ພະແໜກອາລັກຂາປະທານາທິບໍດີສະຫະລັດ ໄດ້ເພີ້ມການຮັກ
ສາຄວາມປອດໄພຢູ່ທາງນອກທຳນຽບຂາວຂຶ້ນ ຫຼັງຈາກຜູ້ຊາຍ
ຄົນນຶ່ງເຕັ້ນຂ້າມຮົ້ວເຂົ້າໄປໃນເດີ່ນ ແລ້ວແລ່ນເຂົ້າໄປໃນທຳນຽບ
ຂາວ ກ່ອນຖືກຈັບໂຕໄດ້.
ທ່ານນາງ Julia Pierson ຫົວໜ້າພະແໜກ Secret Service
ໄດ້ສັ່ງໃຫ້ທຳການລາດຕະເວນແລະເຝົ້າຍາມຮົ້ວກ້ຳເໜືອຂອງທຳ
ນຽບຂາວຫຼາຍຂຶ້ນ ໃນເວລາບໍ່ດົນຫຼັງຈາກເກີດເຫດການດັ່ງກ່າວ
ໃນວັນສຸກມື້ ກ່ອນນີ້. ນອກນັ້ນ ນາງຍັງໄດ້ສັ່ງໃຫ້ທຳການທົບທວນ
ເບິ່ງຢ່າງຮອບດ້ານ ວ່າມັນມີຫຍັງເກີດຂຶ້ນ ເວລາຊາຍໄວ 42 ປີທີ່
ບໍ່ມີອາວຸດຕິດໂຕປີນຂ້າມຮົ້ວເຂົ້າໄປ ແລ້ວແລ່ນເຂົ້າໄປໃນຕຶກທຳນຽບຂາວ ບ່ອນທີ່ຜູ້ກ່ຽວຖືກເຈົ້າໜ້າທີ່ຮັກສາຄວາມປອດໄພ ຈັບໂຕໄວ້ນັ້ນ.
ປະທານາທິບໍດີບາຣັກ ໂອບາມາ ພ້ອມດ້ວຍພວກລູກສາວຂອງທ່ານໄດ້ອອກຈາກທຳນຽບ
ຂາວໄປກ່ອນແລ້ວ ໃນວັນສຸກນັ້ນ ນຳເຮືອບິນເຮລີຄອບເຕີ ບໍ່ດົນກ່ອນໜ້າຊາຍຄົນນີ້ປີນ
ຮົ້ວເຂົ້າໄປ ຊຶ່ງໄດ້ພາໃຫ້ມີການອົບພະຍົບຜູ້ຄົນອອກຈາກບາງເຂດຂອງທຳນຽບຂາວ ຊຶ່ງເປັນເຫດການທີ່ບໍ່ສູ້ມີຂຶ້ນນັ້ນ.
ພວກນັກຂ່າວ ອົບພະຍົບ ອອກຈາກທຳນຽບຂາວ:
ທ່ານ Jason Chaffetz ສະມາຊິກສະພານິຕິບັນຍັດ ສັງກັດພັກ Republican ຊຶ່ງເປັນປະທານອະນຸກຳມະການສະພາຕໍ່າ ສະຫະລັດ ທີ່ກຳກັບດູແລຄວາມປອດໄພແຫ່ງຊາດ
ເອີ້ນຄວາມຝ່າຝືນດ້ານຄວາມປອດໄພນີ້ວ່າ “ເປັນທີ່ຮັບເອົາບໍ່ໄດ້ເລີຍ”.
ໃນວັນເສົາວານນີ້ ຊາຍຄົນນຶ່ງຖືກຈັບກຸມ ຖານລ່ວງລ້ຳເຂົ້າໄປໃນທຳນຽບຂາວ. ຜະແໜກ
ຮັກສາ ຄວາມປອດໄພ ກ່າວວ່າ ຊາຍຄົນນີ້ໄດ້ຍ່າງເຂົ້າໄປໃກ້ໆກັບທາງເຂົ້າທຳນຽບຂາວ ແລະໄດ້ຖືກເຈົ້າໜ້າທີ່ບອກໃຫ້ໜີໄປ ແຕ່ໃນເວລາບໍ່ດົນຕໍ່ມາ ຜູ້ກ່ຽວໄດ້ຂັບລົດກັບຄືນຍັງ ທາງປະຕູເຂົ້າທຳນຽບຂາວອີກ ແລະໄດ້ຖືກຈັບກຸມ ຫລັງຈາກທີ່ບໍ່ຍອມອອກຈາກບ່ອນນັ້ນໄປ ຕາມຄຳສັ່ງຂອງເຈົ້າໜ້າທີ່ຮັກສາຄວາມປອດໄພ.
