ທີ່ປຶກສາດ້ານຄວາມໝັ້ນຄົງແຫ່ງຊາດຂອງຟີລິບປິນ ໄດ້ຮຽກຮ້ອງໃຫ້ຂັບໄລ່ບັນດານັກການທູດຈີນ ອອກ ໃນວັນສຸກມື້ນີ້ ກ່ຽວກັບການຮົ່ວໄຫລຂອງການສົນທະນາທາງໂທລະສັບ ກັບພົນເຮືອເອກຂອງຟີລິບປິນ ສົ່ງຜົນໃຫ້ຄວາມຂັດແຍ້ງອັນຂົມຂື່ນ ໃນທະເລຈີນໃຕ້ ມີຄວາມຮຸນແຮງຂຶ້ນຢ່າງຫຼວງຫຼາຍ, ອີງຕາມອົງການຂ່າວ ຣອຍເຕີສ໌.
ທ່ານ ເອດວາໂດ ອາໂນ (Eduardo Ano) ກ່າວໃນຖະແຫຼງການສະບັບນຶ່ງວ່າ ສະຖານທູດຈີນ ປະຈຳນະຄອນຫຼວງມະນີລາ ໄດ້ກຽມ "ການດຳເນີນການຊ້ຳແລ້ວຊ້ຳອີກ ໃນການມີສ່ວນຮ່ວມ ແລະການເຜີຍແຜ່ຂໍ້ມູນທີ່ບິດເບືອນ, ຜິດ ແລະບໍ່ຖືກຕ້ອງ," ໂດຍມີຈຸດປະສົງເພື່ອສ້າງຄວາມບໍ່ລົງລອຍກັນ, ຄວາມຂັດແຍ້ງ ແລະຄວາມແຕກແຍກ.
ທ່ານກ່າວວ່າ "ການກະທຳເຫຼົ່ານັ້ນ ບໍ່ຄວນຈະຖືກອະນຸຍາດໃຫ້ຜ່ານໄປ ໂດຍບໍ່ມີການລົງໂທດຢ່າງຈິງຈັງ."
ສະຖານທູດຈີນປະຈຳນະຄອນຫຼວງມະນີລາ ບໍ່ໄດ້ໃຫ້ຄຳຕອບໃນທັນທີ ຕໍ່ຄຳຮ້ອງຂໍຄວາມເຫັນກ່ຽວກັບການຮຽກຮ້ອງໃຫ້ຂັບໄລ່ນັກການທູດ. ຫ້ອງການຂອງປະທານາທິບໍດີຟີລິບປິນ ທ່ານ ເຟີດີນານ ມາໂກສ ຈູເນຍ (Ferdinand Marcos Jr.) ແລະ ກະຊວງການຕ່າງປະເທດບໍ່ໄດ້ໃຫ້ຄຳຕອບໃນທັນທີ ຕໍ່ການຮ້ອງຂໍຄວາມເຫັນ.
ທັງສອງປະເທດໄດ້ມີການປະທະກັນຢ່າງຮຸນແຮງຫຼາຍຄັ້ງ ໃນປີທີ່ຜ່ານມາ ຢູ່ໃນພື້ນທີ່ ທີ່ມີການຂັດແຍ້ງກັນຢູ່ໃນທະເລຈີນໃຕ້ ໃນຂະນະທີ່ຟີລິບປິນ ເຊິ່ງໄດ້ຮັບການສະໜັບສະໜູນຈາກສະຫະລັດ ແລະປະເທດພັນທະມິດອື່ນໆ, ກໍໄດ້ເພີ້ມການເຄື່ອນໄຫວຢູ່ເຂດນ່ານນ້ຳທີ່ຍຶດຄອງໂດຍທະຫານຍາມຝັ່ງຂະໜາດໃຫຍ່ຂອງຈີນ.
ຈີນໄດ້ກ່າວຫາຟີລິບປິນວ່າ ໄດ້ລ່ວງລ້ຳ ແລະຫັກຫຼັງ, ໃນຂະນະທີ່ ມານີລາ ໄດ້ຕຳໜິປັກກິ່ງ ໃນອັນທີ່ຕົນເວົ້າວ່າ ເປັນນະໂຍບາຍຮຸກຮານ ແລະການຫຼອກລວງທີ່ເປັນອັນຕະລາຍ ຢູ່ໃນເຂດເສດຖະກິດສະເພາະຂອງຕົນ.
ການຂັບໄລ່ນັກການທູດອອກ ອາດຈະເພີ່ມທະວີຄວາມຮຸນແຮງຂອງຄວາມຂັດແຍ້ງ ທີ່ເຄີຍໄດ້ຖືກພົບເຫັນວ່າມີການແລກປ່ຽນກັນໄປມາຢ່າງຮ້ອນແຮງ, ການປະທ້ວງທາງການທູດ ແລະການແລ່ນຕໍ່າ ແລະ ການສີດນໍ້າໃສ່ດ້ວຍທໍ່ນໍ້າຂະໜາດໃຫຍ່ໃສ່ເຮືອຂອງຟີລິບປິນ ຢູ່ທີ່ບໍລິເວນສັນດອນສອງແຫ່ງທີ່ມີການຂັດແຍ້ງກັນ, ເຊິ່ງຈຸດທີ່ໃກ້ທີ່ສຸດແມ່ນຢູ່ຫ່າງຈາກຈີນແຜ່ນດິນໃຫຍ່ຫຼາຍກວ່າ 850 ກິໂລແມັດ ຫຼື 530 ໄມລ໌.
ຟໍຣັມສະແດງຄວາມຄິດເຫັນ