ສະມາຊິກສະພາສູງຂອງຟີລິບປິນທ່ານນຶ່ງ ໄດ້ປະຕິຍານວ່າ ຈະສືບຕໍ່ທຳການສືບສວນ ຢ່າງເປັນທາງການ ກ່ຽວກັບການປຸກລະດົມຕໍ່ຕ້ານຄ້າຢາເສບຕິດ ທີ່ກໍ່ໃຫ້ເກີດຄວາມ ບໍ່ສະຫງົບ ຂອງປະທານາທິບໍດີ Rodrigo Duterte ເຖິງແມ່ນວ່າ ທ່ານໄດ້ກ່າວຫາ ແລະຂົ່ມຂູ່ຕໍ່ທ່ານນາງກໍຕາມ.
ທ່ານນາງ Leila de Lima ສະມາຊິກສະພາສູງ ໄດ້ເອີ້ນ ການໂຈມຕີຂອງທ່ານ Duterte ນັ້ນ ວ່າ “ເປັນການໃຊ້ອຳນາດບໍລິຫານ ເກີນຂອບເຂດ ແລະໃນທາງທີ່ບໍ່ຖືກຕ້ອງ” ໃນລະຫວ່າງການກ່າວຄຳປາໄສ ເລີ້ມການສືບສວນຂອງທ່ານນາງ ໃນວັນພະຫັດມື້ນີ້ ຢູ່ທີ່ນະຄອນຫຼວງ ມະນີລາ. ທ່ານນາງ de Lima ໄດ້ລິເລີ້ມການສືບສວນ ຂອງສະພາ ກ່ຽວກັບການຄາດຕະກຳ ພວກທີ່ຖືກສົງໄສວ່າລັກລອບຄ້າຢາເສບຕິດ ຢ່າງນ້ອຍ 1,000 ຄົນ ນັບຕັ້ງແຕ່ ທ່ານ Duterte ໄດ້ເຂົ້າຮັບຕຳແໜ່ງ ໃນເດືອນມິຖຸນາ ເປັນຕົ້ນມາ ໂດຍ ທີ່ທ່ານໄດ້ຊະນະການເລືອກຕັ້ງ ດ້ວຍການໃຫ້ຄຳສັນຍາ ວ່າ ຈະກວດລ້າງພວກຄ້າ ຢາເສບຕິດທີ່ຜິດກົດໝາຍ ແລະ ພວກອາຊະຍາກອນ ອອກໄປຈາກປະເທດເກາະ ດອນແຫ່ງນີ້.
ສະມາຊິກສະພາສູງທ່ານນີ້ ເວົ້າວ່າ ການກ່າວຫາຂອງທ່ານ Duterte ຊຶ່ງມີຂຶ້ນ ໃນລະ ຫວ່າງ ການກ່າວຄຳປາໄສ ເມື່ອວັນພຸດວານນີ້ ຊຶ່ງເປັນຂີດໝາຍວັນຄົບຮອບ 115 ປີ ໃນການສ້າງຕັ້ງ ກຳລັງຕຳຫຼວດຂອງປະເທດ ທີ່ໄດ້ເຮັດໃຫ້ທ່ານນາງ ທົບທວນເບິ່ງ ຈຸດຢືນຂອງທ່ານນາງ ຄືນໃໝ່. ທ່ານນາງ ໄດ້ກ່າວວ່າ “ມັນເປັນທີ່ຈະແຈ້ງແລ້ວວ່າ ສິ່ງທີ່ໄດ້ເຮັດຕໍ່ຂ້າພະເຈົ້ານັ້ນ ແມ່ນເປັນສິ່ງທີ່ຈະເກີດຂຶ້ນຕໍ່ຜູ້ໃດຜູ້ໜຶ່ງ ທີ່ບໍ່ປະຕິ ບັດຕາມ ຄວາມປະສົງຂອງປະທານາທິບໍດີ.”
ປະທານາທິບໍດີ Duterte ຍັງໄດ້ກ່າວຫາອົງການສະຫະປະຊາຊາດ ຢູ່ໃນຄຳປາໄສ ຂອງທ່ານ ເມື່ອວັນພຸດວານນີ້ ໂດຍເວົ້າວ່າ ອົງການໂລກ ດັ່ງກ່າວ ໄດ້ຕັ້ງ “ຂໍ້ສະເໜີ ທີ່ໂງ່ຈ້າທີ່ສຸດ” ໃນການຕຳໜິ ຄວາມພະຍາ ຍາມຂອງຂ້າພະເຈົ້າ. ເລຂາທິການໃຫຍ່ ອົງການສະຫະປະຊາຊາດ ທ່ານ Ban Ki-moon ໄດ້ປະນາມ ການສັງຫານແບບຮວບ ຮັດຕັດຕອນ ຂອງທ່ານ Duterte ໂດຍເອີ້ນມັນວ່າ “ເປັນການລະເມີດຕໍ່ສິດ ທິພື້ນຖານ ແລະອິດສະຫຼະພາບ ຂອງມະນຸດ.”
