ເຈົ້າໜ້າທີ່ຕຳຫລວດຟີລິບປິນໄດ້ຈັບກຸມຜູ້ຊາຍ 3 ຄົນທີ່ໄດ້
ວາງແຜນທຳການໂຈມຕີດ້ວຍລະເບີດ ຊຶ່ງປະກົດວ່າ ເປັນ
ການປະທ້ວງ ຕໍ່ອັນທີ່ພວກເຂົາເຈົ້າເຫັນວ່າ ເປັນທ່າທີ “ທີ່
ອ່ອນແອ” ຂອງມານີລາຕໍ່ຈີນນັ້ນ.
ລັດຖະມົນຕີກະຊວງຍຸຕິທຳຟີລິບປິນ ທ່ານນາງ Leila de
Lima ກ່າວວ່າ ພວກຜູ້ຊາຍຈຸດັ່ງກ່າວ ໄດ້ຖືກຈັບກຸມ ໃນ
ວັນຈັນວານນີ້ ພ້ອມກັບລົດຕູ້ທີ່ບັນທຸກລະເບີດຄັນນຶ່ງຢູ່
ເດີ່ນບິນສາກົນຂອງນະຄອນມານີລາຊຶ່ງເປັນນຶ່ງຂອງຈຳ
ນວນທັງໝົດ 4 ເປົ້າໝາຍ ທີ່ພວກຜູ້ຊາຍຈຸນີ້ ຈະທຳການ
ໂຈມຕີນັ້ນ.
ທ່ານນາງ de Lima ກ່າວວ່າ ພວກກ່ຽວ ຍັງໄດ້ວາງແຜນທີ່ຈະໂຈມຕີ ສະຖານທູດຈີນ
ພ້ອມກັນກັບ ກຸ່ມບໍລິສັດກໍ່ສ້າງ DMCI ແລະສູນການຄ້າ SM Mall of Asia ຊຶ່ງທັງ
ສອງແຫ່ງນີ້ ແມ່ນບໍລິຫານງານ ໂດຍ ບັນດານັກທຸລະກິດຊາວຟີລິບປິນເຊື້ອສາຍຈີນ.
ທ່ານນາງກ່າວອີກວ່າ ພວກຜູ້ຊາຍກຸ່ມນີ້ຍັງອ້າງວ່າ ເປັນສະມາຊິກກຸ່ມຂອງຕຳຫລວດ
ທະຫານ ແລະອື່ນໆ ທັງໃນປັດຈຸບັນແລະອະດີດ ທີ່ຕ້ອງການຈະ “ປົກປ້ອງ” ຟີລິບປິນ
ຈາກຈີນ ທີ່ພວມມີບັນຫາຂັດແຍ້ງໃນເລື່ອງເຂດນ້ຳແດນດິນ ກັບມະນີລາ.
ທ່ານນາງ de Lima ເວົ້າວ່າ “ພວກເຂົາເຈົ້າຕ້ອງການໃຫ້ລັດຖະບານນີ້ ເອົາທ່າທີ
ທີ່ແຂງຂັ້ນກວ່າເກົ່າ ໃນການຂັດແຍ້ງກັບຈີນ. ດັ່ງນັ້ນ ຈຶ່ງ ປະກົດວ່າເປັນກຸ່ມທີ່
ເຂົ້າໃຈຜິດ ແລະ ພວກເຂົາອ້າງວ່າ ເປັນ “ພວກທີ່ປົກປ້ອງພົນລະເມືອງຊາວ
ຟີລິບປິນ ແລະຖືຈີນວ່າ ເປັນຜູ້ມີອຳນາດທີ່ ເຮັດທຸລະກິດແບບຜູກຂາດ ແລະ
ທຳການຂຸດຄົ້ນບໍ່ແຮ່ ທີ່ຜິດກົດໝາຍ” ນັ້ນວ່າເປັນສັດຕູຂອງຕົນ.”
ຊື່ຂອງກຸ່ມດັ່ງກ່າວແມ່ນ USAFFE ທີ່ເປັນຕົວຫຍໍ້ຊຶ່ງໝາຍເຖິງອະດີດ ກຳລັງສະຫະລັດ
ໃນເຂດຕາເວັນອອກໄກ ທີ່ມີຖານປະຕິບັດງານຢູ່ມານີລາ ທີ່ໄດ້ສູ້ລົບໃນສົງຄາມໂລກຄັ້ງທີສອງ.
ທ່ານນາງ de Lima ກ່າວວ່າ ບັນດາເຈົ້າໜ້າທີ່ ກຳລັງສືບສວນສອບສວນກ່ຽວກັບ ຂະໜາດ ແລະຄວາມສາມາດຂອງກຸ່ມດັ່ງກ່າວນີ້. ທ່ານນາງກ່າວອີກວ່າ “ແນວທາງທີ່ແທ້ຈິງ” ຂອງກຸ່ມນີ້ ແມ່ນກຳລັງຖືກສືບ ສວນສອບສວນຢູ່ຄືກັນ ແຕ່ທ່ານນາງບໍ່ໄດ້ອະທິບາຍຕື່ມ.
