ເຈົ້າ​ຄອງ​ກຳ​ແພງ​ເມືອງນຶ່ງ ໃນຟິລິບປີນ​ ແລະພັນ​ລະ​ຍາ​ ຖືກສັງຫານ (ວີດີໂອ)

ບັນດາ​ເຈົ້າ​ໜ້າ​ທີ່​ໃນ​ນະຄອນຫຼວງ​ຟີ​ລິບ​ປິນ ກ່າວ​ວ່າ ​ເຈົ້າ​ຄອງ​
ກຳ​ແພງ​ນະຄອນ​ໃນ​ພາກ​ໃຕ້​ແຫ່ງ​ນຶ່ງ​ພ້ອມ​ທັງ​ພັນ​ລະ​ຍາ​ຂອງ​
ທ່ານ​ແລະ​ຄົນ​ອື່ນໆ​ອີກ 2 ຄົນ ​ໄດ້​ເສຍ​ຊີວິດ​ໃນ​ການ​ໂຈມ​ຕີ​ຢູ່​
ນອກ​ສະຖານີ​ຮັບ​ຄົນ​ໂດຍສານ​ທີ່​ສະໜາມ​ບິນ​ລະຫວ່າງ​ຊາດ​
ກຸງມາ​ນີລາ ​ແລະ​ຜູ້​ຄົນ​ຕື່ມ​ອີກ 4 ຄົນ​ໄດ້​ຮັບ​ບາດ​ເຈັບ.

ທ່ານ Angel Honrado ຜູ້​ຈັດການ​ສະໜາມ​ບິນ ກ່າວ​ຕໍ່​ບັນດາ​
ນັກ​ຂ່າວ​ວ່າ ຊາຍ 2 ຄົນຂີ່​ລົດຈັກ​ມາ​ໄດ້​ເປີດ​ສາກ​ຍິງ​ປືນ​ໃສ່​
ທ່ານ Ukol Talumpa ​ເຈົ້າ​ຄອງ​ກຳ​ແພງ​ນະຄອນ​ Labangan
​ໃນ​ແຂວງ Zamboanga del Sur. ທ່ານ Ukol Talumpa
ພ້ອມ​ດ້ວຍ​ພັນ​ລະ​ຍາ​ຖືກ​ຍິງ​ຕາຍ​ກັບ​ບ່ອນ ​ເວລາ​ພວກ​ທ່ານ​ຍ່າງ​
ອອກ​ມາຈາກ​ອາຄານຮອງຮັບ​ຄົນ​ໂດຍສານ ໃນ​ສະໜາມ​ບິນ​ນັ້ນ.

ຜູ້​ຄົນ​ອີກ 2 ຄົນ ​ຮວມທັງ​ເດັກ​ທາລົກ ​ໄດ້​ເສຍ​ຊີວິດໃນ​ທັນທີຈາກ​
ການ​ໂຈມຕີ​ດັ່ງກ່າວ.

ຕຳຫຼວດ​ກ່າວ​ວ່າ ພວກ​ມື​ປືນ 2 ຄົນ ​ທີ່​ບໍ່​ຮູ້​ວ່າ​ແມ່ນ​ໃຜ​ໄດ້ຫລົບໜີ​ໄປ ​ແລະກໍ​ບໍ່ຮູ້ຈັກ​ກ່ຽວ​ກັບເປົ້າ​ໝາຍ​ຂອງ​ການ​ໂຈມ​ຕີ​ຄັ້ງ​ນີ້.