ມີຫຼາຍກວ່າ 20 ຄົນໄດ້ເຂົ້າໄປຮັບການຮັກສາດູແລຂັ້ນຕົ້ນເພື່ອ
ເປັນການປ້ອງກັນໄວ້ກ່ຽວກັບເຊື້ອ Anthrax ຫຼັງຈາກທີ່ທາງ
ກອງທັບສະຫະລັດ ໄດ້ເກີດຄວາມຜິດພາດສົ່ງຕົວຢ່າງແທ້ຂອງ
ເຊື້ອແບັກທີເຣຍທີ່ຮ້າຍແຮງດັ່ງກ່າວ ໄປໃຫ້ຫ້ອງແລັບຂອງ
ພົນລະເຮືອນ ຢູ່ໃນ 9 ລັດ ແລະຫ້ອງແລັບທະຫານແຫ່ງນຶ່ງ
ໃນເກົາຫຼີໃຕ້ນຳ.
ເຈົ້າໜ້າທີ່ ກ່າວວ່າ ພວກພະນັກງານຂອງ 4 ຫ້ອງແລັບ ໃນສະຫະລັດ ພ້ອມທັງເຈົ້າໜ້າທີ່ 22 ຄົນ ທີ່ຖານທັບອາກາດ Osan ນອກນະຄອນຫຼວງໂຊລ ອາດຈະຕິດເຊື້ອ Anthrax ທີ່ຖືກສົ່ງໄປຈາກຖານທັບທະຫານບົກ Dugway Proving Ground ໃນລັດ Utah ທາງພາກຕາເວັນຕົກຂອງສະຫະລັດ. ຫ້ອງແລັບທັງຫຼາຍແມ່ນຄວນຈະໄດ້ຮັບເຊື້ອ Anthrax ທີ່ ຕາຍແລ້ວ ຊຶ່ງເປັນສ່ວນນຶ່ງຂອງໂຄງການຂອງທຳນຽບຫ້າແຈ ເພື່ອພັດທະນາໃນການກວດສອບກ່ຽວ
ກັບການລະບຸໃນການຂົ່ມຂູ່ທາງດ້ານຊີວະວິທະຍາພາກສະໜາມ.
ບັນດາຫ້ອງແລັບຕ່າງໆ ທີ່ໄດ້ຮັບເຊື້ອ Anthrax ທີ່ຍັງມີຊີວິດຢູ່ນັ້ນ ແມ່ນຕັ້ງຢູ່ໃນລັດ California Tennessee, Delaware, Maryland, New Jersey, New York, Texas, Virginia ແລະ Wisconsin. ຫ້ອງແລັບທີ່ລັດ Maryland ໄດ້ເຕືອນພວກເຈົ້າໜ້າທີ່ກ່ຽວກັບເລື້ອງຕົວຢ່າງຂອງເຊື້ອແບັກທີເຣຍທີ່ຍັງມີຊີວິດ ທີ່ໄດ້ຮັບນັ້ນ ໃນສັບປະດາທີ່ຜ່ານມານີ້.
ໂຄສົກຂອງນຳນຽບຫ້າແຈ ທ່ານພັນເອກ Steven Warren ໄດ້ໃຫ້ການຄ້ຳປະກັນແກ່ຊາວອາເມຣິກັນທັງຫຼາຍວ່າ ມັນບໍ່ໄດ້ເປັນອັນຕະລາຍຮ້າຍແຮງ ແລະຍັງບໍ່ມີກໍລະນີທີ່ຕ້ອງສົງໄສ ຫຼືໄດ້ຮັບການຢືນຢັນກ່ຽວກັບການຕິດເຊື້ອດັ່ງກ່າວ ຂອງພວກພະນັກງານຫ້ອງແລັບ. ກອງທັບສະຫະລັດກ່າວວ່າ ຕົວຢ່າງຂອງເຊື້ອໄວ Anthrax ທີ່ຍັງມີຊີວິດ ທີ່ໄດ້ຖືກສົ່ງໄປຍັງຖານທັບອາກາດ Osan ນັ້ນ ໄດ້ຖືກທຳລາຍແລ້ວ.
