ທ່ານ Benigno Aquino ປະທານາທິບໍດີຟິລິບປິນ ໄດ້ເຊັນອະນຸມັດໃຫ້ເປັນກົດໝາຍ ຮ່າງງົບປະມານສະບັບທໍາອິດ ຂອງລັດຖະບານຊຸດໃໝ່ຂອງທ່ານ ຊຶ່ງມີໂຮມທັງຂໍ້ກໍານົດໃຫ້
ໂອນເງິນສົດ ໄປໃຫ້ພວກປະຊາຊົນທີ່ຍາກຈົນທີ່ສຸດຈໍານວນນຶ່ງຂອງປະເທດ.
ງົບປະມານດັ່ງກ່າວ ຊຶ່ງມີມູນຄ່າ 37 ພັນ 300 ລ້ານໂດລາ ໄດ້ຜ່ານສະພາຄອງແກຣສ
ຂອງຟິລິບປິນໃນຕົ້ນເດືອນນີ້ ໂດຍບໍ່ມີການປ່ຽນແປງຫຍັງຫລາຍ ຊຶ່ງນັບເປັນຄັ້ງທໍາອິດ
ໃນຮອບ 11 ປີ ທີ່ງົບປະມານຫລວງຂອງຟິລິບປິນໄດ້ຮັບການອະນຸມັດ ກ່ອນເລີ່ມປີສົກ ງົບປະມານນັ້ນ.
ໃນພິທີລົງນາມໃນມື້ວັນຈັນມື້ນີ້ ທ່ານອະກີໂນ ໄດ້ກ່າວຂອບໃຈພວກຜູ້ແທນ ສໍາລັບການ
ປະຕິບັດການທີ່ວ່ອງໄວຂອງພວກເຂົາເຈົ້າ ໂດຍກ່າວວ່າງົບປະມານຊຸດນີ້ ສະແດງໃຫ້ເຫັນ
ເຖິງຄວາມໝັ້ນໝາຍຂອງພວກເຮົາ ທີ່ຈະແກ້ໄຂບັນຫາຂອງປະຊາຊົນຂອງພວກເຮົາ ໃນ
ເວລາອັນໄວທີ່ສຸດ ແລະໃນການໃຫ້ຂໍ້ສັງເກດເຖິງການເພີ່ມຂື້ນຢ່າງຫລວງຫລາຍ ໃນການ
ໃຊ້ຈ່າຍສໍາລັບຕໍ່ຕ້ານຄວາມທຸກຈົນ ແລະສໍາລັບໂຄງການສັງຄົມຕ່າງໆນັ້ນ ທ່ານອະກີໂນ
ກ່າວວ່າ ງົບປະມານນີ້ແມ່ນບັນເທົາພາລະແບກຫາບ ໂດຍສະເພາະຂອງພວກກຸ່ມຄົນທີ່ ດ້ອຍໂອກາດທີ່ສຸດນັ້ນ.
