ກະຊວງປ້ອງກັນປະເທດ ສະຫະລັດ ໄດ້ກ່າວໃນວັນຈັນວານນີ້ ວ່າເຂົາເຈົ້າຈະໄດ້ຮັບການຄົ້ນພົບຕ່າງໆພາຍໃນ 45 ວັນ ຈາກການທົບທວນຂອງເຂົາເຈົ້າ ກ່ຽວກັບ ການຮົ່ວໄຫຼເອກະສານລັບເມື່ອບໍ່ດົນມານີ້, ໃນຂະນະທີ່ເຂົາເຈົ້າເລັ່ງທຳການປະເມີນຜົນຢ່າງວ່ອງໄວວ່າ ການຮົ່ວໄຫຼດັ່ງກ່າວນັ້ນ ໄດ້ເກີດຂຶ້ນແນວໃດ.
ໂຄສົກທຳນຽບຫ້າແຈ ທ່ານນາງ ຊາບຣີນາ ຊິງ ໄດ້ກ່າວຕໍ່ບັນດານັກຂ່າວເມື່ອວັນຈັນວານນີ້ວ່າ “ພວກເຮົາໄດ້ມາທີ່ນີ້ເພື່ອຊອກຫາຂໍ້ເທັດຈິງ ແລະ ວ່າການທົບທວນນີ້ຈະເຮັດຫຍັງ.”
ທ່ານນາງໄດ້ກ່າວວ່າກະຊວງ “ຈະສືບຕໍ່ເຮັດວຽກໝົດມື້ໝົດຄືນ ເພື່ອທຳຄວາມເຂົ້າໃຈໃຫ້ດີຂຶ້ນກວ່າເກົ່າ ກ່ຽວກັບ ຂອບເຂດ ແລະ ຂະໜາດຂອງການຮົ່ວໄຫຼທີ່ວ່ານີ້.”
ເມື່ອຖືກຖາມວ່າມັນອາດຍັງມີເອກະສານກຳລັງໝູນວຽນທາງອອນໄລນ໌ຕື່ມອີກຫຼືບໍ່ນັ້ນ, ທ່ານນາງ ຊິງ ໄດ້ກ່າວວ່າ, “ມັນອາດມີ… ພວກເຮົາກຳລັງປະເມີນມັນຢູ່.”
ທ່ານນາງໄດ້ກ່າວວ່າກະຊວງປ້ອງກັນປະເທດ ແມ່ນໄດ້ທຳການດຳເນີນການເພື່ອຈຳກັດຈຳນວນພະນັກງານທີ່ສາມາດເຂົ້າຫາເອກະສານລັບ.
ທ່ານນາງ ຊິງ ໄດ້ກ່າວວ່າ “ພວກເຮົາກຳລັງຄັດລາຍຊື່ການແລກປ່ຽນຂໍ້ມູນຂອງພວກເຮົາຢູ່ ແລະ ຜູ້ທີ່ສາມາດເຂົ້າຫາຂໍ້ມູນບາງອັນ.” ທ່ານນາງກ່າວຕື່ມວ່າ “ຂ້າພະເຈົ້າບໍ່ສາມາດໃຫ້ຕົວເລກທີ່ແນ່ນອນ.”
ເມື່ອອາທິດທີ່ຜ່ານມາ, ບັນດາເຈົ້າໜ້າທີ່ ສະຫະລັດ ໄດ້ຕັ້ງຂໍ້ກ່າວຫາຕໍ່ທະຫານປ້ອງກັນອາກາດແຫ່ງຊາດ ທ້າວ ແຈັກ ເທເຊຣາ, ອາຍຸ 21 ປີ, ກ່ຽວກັບ ການຮົ່ວໄຫຼເອກະສານລັບເປັນຢ່າງສູງທາງອອນໄລນ໌.
