ມີຫຼາກຫຼາຍວິທີທີ່ຜູ້ໃຫຍ່ຊາວອາເມຣິກັນເຊື້ອສາຍເອເຊຍມີຄວາມຮູ້ສຶກກ່ຽວກັບການເປັນຕົວຕົນຂອງເຂົາເຈົ້າ ອີງຕາມການຄົ້ນພົບຂອງບົດລາຍງານສະບັບໃຫມ່ ໂດຍທີ່ມີປະມານເຄິ່ງນຶ່ງເວົ້າວ່າ ພວກເຂົາເຈົ້າມັກເວົ້າເຖິງຕົນເອງໂດຍການບອກໃຫ້ຮູ້ຈັກເຖິງຊົນເຜົ່າທີ່ສະທ້ອນເຖິງເຊື້ອສາຍທີ່ມາຂອງພວກເຂົາເຈົ້າ ແລະ ສ່ວນອີກເຄິ່ງນຶ່ງ ເວົ້າເຖິງຕົນເອງວ່າເປັນຄົນອາເມຣິກັນ.
ການສຶກສາທີ່ເປີດເຜີຍອອກມາໃນວັນຈັນວານນີ້ ໂດຍສູນກາງຄົ້ນຄວ້າພີວ (Pew), ຍັງພົບອີກວ່າ 90 ເປີເຊັນຂອງຊາວເອເຊຍທີ່ອາໄສຢູ່ໃນສະຫະລັດ ມີຫລາຍວັດທະນະທໍາທີ່ແຕກຕ່າງກັນ. ໃນບັນດາຜູ້ໃຫຍ່ທັງໝົດຢູ່ສະຫະລັດ, 80 ເປີເຊັນ ກ່າວວ່າ ຊາວເອເຊຍຢູ່ໃນປະເທດນີ້ ມີວັດທະນະທຳຫລາຍຢ່າງທີ່ແຕກຕ່າງກັນ.
ການສຶກສາດັ່ງກ່າວເປັນສ່ວນນຶ່ງຂອງຄວາມພະຍາຍາມມາໄດ້ຫຼາຍປີຂອງສູນກາງຄົ້ນຄວ້າພີວ (Pew) ເພື່ອເຂົ້າໃຈເຖິງທັດສະນະ ແລະຄວາມຄິດເຫັນຂອງຊາວອາເມ ຣິກັນເຊື້ອສາຍເອເຊຍ. ພວກນັກຄົ້ນຄວ້າ ໄດ້ສຳຫຼວດຜູ້ໃຫຍ່ເຊື້ອສາຍເອເຊຍ 7,006 ຄົນ ໃນເດືອນກໍລະກົດ 2022 ຫາເດືອນມັງກອນຂອງປີນີ້ ຊຶ່ງເຮັດໃຫ້ມັນກາຍເປັນການສຳຫຼວດທີ່ມີຕົວແທນໃຫຍ່ທີ່ສຸດຢູ່ທົ່ວປະເທດ ໃນປັດຈຸບັນ.
"ການເຮັດການສໍາຫຼວດນີ້ ແມ່ນມີຄວາມສໍາຄັນຫຼາຍ ເພາະວ່າໃນອຸດສາຫະກໍາການ ຢັ່ງຫາງສຽງ ແລະອຸດສາຫະກໍາຢັ່ງຄວາມຄິດເຫັນຂອງສາທາລະນະຊົນ ໂດຍທົ່ວໄປແລ້ວ ທ່ານຈະເຫັນໄດ້ຫນ້ອຍທີ່ສຸດ ກ່ຽວກັບຊາວອາເມຣິກັນເຊື້ອສາຍເອເຊຍ," ນັ້ນຄືຄຳເວົ້າຂອງທ່ານນີລ ຣູອີສ (Neil Ruiz), ຫົວຫນ້າໂຄງການລິເລີ້ມການຄົ້ນຄວ້າ ໃຫມ່ຂອງສູນກາງພີວ.
ມີອາເມຣິກັນເຊື້ອສາຍເອເຊຍ ປະມານ 24 ລ້ານຄົນຢູ່ໃນສະຫະລັດ, ເຊິ່ງກວມເອົາປະມານ 6 ເປີເຊັນຂອງປະຊາ ກອນສະຫະລັດ, ແຕ່ການຢັ່ງຫາງສຽງປະຊາຊົນໃນປະຫວັດສາດຜ່ານມາ ແມ່ນໃຫ້ຄວາມສົນໃຈຕໍ່ປະຊາຄົມນີ້ຫນ້ອຍຫຼາຍ, ອີງຕາມທ່ານຣູອີສ. ທ່ານກ່າວຕໍ່ວີໂອເອວ່າ ສູນກາງພີວຢາກ "ເຂົ້າໃຈຢ່າງແທ້ຈິງເຖິງຄວາມຫລາກຫລາຍໃນຄວາມຄິດເຫັນຂອງຊາວອາເມຣິກັນເຊື້ອສາຍເອເຊຍ."
ອ່ານຂ່າວນີ້ເພີ້ມເປັນພາສາອັງກິດ
