ປະຊາຊົນຟີລິບປິນ ພາກັນໄວ້ອາໄລໃນວັນອາທິດມື້ນີ້ ນໍາມື້ລາງປະທານາທິບໍດີ Corazon Aquino ທີ່ໄດ້ເປັນຜູ້ນໍາພາປະເທດອອກຈາກລະບອບຜະເດັດການເປັນເວລາ 20 ປີພາຍໃຕ້ການປົກຄອງຂອງມື້ລາງປະທາ ນາທິບໍດີ Ferdinand Marcos ໃນປີ 1986.
ປະທານາທິບໍດີ Benigno Aquino ໄດ້ນຳພາຄອບຄົວແລະເພື່ອນມິດໃນການປະກອບພິທິພິເສດທາງສາສະໜາ ທີ່ສະດຸດີຄວາມເກ່ງກ້າສາມາດຂອງມື້ລາງມານດາຂອງທ່ານ ທີ່ ໄດ້ເຖິງແກ່ມໍລະນະກໍາໄປເມື່ອ 1 ປີຜ່ານມາພໍດີ ຍ້ອນໂຣກມະເຮັງໃນລຳໄສ້ໃຫຍ່. ທ່ານອະກິໂນຮຽກຮ້ອງໃຫ້ປະຊາຊົນຟີລິບປິນ ພາກັນສືບຕໍ່ການຕໍ່ສູ້ເພື່ອປະຊາທິປະໄຕຂອງມື້ລາງມານດາຂອງທ່ານຕໍ່ໄປ ໂດຍການຊ່ອຍເຫລືອທ່ານໃນການຕໍ່ສູ້ກັບຄວາມທຸກຈົນແລະການສໍ້ລາດບັງຫລວງທີ່ມີຢ່າງແຜ່ຫລາຍນັ້ນ.
ໃນວັນສຸກຜ່ານມານີ້ ທ່ານອະກິໂນໄດ້ອອກຄໍາສັ່ງຢ່າງເປັນທາງການ ໃຫ້ຈັດຕັ້ງຄະນະກໍາມາທິການຊອກຫາຂໍ້ມູນຄວາມຈິງຂຶ້ນມາ ເພື່ອທໍາການສືບສວນເບິ່ງການກ່າວຫາກ່ຽວກັບການສໍ້ລາດບັງຫລວງ ພາຍໃຕ້ການປົກຄອງຂອງອະດີດປະທານາທິບໍດີ Gloria Arroyo.
ທ່ານອະກິໂນ ທີ່ໄດ້ຂຶ້ນດໍາລົງຕໍາແໜ່ງປະທານາທິບໍດີໃນວັນທີ 30 ເດືອນມິຖຸນາຜ່ານມາ ໄດ້ໃຫ້ຄໍາໝັ້ນສັນຍາວ່າຈະຖົມຂຸມງົບປະມານທີ່ເລິກໆຂອງປະເທດ ຈະຕໍ່ສູ້ກັບການສໍ້ລາດບັງຫລວງ ຄວາມທຸກຈົນ ແລະການກໍ່ການກະບົດທີ່ມີມາເປັນເວລາດົນນານ ໂດຍສອງກຸ່ມ ກະບົດ ຄື ພວກຄອມມີວນິດກັບພວກມູສລິມນັ້ນ.