ລິ້ງ ສຳຫລັບເຂົ້າຫາ

logo-print

55 ຄົນ​ຖືກ​ຂ້າ​ຕາຍ ​ໃນ​ຄວາມ​ຮຸນ​ແຮງ ຢູ່​ພາກ​ເໜືອ​ຂອງ ໄນ​ຈີ​ເຣຍ


ແຜນ​ທີ່​ລັດ ຄາ​ດີ​ນາ, ປະ​ເທດ ໄນ​ຈີ​ເຣຍ

55 ຄົ​ນ​ໄດ້​ຖືກ​ຂ້າ​ຕາຍ ​ໃນ​ພາກ​ເໜືອ​ຂອງ​ປະ​ເທດ ໄນ​ຈີ​ເຣຍ ໃນ​ສັບ​ປະ​ດານີ້ ຫຼັງ​ຈາກ
ການປະທະກັນ ລະຫວ່າງ ຊາວໜຸ່ມຄຣິສຕຽນ ກັບ ມຸສລິມ, ບັນດາເຈົ້າໜ້າທີ່ໄດ້ຢືນຢັນ
ໃນວັນເສົາວານນີ້.

ການ​ຕໍ່​ສູ້​ກັນ​ ໃນ​ວັນ​ພະ​ຫັດ​ຜ່ານ​ມາ ​ໄດ້​ເລີ່ມ​ຂຶ້ນ ຫຼັງ​ຈາກ​ການ​ຂັດ​ແຍ້ງ​ກັນ ລະ​ຫວ່າງ
ຊາວໜຸ່ມມຸສລິມ ກັບ ຄຣິສຕຽນ ຢູ່ຕະຫຼາດແຫ່ງນຶ່ງ ໃນລັດ ຄາດູນາ, ອີງຕາມການກ່າວ
ຕໍ່ສື່ມວນຊົນ ໂດຍ ຜູ້ທີ່ອາໄສຢູ່ໃນທ້ອງຖິ່ນ

ໃນ​ຖະ​ແຫຼງ​ການ​ສະ​ບັບ​ນຶ່ງ​ ທີ່​ປະ​ກາດ​ໃນ​ວັນ​ເສົາ​ວານນີ້, ໂຄສົກ​ປະ​ທາ​ນາ​ທິ​ບໍ​ດີ ມູ​ຮຳ​
ມາດູ ບູຮາຣີ ກ່າວວ່າ ທ່ານປະທານາທິບໍດີ “ໄດ້ກ່າວປະນາມຄວາມຮຸນແຮງຄັ້ງຫຼ້າສຸດ
ນີ້ ໃນຊຸມຊົນຂອງເມືອງ ຄາຊູວານ ມາການີ, ລັດ ຄາດູນາ, ເຊິ່ງໄດ້ສັງຫານຊີວິດຂອງ
55 ຄົນ.”

ເຈົ້າ​ໜ້າ​ທີ່​ຕຳຫຼວ​ດ​ພິ​ເສດ​ຂອງ​ລັດ ຄາ​ດູ​ນາ ທ່ານ ອາ​ມັດ ອັບ​ດົວ-ຮາ​ມັນ ໄດ້​ກ່າວ​ໃນ​
ວັນສຸກຜ່ານມາວ່າ 22 ຄົນໄດ້ຖືກຈັບ ໃນການເຊື່ອມໂຍງກັບຄວາມຮຸນແຮງດັ່ງກ່າວ.

ປະ​ເທດ ໄນ​ຈີ​ເຣຍ ສ່ວນ​ໃຫຍ່ ​ແມ່ນ​ແບ່ງ​ແຍກ​ກັນ​ຕາມ​ສາຍ​ຂອງ​ສາ​ສະ​ໜາ ດ້ວຍ​ຊາວ​
ມຸສລິມ ທີ່ອາໄສຢູ່ພາກເໜືອ ແລະ ຊາວ ຄຣິສຕຽນ ອາໄສຢູ່ໃນພາກໃຕ້.

ໃນ​ຖະ​ແຫຼງ​ການ​ຂອງ​ທ່ານ​ນັ້ນ, ທ່ານ ບູ​ຮາ​ຣີ ໄດ້​ກ່າວ​ວ່າ ປະ​ຊາ​ຊົນ ໄນ​ຈີ​ເຣຍ ມັກ​ໃຊ້​
ຄວາມຮຸນແຮງ ເນື່ອງຈາກການເຂົ້າໃຈຜິດກັນຫຼາຍໂພດ.

ທ່ານ​ໄດ້​ເວົ້າ​ວ່າ “ບໍ່​ມີ​ວັດ​ທະ​ນະ​ທຳ ແລະ ສ​າ​ສະ​ໜາ​ໃດ​ທີ່​ສະ​ໜັບ​ສະ​ໜູນ​ການ​ບໍ່​ໃຫ້​
ຄວາມເຄົາລົບ ສຳລັບຄວາມສູງສົ່ງຂອງຊີວິດ, ການຢູ່ຮ່ວມກັນຢ່າງສັນຕິແມ່ນສິ່ງທີ່ມີ
ຄວາມຈຳເປັນ ສຳລັບຄວາມກ້າວໜ້າຂອງທຸກໆສັງຄົມ ແລະ ຄວາມຢູ່ດີເປັນສຸກຂອງ
ເຂົາເຈົ້າ.”

ທ່ານ​ໄດ້​ກ່າວ​ວ່າ “ຄວາມ​ຮຸ​ນ​ແຮງບໍ່​ສາ​ມາດ​ເປັນ​ທາງ​ເລືອກ​ອື່ນ​ ຕໍ່​ສັນ​ຕິ​ພາບ​ໄດ້. ໃນ​
ທາງກົງກັນຂ້າມ, ການອາໄສຄວາມຮຸນແຮງຈະນຳໄປສູ່ການທຳລາຍຕົນເອງໃນທີ່ສຸດ.
ຄວາມຮຸນແຮງແມ່ນລົມໄຂ້ປ່ວຍ ທີ່ບໍ່ໄດ້ພັດສິ່ງດີໆຫຍັງມາໃຫ້ແຕ່ລະຄົນ. ການຮັກສາ
ສັນຕິພາບແມ່ນສິ່ງທີ່ມີຄວາມຈຳເປັນ.”

ບັນ​ດາ​ເຈົ້າ​ໜ້າ​ທີ່​ລັດ ຄາ​ດູ​ນາ ​ໄດ້​ກ່າວ​ຕໍ່​ອົງ​ການ​ຂ່າວ ຝ​ຣັ່ງ ວ່າ​ການ​ປິດການສັນຈອນ
ຕະຫຼອດ 24 ຊົ່ວໂມງແມ່ນໄດ້ຖືກປະກາດໃຊ້ ໃນເມືອງ ຄາຊູວານ ມາການີ, ເຊິ່ງແມ່ນ
ສະຖານທີ່ເກີດເຫດຂອງຄວາມຮຸນແຮງດັ່ງກ່າວ.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ຄວາມເຫັນຂອງທ່ານ

ສະແດງຄວາມເຫັນໃຫ້ເບິ່ງ

ທ່ານອາດຈະມັກເລື້ອງນີ້ຄືກັນ

XS
SM
MD
LG