ຟີລິບປິນກ່າວວ່າ ການປະຕິເສດຂອງຈີນທີ່ຈະຍື່ນສະເໜີການອ້າງກຳມະສິດໃນບໍລິເວນທີ່ມີ
ການຂັດແຍ້ງຢູ່ໃນເຂດທະເລຈີນໃຕ້ ຕໍ່ສານນາໆຊາດນັ້ນ ແມ່ນສະແດງໃຫ້ເຫັນເຖິງຈຸດອ່ອນ
ໃນການກ່າວອ້າງຂອງຈີນ.
ລັດຖະມົນຕີການຕ່າງປະເທດຟີລິບປິນທ່ານ Albert del Rosario ໄດ້ອອກຖະແຫຼງການ
ສະບັບນຶ່ງໃນວັນພຸດມື້ນີ້ເວົ້າວ່າ ການຕັດສິນໃຈດັ່ງກ່າວຂອງຈີນອາດຈະພາໃຫ້ເກີດມີຄວາມ
ສົງໃສກ່ຽວກັບຖືກຕ້ອງໃນການອ້າງກຳມະສິດຂອງຈີນ.
ທ່ານ del Rosario ໄດ້ທຳການສະເໜີໃນລະຫວ່າງທີ່ທ່ານເດີນທາງໄປຢ້ຽມຢາມກຸງປັກກິ່ງ
ໃນສັບປະດານີ້ວ່າ ປະເທດຕ່າງໆຄວນຍື່ນການອ້າງກຳມະສິດຂອງຕົນ ທີ່ຍາດແຍ່ງກັນກັບ
ປະເທດອື່ນໆ ຢູ່ໃນບໍລິເວນນ່ານນໍ້າ ໃກ້ໆໝູ່ເກາະ Spratly ນັ້ນ ໄປຍັງສານນາໆຊາດວ່າ
ດ້ວຍກົດໝາຍກ່ຽວກັບທະເລ ທີ່ໄດ້ຮັບການໜຸນຫຼັງໂດຍອົງການສະຫະປະຊາຊາດນັ້ນ.
ແຕ່ທີ່ກອງປະຊຸມຖະແຫຼງຂ່າວ ຢູ່ນະຄອນຫຼວງປັກກິ່ງ ໃນມື້ວັນອັງຄານວານນີ້ ໂຄສົກກະ
ຊວງການຕ່າງປະເທດຈີນທ່ານ Hong Lei ກ່າວວ່າ ຈີນຍັງສືບຕໍ່ເຊື່ອວ່າບັນຫາຂັດແຍ້ງ
ທີ່ວ່ານີ້ ຄວນຈະໄດ້ຮັບການແກ້ໄຂ ຜ່ານການເຈລະຈາໂດຍກົງ ລະຫວ່າງພັກຝ່າຍທີ່ກ່ຽວ
ຂ້ອງ.