ຜູ້ຖືກສະເໜີຊື່ເຂົ້າຮັບຕຳແໜ່ງໃນສານສູງສຸດຂອງປະທານາທິບໍດີ ສະຫະລັດ ທ່ານ ບາຣັກ ໂອບາມາ, ຜູ້ພິພາກສາສານອຸທອນລັດຖະ ບານກາງ ທ່ານ Merrick Garland, ໃນທັນທີທັນໃດໄດ້ກາຍເປັນ ຈຸດເພັ່ງເລັງ ໃນການຕໍ່ສູ້ຂອງພັກການເມືອງ ໃນສະພາສູງເຊິ່ງ ຄວບຄຸມໂດຍພັກຣີພັບບລີກັນ, ບ່ອນທີ່ການພິຈາລະນາ ຮັບເອົາການແຕ່ງຂອງທ່ານ, ທີ່ມີໂອກາດໜ້ອຍຈະໄດ້ຮັບການຢືນຢັນ ແມ່ນຍັງເປັນຄຳຖາມຢູ່. ດັ່ງທີ່ນັກຂ່າວວີໂອເອ Michael Bowman ລາຍງານ, ບັນດາສະມາຊິກພັກຣີພັບບລີກັນ ໄດ້ສືບຕໍ່ ໂຕ້ຖຽງວ່າປະທານາທິບໍດີຄົນຕໍ່ໄປ ຜູ້ທີ່ຈະໄດ້ຖືກຮັບເລືອກໃນ ທ້າຍປີນີ້ ຄວນເປັນຜູ້ເລືອກ ເອົາຜູ້ພິພາກສາ ສືບທອດຕຳແໜ່ງຕໍ່ຈາກທ່ານ Antonin Scalia ທີ່ໄດ້ເສຍຊີວິດເມື່ອເດືອນທີ່ຜ່ານມາ. ພຸດທະສອນມີລາຍລະອຽດກ່ຽວກັບ ເລື້ອງນີ້ ມາສະເໜີທ່ານ.
ຄວາມສົງໄສທີ່ມີມາຫຼາຍສັບປະດາ ໄດ້ສິ້ນສຸດລົງໃນວັນພຸດວານນີ້ ເວລາທ່ານປະທານາ ທິບໍດີ ໄດ້ສະເໜີແຕ່ງຕັ້ງ ຫົວໜ້າສານອຸທອນເຂດນະຄອນຫຼວງວໍຊິງຕັນ ທ່ານ Merrick Garland ໃຫ້ເຂົ້າຮັບຕຳແໜ່ງເປັນຜູ້ພິພາກສາສານສູງສຸດຂອງປະເທດ.
ປະທານາທິບໍດີ ບາຣັກ ໂອບາມາ ກ່າວວ່າ “ຂ້າພະເຈົ້າໄດ້ສະເໜີຊື່ຜູ້ທີ່ໄດ້ຖືກຮັບຮູ້ຢ່າງ ກວ້າງຂວາງ ບໍ່ພຽງແຕ່ເປັນຜູ້ທີ່ມີແນວຄິດແຫຼມຄົມສຸດທ້າງດ້ານກົດໝາຍຂອງ ອາເມຣິກາ ເທົ່ານັ້ນ, ແຕ່ຍັງເປັນບຸກຄົນທີ່ນຳ ເອົາຈິດໃຈຂອງການມີກິລິຍາມາລະຍາດທີ່ສຸພາບ, ນ້ອມນ້ອມຖ່ອມຕົວ, ມີຄວາມຊື່ສັດ, ມີຄວາມຍຸຕິທຳ ແລະ ຄວາມດີເລີດມາສູ່ວຽກງານຂອງ ທ່ານ.”
ທ່ານ Merrick Garland ຜູ້ຖືກສະເໜີຊື່ເຂົ້າຮັບຕຳແໜ່ງໃນສານສູງສຸດກ່າວວ່າ “ນີ້ແມ່ນກຽດ ທີ່ໃຫຍ່ທີ່ສຸດ ໃນຊີວິດຂອງຂ້າພະເຈົ້າ, ນອກຈາກການທີ່ນາງ Lynn ໄດ້ຕົກລົງແຕ່ງງານ ກັບຂ້າພະເຈົ້າເມື່ອ 23 ປີທີ່ຜ່ານມາ.”
ທ່ານ Garland ທີ່ຖືກພິຈາລະນາວ່າ ເປັນບຸກຄົນທີ່ມີນະໂຍບາຍເປັນ ກາງໃນດ້ານຍຸຕິທຳນັ້ນ, ໄດ້ປະຕິບັດໜ້າທີ່ເປັນຜູ້ພິພາກສາໃຫ້ກັບລັດ ຖະບານກາງເປັນເວລາເກືອບ 2 ທົດສະວັດແລ້ວ.
ທ່ານ Garland ກ່າວວ່າ “ຄວາມຊື່ສັດຕໍ່ລັດຖະທຳມະນູນ ແລະ ກົດໝາຍ ໄດ້ເປັນຮາກຖານ ທີ່ສຳຄັນໃຫ້ກັບອາຊີບໃນຊີວິດຂອງຂ້າພະເຈົ້າ ແລະ ມັນແມ່ນປະເພດຂອງຜູ້ພິພາກສາທີ່ມີ ມາດຕະຖານສູງ ເຊິ່ງຂ້າພະເຈົ້າໄດ້ພະຍາຍາມທີ່ຈະເປັນໃນໄລຍະ 18 ປີທີ່ຜ່ານມາ. ໃຫ້ ບັນດາທ່ານເຊື່ອວ່າ ພວກທ່ານຈະໄດ້ຮັບຄວາມເປັນທຳ ໃນສານຂອງພວກເຮົາໂດຍບໍ່ມີ ຄວາມລຳອຽງ ຫຼື ເຂົ້າຂ້າງພັກໃດພັກນຶ່ງ ເຊິ່ງແມ່ນສິ່ງທີ່ໄດ້ຈຳແນກຄວາມແຕກຕ່າງຂອງ ປະເທດນີ້ຈາກບ່ອນອື່ນໆ."
ທ່ານ ໂອບາມາ ກ່າວວ່າ “ຂ້າພະເຈົ້າພຽງແຕ່ຂໍໃຫ້ສະມາຊິກພັກຣິພັບ ບລີກັນ ໃນສະພາສູງ ພິຈາລະນາທ່ານຢ່າງມີຄວາມເປັນທຳກໍພໍ.”
ຜູ້ນຳສຽງສ່ວນຫຼາຍໃນສະພາສູງ ໄດ້ໃຫ້ຄຳຕອບໂດຍທັນທີ.
ທ່ານ Mitch McConnell ທີ່ສັງກັດພັກຣີພັບບລີກັນ ກ່າວວ່າ “ທັດສະນະຂອງພວກເຮົາ ແມ່ນແນວນີ້ ໃຫ້ປະຊາຊົນໄດ້ອອກສຽງໃນການແຕ່ງຕັ້ງຕຳແໜ່ງທີ່ຫວ່າງລົງນີ້.”
ສະມາຊິກພັກຣີພັບບລີກັນ ສ່ວນຫຼາຍໄດ້ກ່າວຢ້ຳໃນການປະຕິເສດທີ່ຈະພິຈາລະນາ ຜູ້ຖືກ ສະເໜີຊື່ຄົນໃດໆທີ່ທ່ານ ໂອບາມາ ໄດ້ສະເໜີ ມາ, ສຳລັບປີສຸດທ້າຍຂອງການດຳລົງຕຳ ແໜ່ງປະທານາທິບໍດີຂອງທ່ານນີ້.
ທ່ານ Mitch McConnell ໄດ້ກ່າວວ່າ “ສະພາສູງຈະເວົ້າເຖິງບັນຫານີ້ຢ່າງເໝາະສົມອີກ ຄັ້ງໜຶ່ງ ເມື່ອພວກເຂົາເຈົ້າພິຈາລະນາຄຸນນະວຸດທິ ຂອງຜູ້ຖືກສະເໜີຊື່ໂດຍປະທານາ ທິບໍດີຄົນຕໍ່ໄປ, ບໍ່ວ່າຈະເປັນໃຜກໍຕາມ.”
ແຕ່ແນວໃດກໍຕາມ, ບັນດາສະມາຊິກພັກເດໂມແຄຣັດ ກໍຍັງສືບຕໍ່ກົດດັນສະມາຊິກພັກຣີ ພັບບລີກັນຢູ່.
ສະມາຊິກສະພາສູງພັກເດໂມແຄຣັດ ທ່ານ Harry Reid ກ່າວວ່າ “ຂ້າພະເຈົ້າຫວັງວ່າ ພວກ ເຂົາເຈົ້າຈະເຮັດພັນທະຕາມລັດຖະທຳມະນູນຂອງພວກເຂົາເຈົ້າ ແລະ ຈັດການປະຊຸມ, ພິຈາລະນາ ແລະ ລົງຄະແນນສຽງສຳລັບຜູ້ທີ່ປະທານາທິບໍດີ ໂອບາມາ ສະເໜີຊື່ແຕ່ງ ຕັ້ງນັ້ນ.”
ບັນດານັກວິເຄາະທາງດ້ານກົດໝາຍກ່າວວ່າ ທ່ານ Garland ຈະບໍ່ເຮັດໃຫ້ຜູ້ສະໜັບສະໜູນ ຫົວເສລີຂອງທ່ານ ໂອບາມາ ມີຄວາມຕື່ນເຕັ້ນ, ແຕ່ມັນແມ່ນທາງເລືອກຍຸດທະສາດທີ່ແຂງ ແຮງໃຫ້ແກ່ 2 ພັກການເມືອງທີ່ມີການແບ່ງແຍກກັນໃນນະຄອນຫຼວງ ວໍຊິງຕັນນັ້ນ.
ທ່ານນາງ Michele Jawando ຈາກສູນກາງເພື່ອຄວາມກ້າວໜ້າ ອາເມຣິກັນ ກ່າວວ່າ “ເມື່ອ ທ່ານກຳລັງປະເຊີນໜ້າກັບສະຖານະການແນວນັ້ນ, ມັນມີຄວາມສຳຄັນຫຼາຍທີ່ຈະມີໃຜ ຄົນໜຶ່ງ ທີ່ເປັນຜູ້ຖືກສະເໜີຊື່ຕາມຄວາມຄິດເຫັນຂອງຄົນສ່ວນໃຫຍ່. ລາວບໍ່ແມ່ນຜູ້ທີ່ ສ້າງຄວາມ ປະຫລາດໃຈໃຫ້ແກ່ພວກທີ່ມີອາຊີບໃນດ້ານກົດໝາຍ.”
ພັກການເມືອງຝ່າຍຄ້ານ ໄດ້ຫາທາງທີ່ຈະທຳລາຍການສະເໜີຊື່ເຂົ້າຮັບຕຳແໜ່ງ ໃນສານສູງສຸດຂອງປະທານາທິບໍດີ ມາເປັນເວລາດົນນານແລ້ວ.
ທ່ານ Garland ແມ່ນຄາດວ່າຈະເດີນທາງໄປລັດຖະສະພາໃນສອງສາມມື້ນີ້. ແຕ່ວ່າສະມາ ຊິກສະພາສູງພັກຣີພັບບລີກັນ ສ່ວນຫຼາຍໄດ້ປະຕິເສດແມ່ນແຕ່ທີ່ຈະໄປພົບປະກັບທ່ານ.
