ກຸ່ມຟີລິບປິນທີ່ນຳພາພາລະກິດການສະໜອງສະບຽງຂອງພົນລະເຮືອນ ໃນທະເລຈີນໃຕ້ ໄດ້ສົ່ງອາຫານ ແລະ ນໍ້າມັນເຊື້ອໄຟ ໃຫ້ຊາວປະມົງຟິລິບປິນ ເຖິງແມ່ນວ່າ ຈະຖືກຕິດຕາມໂດຍເຮືອກຳປັ່ນຂອງຈີນ ກໍຕາມ, ເຈົ້າໜ້າທີ່ຂອງກຸ່ມ ກ່າວໃນວັນພະຫັດມື້ນີ້ ໂດຍເອີ້ນການດຳເນີນການນີ້ວ່າ ເປັນໄຊຊະນະທີ່ສຳຄັນ, ອີງຕາມອົງການຂ່າວ ຣອຍເຕີສ໌.
ກຸ່ມນີ້ທີ່ເອີ້ນວ່າ ອາຕິນ ອິໂຕ (Atin Ito) (ນີ້ແມ່ນຂອງພວກເຮົາ) ໄດ້ກ່າວວ່າທີມງານທີ່ມີສະມາຊິກ 10 ຄົນ ໄດ້ພາຍເຮືອໄປທີ່ ເກາະຫາດຊາຍ ສກາໂບໂຣ (Scarborough Shoal) ນຶ່ງມື້ກ່ອນເຮືອຂອງພົນລະເຮືອນ ທີ່ລວມມີເຮືອການຄ້າ 5 ລໍາ ແລະເຮືອຫາປາຂະໜາດນ້ອຍ 100 ລໍາ, ໄດ້ເລີ່ມຕົ້ນການເດີນທາງຂອງຕົນ.
"ພາລະກິດນີ້ ໄດ້ຮັບໄຊຊະນະຄັ້ງສໍາຄັນ ໃນເວລາທີ່ທີມງານທີ່ເດີນທາງໄປກ່ອນຂອງຕົນ ໄດ້ໄປເຖິງບໍລິເວນເກາະຫາດຊາຍ ປານາຕັກ (Panatag Shoal) ໃນວັນທີ 15 ພຶດສະພາ (ແລະ) ສາມາດດຳເນີນການສະຫນອງເຄື່ອງໃຫ້ກັບຄົນຫາປາ ໃນເຂດດັ່ງກ່າວ", ທ່ານ ເອັມມານ ຮິຊອນ (Emman Hizon), ໂຄສົກຂອງກຸ່ມ ອາຕິນ ອິໂຕ (Atin Ito) ກ່າວ ໂດຍໃຊ້ຊື່ທ້ອງຖິ່ນຂອງ ສກາໂບໂຣ.
ເກາະຫາດຊາຍ ສກາໂບໂຣ (Scarborough Shoal) ຕັ້ງຢູ່ພາຍໃນເຂດເສດຖະກິດສະເພາະ ທີ່ຕັ້ງຢູ່ 200 ໄມທະເລ ຫຼື 370 ກິໂລແມັດ ຈາກມະນິລາ ເຊິ່ງເປັນແຫລ່ງຂອງປາທີ່ອຸດົມສົມບູນ ແລະ ທະເລສາບສີຟ້າຂຽວ ເຊິ່ງເປັນບ່ອນລີ້ໄພ ສໍາລັບເຮືອໃນເວລາທີ່ເກີດພາຍຸ.
ຈີນກ່າວໃນວັນພຸດວານນີ້ວ່າ ຕົນມີອຳນາດອະທິປະໄຕເໜືອເຂດສັນດອນ ຊຶ່ງເອີ້ນວ່າ ເກາະ ຫວງຢານ (Huangyan) ແລະເຂດນ່ານນ້ຳທີ່ຢູ່ໃກ້ຄຽງ. ໃນວັນພຸດວານນີ້, ສະຖານີໂທລະພາບ CCTV ຂອງລັດຖະບານຈີນ ກ່າວວ່າ ໜ່ວຍຍາມຝັ່ງຂອງຈີນ ໄດ້ດຳເນີນການເຄື່ອນໄຫວເພື່ອປົກປ້ອງສິດ ແລະກິດຈະກຳການບັງຄັບໃຊ້ກົດໝາຍ ໃນເຂດນ່ານນ້ຳອ້ອມບໍລິເວນເກາະຫາດຊາຍດັ່ງກ່າວ ເປັນປະຈຳ.
ຟໍຣັມສະແດງຄວາມຄິດເຫັນ