ທຳນຽບຫ້າແຈໄດ້ປະຕິເສດຢ່າງແຂງຂັນຕໍ່ການໃຫ້ຄວາມເຫັນຂອງປະທານາທິບໍດີເທີກີ ທີ່ວ່າ ກອງທັບສະຫະລັດ ເຂົ້າຂ້າງພວກທີ່ພະຍາຍາມເຮັດລັດຖະປະຫານແຕ່ປະສົບກັບຄວາມລົ້ມແຫຼວຢູ່ເທີກີ.
"ການສະເໜີແນະໃດໆກໍຕາມທີ່ວ່າບຸກຄົນຢູ່ໃນທຳນຽບຫ້າແຈໃຫ້ການສະໜັບສະໜຸນຕໍ່ການເຮັດລັດຖະປະຫານ ດ້ວຍວິທີໃດວິທີນຶ່ງ ນັ້ນແມ່ນເປັນເລື້ອງທີ່ໄຮ້ສາລະ" ນັ້ນຄືຄຳເວົ້າຂອງໂຄສົກທຳນຽບຫ້າແຈ ທ່ານ Peter Cook ກ່າວຕໍ່ພວກນັກຂ່າວໃນວັນສຸກວານ ນີ້.
ປະທານາທິບໍດີເທີກີ ທ່ານ Recep Tayyip Erdogan ໄດ້ຕ້ອງຕິນາຍພົນ Joseph Vo- tel ຂອງສະຫະລັດ ຫລັງຈາກນາຍພົນທ່ານນີ້ໄດ້ສະແດງຄວາມວິຕົກກັງວົນ ກ່ຽວກັບຜົນກະທົບໄລຍະຍາວ ຂອງການເຮັດລັດຖະປະຫານ ທີ່ມີຕໍ່ຄວາມສຳພັນຂອງສະຫະລັດກັບກອງທັບເທີກີ.
ທ່ານ Erdogan ກ່າວວ່າ "ທ່ານແມ່ນໃຜ ຈົ່ງຮູ້ຕຳແໜ່ງຂອງທ່ານ ທ່ານກຳລັງເຂົ້າຂ້າງພວກເຮັດລັດຖະປະຫານ ແທນທີ່ຈະຂອບອົກຂອບໃຈ ປະເທດນີ້ ທີ່ໄດ້ປາບປາມການພະຍາຍາມເຮັດລັດຖະປະຫານດັ່ງກ່າວ".
ນາຍພົນ Votel ແມ່ນຜູ້ບັນຊາການ Centcom ທີ່ກຳກັບນຳການປະຕິບັດງານທາງທະ ຫານຂອງສະຫະລັດໃນພາກຕາເວັນອອກກາງ. ນາຍພົນ Votel ໄດ້ອອກຖະແຫຼງການສະບັບນຶ່ງ ໃນວັນສຸກວານນີ້ ປະຕິເສດຕໍ່ລາຍງານຂ່າວໃດໆກໍຕາມ ທີ່ວ່າ ທ່ານມີສ່ວນພົວພັນ ໃນການພະຍາຍາມເຮັດລັດຖະປະຫານ ຢູ່ໃນເທີກີນັ້ນວ່າ ບໍ່ເປັນຈັ່ງບຸນແລະບໍ່ຖືກຕ້ອງຢ່າງແນ່ນອນ.
ທ່ານກ່າວວ່າ ເທີກີເປັນພາຄີພິເສດແລະມີຄວາມສຳຄັນຢູ່ໃນຂົງເຂດມາໄດ້ຫຼາຍປີແລ້ວ ພວກເຮົາຂໍຊົມເຊີຍຕໍ່ການສືບຕໍ່ ໃຫ້ຄວາມຮ່ວມມືຂອງເທີກີ ແລະຫວັງວ່າ ຈະໄດ້ເປັນຄູ່ຮ່ວມງານໃນອະນາຄົດເພື່ອສູ້ລົບຕໍ່ຕ້ານກັບກຸ່ມລັດອິສລາມຫຼື ISIL.
ລັດຖະມົນຕີກະຊວງປ້ອງກັນປະເທດສະຫະລັດ ທ່ານ Ash Carter ທີ່ໄດ້ໂອ້ລົມກັບຄູ່ຕຳແໜ່ງຝ່າຍເທີກີ ໂດຍທາງໂທລະສັບ ໃນສັບປະດາແລ້ວນີ້ ກ່າວວ່າ ລັດຖະມົນຕີປ້ອງກັນປະເທດເທີກີ ທ່ານ Fikri Isik ໄດ້ໃຫ້ການຢືນຢັນຕໍ່ຄວາມໝັ້ນໝາຍຂອງປະເທດທ່ານໃນການຕໍ່ສູ້ຕ້ານກຸ່ມລັດອິສລາມນັ້ນຈະດຳເນີນຕໍ່ໄປ ແບບບໍ່ມີການປ່ຽນແປງ.
