ລິ້ງ ສຳຫລັບເຂົ້າຫາ

ລມຕ ປ້ອງກັນປະເທດ ສຫລ ຢ້ຽມຢາມ ເອເຊຍປາຊິຟິກ

  • ໄພສານ ວໍຣະຈັກ

ທ່ານ Leon Panetta ຄົນທີ່ສີ່ ຈາກຂວາມື ພວມຢ້ຽມຢາມເຂດເອເຊຍປາຊີຟິກ

ລັດຖະມົນ​ຕີ​ປ້ອງ​ກັນ​ປະ​ເທດສະຫະລັດ ທ່ານ Leon Panetta ​ເລີ້​ມອອກ​ເດີນທາງ​
ໄປ​ຢ້ຽມຢາມ​ເຂດ​ເອ​ເຊຍ​ປາຊິ​ຟິກ​ເປັນ​ເວລາ 9 ມື້ ​ເພື່ອ​ຊຸກ​ຍູ້​ແຜນ​ຂອງ​ລັດຖະບານ
ປະທານາທິບໍດີບາ​ຣັກ ​ໂອ​ບາ​ມາ​ໃນ​ການ​ຫັນປ່ຽນ​ຈຸດ​ເພັ່ງ​ເລັງ​ທາງ​ດ້ານ​ທະຫານໄປ
​ສູ່​ຂົງ​ເຂດດັ່ງກ່າວ.

ທ່ານ Panetta ຈະ​ກ່າວ​ຄໍາ​ປາໄສ​ຄັ້ງ​ສໍາຄັນ​ຕໍ່ກອງ​ປະ​ຊຸ​ມວວ່າດ້ວຍ​ຄວາມ​ໝັ້ນຄົງ​
ໃນ​ເຂດ​ເອ​ເຊຍປະ​ຈໍາ​ປີທີ່​ສິງກະ​ໂປ ​ໃນ​ວັນ​ເສົາ​ນີ້ ​ເພື່ອແຈ້ງ​ໃຫ້​ຊາບເຖິງແຜ​ນການ
ຂອງ​ວໍ​ຊິງ​ຕັນ ທີ່​ຈະ​ເພີ້​ມຈໍານວນ​ທະຫານ​ສະຫະຣັດແລະ​ອາວຸດຍຸດ​ໂທປະກອນ ​ໃນ
​ເຂດເອ​ເຊຍປາຊິ​ຟິກ.

​ໃນ​ຂະນະ​ທີ່​ໄປແວະ​ຢູ່ກອງ​ບັນຊາ​ການ ປະຈຳເຂດເອ​ເຊຍ​ປາຊິຟິກທີ່​ລັດ​ຮາ​ວາຍ
​ໃນ​ວັນ​ພະຫັດວານ​ນີ້ ທ່ານ Panetta ​ກ່າວ​ວ່າ ​ເຖິງ​ແມ່ນ​ວ່າ​ພວມມີ​ຂ່າວ​ກ່ຽວ​ກັບ
ການ​ຕັດ​ງົບປະມານ ບັນດາກໍາລັງ​ທະຫານ​ຂອງອາ​ເມຣິກັນ ຈະ​ຕ້ອງ​ໄດ້​ວ່ອງ​ໄວ​
ຂື້ນ​ກວ່າ​ເກົ່າ ​ເພື່ອ​ປະ​ເຊີນໜ້າ​ກັບ​ການ​ທ້າທາຍ​ຫລາຍ​ຢ່າງ​ຂອງສັດຕະ​ວັດ​ທີ່ 21.

ທ່ານ Panetta ກ່າວ​ຕື່ມ​ວ່າ “ສອງພວກ​ເຮົາ​ຕ້ອງ​ໄດ້​ແນໃສ່​ບ່ອນໃດ ທີ່​ມີການ
​ນາບ​ຂູ່ຫຼາຍ. ນັ້ນ​ໝາຍ​ຄວາມ​ວ່າ ພວກ​ເຮົາ​ຕ້ອງເພັ່ງ​ເລັງໂດຍ​ສະ​ເພາະ ໃສ່​ຂົງເຂດ
ປາຊິ​ຟິກ ແລະ​ສື​ບຕໍ່ເພັ່ງ​ໃສ່​ພາກ​ຕາ​ເວັນ​ອອກ​ກາງ. ສາມ ພວກ​ເຮົາ​ຕ້ອງ​ໄດ້ສືບ​ຕໍ່​
ການ​ມີໜ້າ ​ຢູ່​ໃນ​ເຂດ​ອື່ນໆຂອງ​ໂລກ ​ແລະຊ່ອງ​ທາງ​ໃນ​ການ​ດຳ​ເນີນ​ການ​ດັ່ງກ່າວ
ກໍ​ຄື ​ການ​ພັດທະນາ​ແນວທາງ​ຄິດ​ແບບ​ສ້າງສັນ​ແລະ​ສ້າງຂະ​ບວນການ​ສັບ​ປ່ຽນ
ໝູນວຽນຕ່າງໆທີ່​ຈະ​ອຳນວຍ​ໃຫ້​ພວກ​ເຮົາ​ສາມາດເຂົ້າໄປໃນ​ປະ​ເທດ​ຕ່າງໆ ບໍ່​ວ່າ
​ຢູ່​ໃນອາ​ເມຣິກາລາ​ຕິນ ບໍ່​ວ່າໃນອາ​ຟຣິກາ ບໍ່​ວ່າໃນຢູ​ໂຣບ ບໍ່​ວ່າຢູ່​ທີ່​ນີ້​ ໃນເຂດ​ມະ
ຫາ​ສະມຸຸດປາຊິ​ຟິກ ແລະ​ມີ​ຄວາມ​ສາມາດ ໃນ​ການ​ດຳ​ເນີນ​ງານ​ຮ່ວມ​ກັບປະ​ເທດ
​ຕ່າງໆ ເພື່ອ​ເສີມ​ສ້າງ ການ​ເປັນ​ພາ​ຄີ ​ພັດທະນາ​ຄວາມ​ອາດ​ສາມາດ​ຂອງ​ພວກ
​ເຂົາ​ເຈົ້າ ​ທຳ​ການຊ້ອມ​ລົບ ​ໃຫ້ການ​ແນະ​ນໍາ​ ແລະ​ໃຫ້​ຄວາມ​ຊ່ວຍ​ເຫລື​ອ​ແກ່​ພວກ
​ເຂົາ​ເຈົ້າ ​ເພື່ອ​ເຮັດ​ໃຫ້​ເຂົາ​ເຈົ້າ​ໄດ້​ເປັນ​ພາຄີ ຮັບຜິດຊອບໃນ​ການ​ຮັກສາ​ຄວາມ​ປອດ​
ໄພ​ຂອງ​ໂລກ​ໃນ​ປັດຈຸບັນ. ສີ່ ພວກ​ເຮົາ​ຕ້ອງ​ໃຫ້​ເປັນ​ທີ່​ແນ່ນອນ​ວ່າ ພວກ​ເຮົາມີ
​ຄວາມເຂັ້ມແຂງ​ພຽງ​ພໍ​ທີ່​ຈະ​ປະ​ເຊີນ​ໜ້າ​ກັບ​ສັດ​ຕູຫລາຍ​ກວ່າ​ນຶ່ງຝ່າຍ ​ໃນ​ເວລາ
​ດຽວ​ກັນ ​ແລະເອົາຊະນະ​ພວກ​ເຂົາ​ໄດ້.”

​ແຜນການ​ເດີນທາງ​ຂອງ​ທ່ານ Panetta ​ແມ່ນ​ຮວມທັງ​ການ​ຢ້ຽມຢາມ​ປະ​ເທດ
ຫວຽດນາມ​ແລະ​ອິນ​ເດຍ ຢ່າງ​ເປັນ​ທາງ​ການ​ນຳ​ດ້ວຍ.

XS
SM
MD
LG