ບັນດາຜູ້ຊ່ຽວຊານສາກົນ ທີ່ກຳລັງທົບທວນຄືນການສັນລະສູດຂອງລັດຖະບານ ເມັກຊິໂກ ກ່ຽວກັບການລັກພາໂຕ ເມື່ອປີ 2014 ແລະ ການຫາຍສາບສູນຂອງນັກຮຽນ 43 ຄົນນັ້ນ ໄດ້ປະຕິເສດຕໍ່ ຄຳບັນຍາຍຂອງເຈົ້າໜ້າທີ່ລັດຖະບານ, ໂດຍການກ່າວຫາບັນດານັກສືບສວນສອບສວນວ່າ ຈັດການກັບຫຼັກຖານຢ່າງບໍ່ຖືກຕ້ອງ ແລະ ອາໄສກາງຕໍ່ການກ່າວຂອງຜູ້ເຫັນເຫດການພຽງແຕ່ຢ່າງດຽວ.
ບົດວິເຄາະຍາວຫຼາຍກວ່າ 400 ໜ້າໄດ້ຖືກເປີດເຜີຍອອກໃນວັນອາທິດວານນີ້ໂດຍຄະນະກຳມະການ Inter – America ກ່ຽວກັບສິດທິ ມະນຸດ ເຊິ່ງເປັນອົງການທີ່ປົກຄອງຕົນເອງທີ່ຂຶ້ນກັບ The Organization of American States. ພວກເຂົາບໍ່ໄດ້ຄາດຄະເນເຖິງຊະຕາກຳຂອງພວກນັກຮຽນທີ່ຫາຍສາຍສູນ ໄປໄດ້ໜຶ່ງປີແລ້ວ ໃນລັດ Guerrero ພາກໃຕ້ຂອງ ເມັກຊິໂກ.
ແຕ່ພວກເຂົາກ່າວວ່າ ບໍ່ມີຫຼັກຖານໃດໆທີ່ສະໜັບສະໜູນການກ່າວຫາທີ່ເປັນຈຸດສູນກາງ ຂອງ ລັດຖະບານ ວ່າພວກນັກຮຽນແມ່ນໄດ້ຖືກຈັບກຸມໂດຍຕຳຫຼວດທ້ອງຖິ່ນ ແລະ ມອບ
ໂອນໃຫ້ພວກລອບສັງຫານລັກລອບຄ້າຢາຜິດກົດໝາຍ ຫຼັງຈາກໃຊ້ລົດເມເພື່ອຂົນສົ່ງໄປຍັງບ່ອນປະທ້ວງແຫ່ງໜຶ່ງ.
ພາຍໃຕ້ທິດສະດີດັ່ງກ່າວ, ເຊິ່ງຄັ້ງທຳທິດໄດ້ຖືກນຳສະເໜີໃນທ້າຍປີກາຍນີ້ໂດຍອະດີດ
ໄອຍະການຂອງ ເມັກຊິໂກ ວ່າ ສົບຂອງນັກຮຽນຫຼາຍຄົນຈາກ ວິທະນາໄລ ຄູ ຊົນນະບົດ Ayotzinapa ໄດ້ຖືກນຳໄປ ຖິ້ມໃສ່ສະຖານທີ່ຖິ້ມຂີ້ເຫຍື້ອ ແລະ ໄດ້ຖືກເຜົາໃຫ້ເປັນຖ່ານ ຢູ່ນອກ ເມືອງທີ່ຢູ່ໃກ້ຄຽງ.
ຕາມລາຍງານຂອງວັນອາທິດວານນີ້ແມ່ນໄດ້ກ່າວວ່າ ໄຟຢູ່ບ່ອນຈູດຂີ້ເຫຍື້ອ ແມ່ນບໍ່ແຮງ ພໍທີ່ຈະຈູດຜູ້ທີ່ໄດ້ຮັບເຄາະຮ້າຍ
ຈົນເປັນຖ່ານໄດ້, ແລະ ພວກເຂົາໄດ້ກ່າວວ່າ ບັນດານັກສືບສວນສອບສວນຈາກປະເທດ Chile, Colombia, Guatemala ແລະ ສະເປນ ໄດ້ອ້າງອີງ ການຄົ້ນພົບໃສ່ການ ວິເຄາະໂດຍຜູ້ຊ່ຽວຊານອິດສະຫຼະ.
ລັດຖະບານບໍ່ໄດ້ອອກຄຳເຫັນໃດໆກ່ຽວກັບການລາຍງານນີ້ໃນຕອນແລງຂອງວັນ
ອາທິດວານນີ້.
