ການພະຍາຍາມລອບສັງຫານອະດີດປະທານາທິບໍດີ ດໍໂນລ ທຣຳ ໄດ້ສ້າງຄວາມຕົກໃຈໄປທົ່ວໂລກ ຈົນກໍ່ໃຫ້ມີການສະແດງປະຕິກິລິຍາຢ່າງຫຼວງຫຼາຍຕໍ່ເຫດການດັ່ງກ່າວ. ເຊິ່ງປະທານາທິບໍດີ ສະຫະລັດ ທີ່ດຳລົງຕຳແໜ່ງຢູ່ໃນປັດຈຸບັນກໍໄດ້ອອກມາກ່າວປະນາມການໃຊ້ຄວາມຮຸນແຮງຕໍ່ບັນດານັກການເມືອງ ໂດຍສະເພາະແມ່ນການລອບສັງຫານ ທ່ານ ດໍໂນລ ທຣຳ.
ທ່ານ ໄບເດັນ ໄດ້ກ່າວໃນຄຳປາໄສຂອງທ່ານວ່າ ຄວາມຮຸນແຮງແມ່ນບໍ່ມີບ່ອນຢູ່ໃນ ສະຫະລັດ ອາເມຣິກາ. ແລະວ່າເຖິງແມ່ນຈະມີການບໍ່ເຫັນພ້ອມກັນ ກ່ຽວກັບ ຜູ້ລົງແຂ່ງຂັນເອົາຕຳແໜ່ງປະທານາທິບໍດີ ກໍບໍ່ໄດ້ໝາຍຄວາມວ່າພວກເຮົາແມ່ນສັດຕູກັນ. ນອກຈາກນັ້ນບັນດາຜູ້ນຳຢູ່ຕ່າງປະເທດ ໂດຍສະເພາະ ອັງກິດ, ຍີ່ປຸ່ນ, ຣັດເຊຍ ແລະ ອື່ນໆກໍໄດ້ອອກມາປະນາມເຫດການດັ່ງກ່າວເຊັ່ນກັນ.
ສ່ວນຄົນລາວ ອາເມຣິກັນ ຜູ້ທີ່ມີສິດລົງຄະແນນສຽງໃນການເລືອກຕັ້ງ ສະຫະລັດ ນັ້ນກ່າວວ່າມັນບໍ່ຖືກຕ້ອງກັບການທີ່ເຮົາຈະລອບສັງຫານ ອະດີດປະທານາທິບໍດີ ຫຼື ນັກການເມືອງທີ່ເຂົາເຈົ້າບໍ່ມີຄວາມເຫັນພ້ອມ.
ແມ່ຍິງລາວທີ່ອາໄສຢູ່ລັດຄາລິຟໍເນຍກ່າວວ່າ “ບໍ່ມີໃຜຄວນທີ່ວ່າຈະໄປຍິງອະດີດປະທານທິບໍດີ ບໍ່ວ່າເຂົາເຈົ້າຊິດີຫຼືຊົ່ວແນວໃດກໍຢ່າ. ບໍ່ມີໃຜຄວນທີ່ຈະໄປຍິງປະທານາທິບໍດີໃນການເມືອງ. ຂ້າພະເຈົ້າບໍ່ເຫັນພ້ອມກັບການລອບສັງຫານແມ່ນກະທັ້ງວ່າເຈົ້າຈະເປັນຄົນທີ່ຂີ້ຮ້າຍທີ່ສຸດກໍຕາມ ເຈົ້າຄວນທີ່ຈະເຄົາລົບເຂົາເຈົ້າຄືເກົ່າ. ຂ້າພະເຈົ້າເຫັນພ້ມຖ້າເຈົ້າບໍ່ມັກຄົນໃດຄົນນຶ່ງ ແລ້ວເຈົ້າຈະໄປຍິງເຂົາ. ມັນບໍ່ຖືກຕ້ອງ. ເຈົ້າຕ້ອງຄິດວ່າເຂົາເຈົ້າບໍ່ໄດ້ເຮັດຫຍັງດີ ນັ້ນກໍແລ້ວແຕ່ເຂົາເຈົ້າ. ເຈົ້າຕ້ອງຄິດ ກ່ຽວກັບ ໂຕຂອງເຈົ້າເອງ ແລະ ວິທີທີ່ເຈົ້າຈະໃຊ້ຊີວິດຂອງເຈົ້າ. ແຕ່ຂ້າພະເຈົ້າບໍ່ເຫັນດີກັບການໄປຍິງປະທານາທິບໍດີຄົນກ່ອນ. ແລະ ຂ້າພະເຈົ້າກໍໄດ້ເຫັນແມ່ນກະທັ້ງໃນຍີ່ປຸ່ນ ເຂົາເຈົ້າຍິງນາຍົກລັດຖະມົນຕີ ແລະ ລາວກໍໄດ້ເສຍຊີວິດ. ມັນຊົ່ວຫຼາຍ. ແຕ່ຂ້າພະເຈົ້າບໍ່ເຫັນດີຍ້ອນວ່າເຈົ້າບໍ່ມັກແນວຄິດທາງການເມືອງຂອງຄົນຜູ້ນຶ່ງແລ້ວເຈົ້າຊິໄປລອບສັງຫານເຂົາເຈົ້າ.”
ການພະຍາຍາມລອບສັງຫານທ່ານ ດໍໂນລ ທຣຳ ໄດ້ຊີ້ໃຫ້ເຫັນຈຸດອ່ອນຫຼາຍຢ່າງຂອງໜ່ວຍຕຳຫຼວດລັບ ແລະ ເຈົ້າໜ້າທີ່ຮັກສາຄວາມປອດໄພຂອງອະດີດປະທານາທິບໍດີ, ເຊິ່ງບໍ່ໄດ້ຄວບຄຸມພື້ນທີ່ຢ່າງເຂັ້ມງວດ ໂດຍບໍ່ໄດ້ຄຸ້ມກັນຕຶກຫຼັກນຶ່ງທີ່ມືປືນໄດ້ໃຊ້ເພື່ອປະຕິບັດການຍິງໃສ່ອະດີດປະທານາທິບໍດີ. ຕຶກດັ່ງກ່າວຕັ້ງຫ່າງຈາກຈຸດການຊຸມນຸມໂຄສະນາຫາສຽງພຽງ 150 ແມັດ, ເມື່ອພິຈາລະນາໄລຍະຫ່າງສຳລັບການຍິງປືນ ສໄນເປີ ແລ້ວແມ່ນບໍ່ໄປ. ຫຼາຍຄົນເຫັນວ່າຖ້າມືປືນຄົນດັງກ່າວຫາກເປັນນັກແມ້ນປືນມືອາຊີບ ທ່ານ ດໍໂນລ ທຣຳ ອາດຈະເສຍຊີວິດໄປແລ້ວ.
ຄົນລາວຈາກນະຄອນຫຼວງວຽງຈັນ ໄດ້ກ່າວເຖິງເຫດການນີ້ຕໍ່ພວກເຮົາວ່າ “ຄວາມຮູ້ສຶກແລກແມ່ນຕົກໃຈໃດ. ຄິດວ່າແມ່ນຂ່າວແທ້ຫຼືບໍ່ ເພາະວ່າມັນຄືໜັງເກີນໄປ. ແຕ່ວ່າຕິດຕາມເບິ່ງຫຼັງຈາກນັ້ນກະແມ່ນຂ່າວແທ້ອີຫຼີ. ຖ້າເອົາຕາມຄວາມຮູ້ສຶກຂອງຜູ້ກ່ຽວລະແມ່ນຢາກບອກວ່າ ທຣຳ ນີ້ຈະເປັນຜູ້ຊະນະໃນການເລືອກຕັ້ງຄັ້ງນີ້ເລີຍແຫຼະ. ເພາະຫຍັງ? ບໍ່ແມ່ນວ່າເກີດເລື່ອງນີ້ຂຶ້ນແລ້ວຈຶ່ງມາຕັດສິນໃດ ມາຄຶດວ່າລາວຈະເປັນຜູ້ຊະນະ ເບິ່ງໄດ້ຈາກຕັ້ງແຕ່ໂຕ້ວາທີກັນຄັ້ງແລ້ວນີ້ເນາະກັບທ່ານ ໄບເດັນ ຫັ້ນ. ທ່ານໄບເດັນນີ້ເບິ່ງຄືຊິບໍ່ໄຫວລະທາງດ້ານຮ່າງກາຍ ແລະ ຈິດໃຈເອງ. ສ່ວນ ທຣຳ ນີ້ຍັງມີໄຟ ລະກະຍັງມີຄວາມກະຫາຍເຕັມປ່ຽມ. ແລ້ວໂດຍສະເພາະເຫດການລອບຍິງໃນຄັ້ງນີ້ເນາະແຮງເປັນການຢືນຢັນເລີຍວ່າ ທຣຳ ນີ້ເປັນເຕັມນຶ່ງອີຫຼີທີ່ຈະໄດ້ເປັນປະທານາທິບໍດີຄົນໃໝ່. ຕອນທີ່ເບິ່ງຮູບວິດີໂອຕອນ ທຣຳ ຊູກຳປັ້ນຂຶ້ນ ບອກໄດ້ເລີຍວ່າມັນມີຜົນກະທົບ. ແລະທີ່ສຳຄັນແມ່ນສື່ເຖິງຕົວຕົນຂອງລາວໄດ້ເປັນຢ່າງດີເລີຍແຫຼະ. ມາດຕະການດ້ານຄວາມປອດໄພຍັງບໍ່ຄ່ອຍຮັດກຸມພໍປານໃດ ເພາະລອງຄຶດສະພາບວ່າຜູ້ກໍ່ເຫດເປັນມືອາຊີບຫຼາຍກວ່ານີ້ແລະກໍບໍ່ພາດນີ້ແມ່ນເຮົາຄືຊິໄດ້ເຫັນຂ່າວເສົ້າແລະເຫັນຂ່າວທີ່ສະເທືອນໃຈຫຼາຍເລີຍແຫຼະ.”
ຫຼັງຈາກເຫດການນີ້ປະຊາຊົນ ອາເມຣິກັນ ກໍໄດ້ພາກັນຫວັງວ່າເຫດການແບບນີ້ຈະບໍ່ເກີດຂຶ້ນອີກໃນອະນາຄົດ, ແຕ່ເຂົາເຈົ້າກໍບໍ່ໄດ້ມີຄວາມແນ່ໃຈ ຫຼື ຄິດໃນແງ່ບວກ ກ່ຽວກັບ ມັນ.
ຟໍຣັມສະແດງຄວາມຄິດເຫັນ