ຟີລິບປິນແຈ້ງໃຫ້ຊາບກ່ຽວກັບການເຕີບໂຕດ້ານເສດຖະກິດທີ່ແຂງແຮງທີ່ສຸດ ນັບແຕ່ການໂຄ່ນລົ້ມມື້ລາງປະທານາທິບໍດີ Ferdinand Marcos ເມື່ອ 24 ປີຜ່ານມາ.
ລັດຖະບານກ່າວໃນວັນຈັນມື້ນີ້ວ່າ ຜົນຜະລິດຮວມພາຍໃນປະເທດໄດ້ ຂະຫຍາຍໂຕອອກ 7.3 ສ່ວນຮ້ອຍໃນປີກາຍນີ້ ຊຶ່ງແມ່ນລື່ນໂຕເລກຄາດໝາຍ ຄື 5 ຫາ 6 ສ່ວນຮ້ອຍນັ້ນຕັ້ງຫລາຍ ແລະກ່າວຕື່ມວ່າ ຄວາມຄາດຫວັງສໍາລັບປີນີ້ ກໍຈະໜ້າຕື່ນເຕັ້ນເທົ່າໆກັນ.
ການເຕີບໂຕຢ່າງໃຫບ່ຂອງເສດຖະກິດຟີລິບປີນ ໄດ້ມີຂຶ້ນ ຫລັງຈາກການຂະຫຍາຍໂຕແຕ່ພຽງ 1.1 ສ່ວນຮ້ອຍໃນໄລຍະທີ່ເສດຖະກິດຂອງ ໂລກຕົກຕໍ່າຖອຍຫລັງ ໃນປີ 2009 ນັ້ນ. ບັນດາເຈົ້າໜ້າທີ່ກ່າວວ່າ ການເສດຖະກິດທີ່ດີຂຶ້ນນີ້ ແມ່ນເປັນຜົນສືບເນື່ອງມາຈາກການສົ່ງອອກ ທີ່ເພີ້ມທະວີຂຶ້ນ ການໃຊ້ຈ່າຍຢ່າງແຂງແຮງພາຍໃນປະເທດ ແລະການປັບປຸງໃນພາກສ່ວນການກະເສດໃຫ້ດີຂຶ້ນ ຫລັງຈາກປະເທດໄດ້ປະສົບກັບໄພແຫ້ງແລ້ງມາຊົ່ວໄລຍະນຶ່ງ.
ນອກນັ້ນ ພວກເຈົ້າໜ້າທີ່ຍັງກ່າວຍ້ອງຍໍພາບພົດໃນການລົງທຶນທີ່ດີຂຶ້ນຫລັງຈາກການເລືອກຕັ້ງປະທານາທິບໍດີ Benigno Aquino ໃນປີແລ້ວນີ້ ວ່າເປັນອີກສາເຫດນຶ່ງ ຊຶ່ງທ່ານ Aquino ໄດ້ໂຄສະນາຫາສຽງເລືອກຕັ້ງ ທີ່ມີນະໂຍບາຍຕໍ່ຕ້ານການສໍ້ລາດບັງຫລວງ. ພວກເຈົ້າໜ້າທີ່ຍັງກ່າວຕື່ມວ່າ ມັນເປັນອັດຕາການເຕີບໂຕຂຶ້ນໄວທີ່ສຸດນັບແຕ່ການປະຕິວັດຂອງອໍານາດປະຊາຊົນ ໄດ້ໂຄ່ນລົ້ມມື້ລາງປະທານາທິບໍດີ Marcos ອອກຈາກຕໍາແໜ່ງໄປໃນປີ 1986 ເປັນຕົ້ນມາ.
