ການຮົ່ວໄຫຼ ຂອງອັນທີ່ປາກົດວ່າ ເປັນເອກະສານລັບຢ່າງສູງຂອງ ສະຫະລັດ ກ່ຽວກັບ ສົງຄາມໃນ ຢູເຄຣນ ໄດ້ກໍ່ “ໃຫ້ເກີດຄວາມສ່ຽງທີ່ຮ້າຍແຮງຫຼາຍ” ຕໍ່ຄວາມໝັ້ນຄົງແຫ່ງຊາດ ສະຫະລັດ, ອີງຕາມການກ່າວຂອງໂຄສົກທຳນຽບຫ້າແຈ.
ເອກະສານທີ່ວ່ານັ້ນລວມມີຂໍ້ມູນທີ່ລະອຽດອ່ອນ ກ່ຽວກັບ ສົງຄາມຂອງ ຣັດເຊຍ ໃນ ຢູເຄຣນ ພ້ອມກັບບັນດາພັນທະມິດຂອງ ສະຫະລັດ ແລະ ການຮົ່ວໄຫລດັ່ງກ່າວ ໄດ້ເຮັດໃຫ້ກະຊວງຍຸຕິທຳດຳເນີນການສືບສວນສອບສວນ.
ວັດຖຸທີ່ວ່ານັ້ນ, ເຊິ່ງຖືກສົ່ງໝຸນວຽນໃນເວັບໄຊ້ສື່ສັງຄົມຕ່າງໆ, “ມີຄວາມເປັນໄປໄດ້ຕໍ່ການແຜ່ກະຈາຍຂໍ້ມູນທີ່ບໍ່ຖືກຕ້ອງ,” ທ່ານ ຄຣິສ ມີເກີ, ລັດຖະມົນຕີຊ່ວຍ ວ່າການກະຊວງປ້ອງກັນປະເທດ ທີ່ຮັບຜິດຊອບ ກ່ຽວກັບ ປະຊາສຳພັນ, ໄດ້ກ່າວຕໍ່ບັນດານັກຂ່າວໃນວັນຈັນວານນີ້.
ທ່ານໄດ້ກ່າວວ່າ “ພວກເຮົາແມ່ນຍັງສືບສວນສອບສວນວ່າ ເຫດການນີ້ເກີດຂຶ້ນໄດ້ແນວໃດ, ພ້ອມກັບຂອບເຂດຂອງບັນຫາ. ມັນໄດ້ມີບາດກ້າວຕ່າງໆທີ່ຈະກວດກາເບິ່ງວ່າຂໍ້ມູນຊະນິດນີ້ ແມ່ນຖືກແຈກຢາຍແນວໃດ ແລະ ໃຫ້ໃຜ.”
