ທ້າວ Salah Abdeslam ຜູ້ຕ້ອງສົງໄສ ທີ່ສຳຄັນສຸດ ໃນການກໍ່ການຮ້າຍໂຈມຕີ ໃນເດືອນພະຈິກປີກາຍນີ້ ທີ່ນະຄອນຫຼວງ Paris ຈະປະເຊີນໜ້າກັບຄຳຖາມຕ່າງໆ ຂອງພວກເຈົ້າໜ້າທີສືບສວນຝຣັ່ງໃນວັນສຸກມື້ນີ້ ເປັນເທື່ອທຳອິດ ນັບແຕ່ໄດ້ຖືກສົ່ງ ມາຈາກປະເທດ Belgium ເດືອນແລ້ວນີ້.
ຄຳໃຫ້ການຂອງລາວ ຫວັງວ່າຄົງຈະເຮັດໃຫ້ເຫັນເຂົ້າໄປຂ້າງໃນຂອງການວາງແຜນ ແລະຍຸດທະສາດທີ່ໃຊ້ ໂດຍພວກຫົວຮຸນແຮງຈັດອິສລາມ ໃນການລົງມື ໂຈມຕີກໍ່ການຮ້າຍ. ລາວຍັງອາດຈະໃຫ້ລາຍລະອຽດກ່ຽວກັບການຕິດຕໍ່ໃດໆລະ ຫວ່າງການໂຈມຕີທີ່ນະຄອນຫລວງ Paris ແລະ Belgium ຊຶ່ງທັງສອງໄດ້ລົງ ມືໂດຍກຸ່ມລັດອິສລາມ.
ທ້າວ Abdeslam ບໍ່ໄດ້ໃຫ້ຄວາມສຳຄັນໃດໆ ກ່ຽວກັບບົດບາດຂອງລາວໃນການໂຈມ ຕີລະຫວ່າງການສອບປາກຄຳ ຢູ່ Belgium ໂດຍເວົ້າວ່າ ລາວເປັນພຽງລູກມື ໃນແຜນ ການທີ່ຮ່າງຂຶ້ນໂດຍທ້າວ Abdellhamid Abaaoud.
ທ້າວ Abdeslam ເປັນເພື່ອນແຕ່ສະໄໝຍັງເປັນເດັກນ້ອຍກັບຜູ້ຕ້ອງສົງໄສທີ່ເປັນຫົວ ໜ້າກຸ່ມທີ່ທຳການໂຈມຕີແລະເປັນຜູ້ຕ້ອງສົງໄສທີ່ມີບົດບາດສຳຄັນໃນການໂຈມຕີເມື່ອ ວັນທີ 13 ເດືອນພະຈິກແລະການກະກຽມ. ທ້າວ Abdeslam ໄດ້ຫລົບໜີເປັນເວລາຫລາຍເດືອນ ໃນຢູໂຣບ ກ່ອນລາວຈະຖືກຕາມລ່າ ແລະໃນທີສຸດ ກໍຖືກຈັບທີ່ນະຄອນ Brussels ບ່ອນທີ່ລາວໄດ້ເຕີບໂຕມານັ້ນ.
ມີການເຊື່ອວ່າ ທ້າວ Abdeslam ເປັນຜູ້ຂົນສົ່ງ ຜູ້ວາງລະເບີດສະລະຊີບສາມຄົນໄປ ເດິ່ນກິລາແຫ່ງຊາດຝຣັ່ງ ຢູ່ທາງພາກເໜືອຂອງປະເທດ ບ່ອນທີ່ເຂົາເຈົ້າ ລະເບີດຕົນ ເອງນັ້ນ.
ເປັນທີ່ເຊື່ອກັນວ່າ ລາວໄດ້ຖອນໂຕອອກຈາກການວາງລະເບີດສະລະຊີບ ໃນນາທີສຸດທ້າຍ ໃນຂະນະທີ່ເຈົ້າໜ້າທີ່ຕຳຫລວດ ໄດ້ພົບເຫັນເສື້ອບັນຈຸລະເບີດສະລະຊີບທີ່ຍັງບໍ່ ທັນແຕກ ຢູ່ໃກ້ກັບໂທລະສັບມືຖືຂອງທ້າວ Abdeslam ທີ່ມີ ຂໍ້ມູຸນລະບຸວ່າ ລາວຢູ່ທີ່ນັ້ນໃນຄຳຄືນຂອງການໂຈມຕີ.
