ໃນຊ່ວງໄລຍະເວລານຶ່ງປີຜ່ານມານີ້ ທ່ານ Bernie Sanders ໄດ້ມີຄະແນນເພີ້ມຂຶ້ນ ໃນການຢັ່ງຫາງສຽງ ຈາກຫລຸດຢູ່ 40 ເປີເຊັນ ມາເປັນເກືອບພໍໆກັນ ກັບທ່ານນາງ Hillary Clinton ໃນຂະນະທີ່ພັກ Democrat ພວມກະກຽມຫ້າງຫາ ກ່ຽວກັບການປະກາດນະໂຍ ບາຍ ຕໍ່ກອງປະຊຸມໃຫຍ່ຂອງພັກ ໃນເດືອນກໍລະກົດທີ່ຈະມາເຖິງນີ້.
ນອກເໜືອໄປຈາກການແຕ່ງຕັ້ງຜູ້ຕາງໜ້າພັກໃນການລົງແຂ່ງຂັນເປັນປະທານາທິບໍດີ ຢ່າງ ເປັນທາງການ ໃນທຸກໆ 4 ປີ ແລ້ວ ພັກ Democrat ແລະຄູ່ແຂ່ງພັກ Republican ໃຊ້ກອງປະຊຸມໃຫຍ່ຂອງພັກນີ້ ໃນການນຳສະເໜີ ລາຍລະອຽດກ່ຽວກັບນະໂຍບາຍຂອງພັກ ແລະ ຈຸດໝາຍປາທີ່ພັກເຂົາເຈົ້າຈະນຳພາປະເທດຊາດໄປສູ່.
ຄະນະກຳມະການແຫ່ງຊາດຂອງພັກ Democrat ໄດ້ປະກາດໃນວັນຈັນວານນີ້ວ່າ ຄະນະກຳມະການຮ່າງນະໂຍບາຍຂອງພັກ ແມ່ນຈະຮວມທັງ ຕົວແທນ 5 ທ່ານທີ່ຖືກເລືອກໂດຍ ທ່ານ Sanders ແລະ 6 ທ່ານຈາກຝ່າຍທ່ານນາງ Clinton ແລະອີກ 4 ທ່ານຈາກການເລືອກຂອງທ່ານນາງ Debbie Wasserman Schultz ປະທານຄະນະກຳມະ ການແຫ່ງຊາດຂອງພັກ Democrat.
ທ່ານ Sanders ໄດ້ບອກກັບພວກນັກຂ່າວໃນວັນຈັນວານນີ້ ໂດຍໄດ້ເນັ້ນໜັກເຖິງຈຸດສຳ ຄັນໃນການໂຄສະນາຫາສຽງຂອງທ່ານວ່າ “ພວກເຮົາຈະມີີທ່າທີທີ່ເຂັ້ມແຂງ ໃນການຕໍ່ສູ້ທາງດ້ານເສດຖະກິດ ທີ່ຈະໃຫ້ຜົນປະໂຫຍດແກ່ຜູ້ຄົນຂອງພວກເຮົາທຸກຄົນ.”
ນັກການເມືອງທີ່ຂະໜານນາມຕົນເອງວ່າ ເປັນນັກສັງຄົມນິຍົມຂອງພັກເດໂມແຄຣັດໄດ້ມີຜູ້ຕິດຕາມຢ່າງໃຫຍ່ຫຼວງ ໂດຍສະເພາະພວກຊາວໜຸ່ມ ໃນຂະນະທີ່ທ່ານໂຄສະນາຫາສຽງໃນຂໍ້ຄວາມທີ່ວ່າ ສະໜັບສະໜຸນຄວາມສະເໝີພາບທາງດ້ານເສດຖະກິດ ຄ້ຳປະກັນໃຫ້ຄ່າຮຽນຕໍ່ຂັ້ນສູງທີ່ສາມາດຈ່າຍໄດ້ ກຳຈັດອິດທິພົນຂອງກຸ່ມຜົນປະໂຫຍດ ຈາກວົງການເມືອງ ແລະຂະຫຍາຍການໃຫ້ບໍລິການທາງດ້ານສັງຄົມເພີ້ມຂຶ້ນ.
ທ່ານ Sanders ຍ້ອນຄື້ນຟອງການສະໜັບສະໜຸນທີ່ວ່ານີ້ ຈຶ່ງເຮັດໃຫ້ທ່ານໄດ້ຊະນະການແຂ່ງຂັນເລືອກຕັ້ງຂັ້ນຕົ້ນຢູ່ໃນ 20 ລັດ ພ້ອມດຽວກັນນີ້ ທາງທ່ານນາງ Clinton ແລະຈາກພັກ Republican ຊຶ່ງຄາດວ່າຈະແມ່ນທ່ານ Donald Trump ຈະເປັນຜູ້ຕາງໜ້າຂອງພັກນັ້ນ ຄື 1 ໃນ 3 ຂອງຜູ້ສະໝັກຄົນສຳຄັນ ທີ່ຍັງທຳການແຂ່ງຂັນ ໃນການເລືອກຕັ້ງຄັ້ງນີ້ຢູ່ ເພື່ອຈະໄດ້ຊະນະ ໃນການເປັນປະທານາທິບໍດີຄົນຕໍ່ໄປ ຫຼັງຈາກໝົດສະໄໝການດຳລົງຕຳແໜ່ງຂອງທ່ານ Barack Obama ໃນເດືອນມັງກອນປີໜ້ານີ້.
