ລັດຖະມົນຕີປ້ອງກັນປະເທດຫວຽດນາມ ໄດ້ບອກກັບລັດຖະມົນຕີປ້ອງກັນສະຫະລັດ
ທ່ານ ລີອອນ ພາແນດຕ້າ ໃນວັນຈັນມື້ນີ້ ວ່າ ທາງລັດຖະບານຄອມມິວນີສຫວຽດນາມ
ຈະເປີດບ່ອນໃໝ່ 3 ບ່ອນ ໃຫ້ເຂົ້າໄປຂຸດຄົ້ນແລະຊອກຫາຊາກກະດູກແລະສິ່ງເສດເຫລືອ
ຂອງບັນດາທະຫານອະເມຣິກັນທີ່ລົ້ມຕາຍໃນປາງສົງຄາມຫວຽດນາມ ເມື່ອຫຼາຍທົດສະວັດຜ່ານມານັ້ນ.
ຄໍາໝັ້ນສັນຍານັ້ນໄດ້ມີຂຶ້ນ ໃນການພົບປະກັນລະຫວ່າງ ທ່ານ ພາແນດຕ້າ ແລະ ທ່ານ Phung Qung Thanh ລັດຖະມົນຕີປ້ອງກັນປະເທດຫວຽດນາມ.
ທັງສອງຜູ້ນໍາທະຫານ ໄດ້ແລກປ່ຽນຂອງທີ່ລະລຶກຈາກສົງຄາມ ເຊັ່ນ ປື້ມບັນທຶກປະຈໍາວັນ
ຂອງທະຫານຫວຽດນາມຄົນນຶ່ງ ແລະຈົດໝາຍສ່ວນໂຕຂອງທະຫານອາະເມຣິກັນ
ທີ່ທະຫານຈາກທັງສອງຝ່າຍຍຶດມາໄດ້ ໃນປາງສົງຄາມນັ້ນ.
ໃນວັນອາທິດວານນີ້, ທ່ານ ພາແນດຕ້າ ໄດ້ເປັນເຈົ້າໜ້າທີ່ສະຫະລັດລະດັບສູງສຸດ ທີ່ໄດ້ໄປຢ້ຽມຢາມ ຖານທັບອາກາດແລະທັບເຮືອເກົ່າຂອງສະຫະລັດທີ່ ອ່າວ Cam Ranh ນັບຕັ້ງແຕ່ສົງຄາມໄດ້ສິ້ນສຸດລົງໃນປີ 1975.
ທ່ານລັດຖະມົນຕີປ້ອງກັນປະເທດ ຍັງໄດ້ໄປຢ້ຽມຢາມກໍ່າປັ່ນບັນທຸກສິນຄ້າຂອງກອງທັບເຮືອອາເມຣິກັນລໍານຶ່ງ ຊຶ່ງເວລານີ້ ຈອດຢູ່ທ່າເຮືອໃນອ່າວດັ່ງກ່າວ. ກໍາປັ່ນ Richard E. Byrd ທໍາການລໍາລຽງສິນຄ້າໃຫ້ກໍ່າປັ່ນຂອງກອງທັບເຮືອສະຫະລັດ ໂດຍໃຊ້ຄົນງານພົນລະເຮືອນ ເປັນສ່ວນໃຫຍ່.
ການຢ້ຽມຢາມຫວຽດນາມຂອງທ່ານພາແນດຕ້າໃນຄັ້ງນີ້ ແມ່ນຕິດຕາມມາ ຫລັງຈາກທີ່ທ່ານໄດ້ກ່າວຄໍາປາໄສ ເມື່ອວັນເສົາແລ້ວນີ້ ຕໍ່ກອງປະຊຸມດ້ານຄວາມໝັ້ນຄົງທີ່ສິງຄະໂປ ຊຶ່ງທ່ານໄດ້ເວົ້າວ່າ ກອງທັບເຮືອສະຫະລັດຈະເຄື່ອນຍ້າຍ ກໍ່າປັ່ນສ່ວນໃຫຍ່ຂອງຕົນ ໄປປະຈໍາການຢູ່ມະຫາສະມຸດປາຊິີຟິກ ພາຍໃນປີ 2020 ອັນເປັນພາກສ່ວນນຶ່ງຂອງການເພ່ງເລັງໃສ່ຂົງເຂດເອເຊຍ ໃນດ້ານຍຸທະສາດ.
ທ່ານພາແນດຕ້າ ກໍາລັງຢ້ຽມຢາມຂົງເຂດເອເຊຍປາຊິຟິກ ເປັນເວລານຶ່ງອາທິດ ຊຶ່ງຈະໂຮມທັງໄປຢ້ຽມຢາມອິນເດຍນໍາ.