້ອມທັງ
ຂີ້ເທົ່າ ແລະແກັສທີ່ມີຄວາມຮ້ອນແຮງຕະຫລອດກ້ອນຫີນຕ່າງໆ ຂຶ້ນສູ່ອາກາດເມື່ອເກືອບ
ສອງສັບປະດາຜ່ານມາແລ້ວນັ້ນ.
ສະຖາບັນສຶກສາພູໄຟຂອງຟິລິບປີນ ໄດ້ເພີ້ມການເຕືອນກ່ຽວກັບພູໄຟມາຢອນໃຫ້ສູງຂຶ້ນ
ສູ່ລະດັບ 4 ຂອງຂອງການວັດແທກ ທີມີທັງໝົດ 5 ລະດັບ ທີ່ເປັນຂີດໝາຍຂອງໄພ
ອັນຕະລາຍ ໃນການລະເບີດຂອງພູໄຟໜ່ວຍນີ້. ສະຖາບັນດັ່ງກ່າວຍັງຂະຫຍາຍເຂດ
ອັນຕະລາຍທີ່ຢູ່ອ້ອມແອ້ມພູມາຢອນອອກໄປອີກ ໃນລັດສະໝີ 8 ກິໂລແມັດ. ມີຜູ້ຄົນທີ່
ອາໄສຢູ່ໃນຂົງເຂດຈຳນວນຫຼາຍເຖິງ 40 ພັນຄົນ ໄດ້ຖືກບັງຄັບໃຫ້ຍົກຍ້າຍ ໄປຍັງບ່ອນ
ທີ່ປອດໄພ ໃນຂະນະທີ່ພູໄຟມາຢອນ ມີຄວາມບໍ່ທຸ່ນທ່ຽງເພີ້ມຂຶ້ນນັບມື້ນັ້ນ.
ພູໄຟມາຢອນ ຊຶ່ງຕັ້ງຢູ່ຫຼາຍກວ່າ 300 ກິໂລແມັດ ຫ່າງຈາກນະຄອນຫຼວງມະນີລາ
ແມ່ນ 1 ໃນພູໄຟ 22 ໜ່ວຍ ທີ່ຍັງມີການເໜັງຕີຢູ່. ພູໄຟມາຢອນ ໄດ້ລະເບີດຂຶ້ນຢ່າງນ້ອຍ
50 ຄັ້ງແລ້ວ ໃນຄວາມຊົງຈຳທີ່ມີການບັນທຶກໄວ້ ແລະຮ້າຍແຮງທີ່ສຸດແມ່ນໃນປີ 1814
ເວລາເມືອງແຄກຊາວາ ໄດ້ຖືກຖົມດ້ວຍຂີ້ຕົມຂອງພູໄຟ ແລະມີຜູ້ຄົນຫຼາຍກວ່າ 1 ພັນຄົນ
ໄດ້ເສຍຊີວິດ.
ປະເທດຟິລິບປີນ ແມ່ນຕັ້ງຢູ່ ເຂດວົງແຫວນໄຟ ຫຼື “Ring of Fire,” ຊຶ່ງແມ່ນເສັ້ນ
ແຕກແຫງໃນເຂດມະຫາສະໝຸດປາຊິຟິກ ທີ່ມັກພາໃຫ້ເກີດແຜ່ນດິນໄຫວ ແລະພູໄຟ
ລະເບີດນັ້ນ.
