ທ່ານ Benigno Aquino ປະທານາທິບໍດີຟີລິບປິນກ່າວວ່າ ລັດຖະບານຂອງທ່ານບໍ່ໄດ້ສົ່ງຜູ້ຕາງໜ້າໄປຮ່ວມພິທີມອບລາງວັນໂນແບລຂະແໜງສັນຕິພາບ ທີ່ນະຄອນອອສໂລ ປະເທດນໍເວນັ້ນ ກໍເພາະຢາກຊ່ອຍຊີວິດຊາວຟິລິບປິນ ຈໍານວນນຶ່ງ ທີ່ຢູ່ໃນບັນຊີຂອງພວກທີ່ຈະຖືກປະຫານຊີວິດໃນຈີນນັ້ນ.
ທ່ານອາກີໂນກ່າວເຊ່ນນີ້ ໃນການໃຫ້ສໍາພາດກັບໜັງສືພິມ Philippine Daily Inquirer ສະບັບອອກໃນວັນອາທິດມື້ນີ້ ຊຶ່ງທ່ານໄດ້ກ່າວຕື່ມວ່າ ການບໍ່ສົ່ງຜູ້ຕາງໜ້າຂອງຕົນໄປຮ່ວມພິທີມອບລາງວັນໂນແບລໃຫ້ທ່ານ Liu Xiaobo ຜູ້ຄັດຄ້ານລັດຖະບານຈີນ ທີ່ກໍາລັງຖືກຄຸກຢູ່ໃນເວລານີ້ ກໍບໍ່ໄດ້ໜາຍຄວາມວ່າ ຟີລິບປິນບໍ່ສະໜັບສະໜຸນ ຫລືສົ່ງເສີມປະຊາທິປະໄຕແລະສິດທິມະນຸດ.
ທ່ານອາກີໂນ ຍັງໄດ້ກ່າວອີກວ່າ ທ່ານໄດ້ສົ່ງສານສະບັບນຶ່ງໄປຍັງລັດຖະບານຈີນ ເພື່ອຮ້ອງຂໍໃຫ້ຜ່ອນຜັນໂທດໃຫ້ຊາວຟີລິບປິນ 5 ຄົນ ທີ່ຖືກຕັດສິນລົງໂທດປະຫານຊີວິດ ໃນຂໍ້ຫາລັກລອບຄ້າຢາເສບຕິດ ແລະທ່ານບໍ່ຢາກສ່ຽງ ຫລື ທໍາລາຍຄວາມພະຍາຍາມຂອງທ່ານເພື່ອຊ່ອຍກູ້ຊີວິດພວກຄົນຟີລິບປິນເຫລົ່ານີ້.
