ຄະ​ນະ​ກຳ​ມະ​ການ ອີ​ຈິບ ຮັບ​ຮອງ​ເອົາ ຮ່າງ ລັດ​ຖະ​ທຳ​ມະ​ນູນ ສະ​ບັບ​ໃໝ່

ຄະນະ​ບຸກຄົນ​ຈຸ​ນຶ່ງ ​ທີ່ມີສະມາຊິກ 50 ຄົນ​ດ້ວຍ​ກັນ ​ທີ່​ມີ​ພາລະ
ກິດ​ເພື່ອ​ທຳ​ການ​ດັດ​ແປງ​ແກ້​ໄຂ​ລັດຖະທຳ​ມະນູນ​ຂອງ​ອີ​ຈິບ​ໄດ້
​ຮັບ​ຜ່ານ​ຮ່າງ​ກົດໝາຍ​ລັດຖະທຳ​ມະນູນ​ໃໝ່ສະບັບ​ນຶ່ງ​ທີ່​ຮວມ
ທັງ​ການ​ປ່ຽນ​ແປງ​ຕ່າງໆ​ໃນ​ແຜນ​ການ​ໂອນ​ອຳນາດ​ຂອງ​ຄະນະ
​ລັດຖະບານ​ຮັກສາ​ການ​ຊົ່ວຄາວ ​ແລະ​ຂໍ້​ກຳນົດ​ຕ່າງໆ​ສຳລັບ
​ເວລາ​ໃດ​ທີ່ພວກ​ທະຫານ​ຈະສາມາດ​ດຳ​ເນີນ​ຄະດີ​ພວກ​ພົນລະ
​ເຮືອນ​ໄດ້​.

ຮ່າງ​ກົດໝາຍ​ລັດຖະທຳ​ມະນູນ​ສະບັບ​ໃໝ່​ນີ້​ຈະ​ຕ້ອງ​ໄດ້​ຮັບ​ການ​ລົງມະຕິ​ຮັບ​ເອົາ​ໂດຍ​ປະຊາ​ຊົນ​ຜູ້​
ປ່ອນ​ບັດ ​ແລະ​ຈະ​ໃຊ້​ແທນ​ເອກະສານ​ທີ່​ນິຍົມ​ສາສະໜາ​ອິດສະ​ລາມ​ທີ່​ມີ​ຜົນໃຊ້​ເປັນກົດໝາຍພາຍ​
ໃຕ້ອະດີດ​ປະທານາທິບໍດີ Mohamed Morsi ທີ່​ໄດ້​ຖືກ​ປົດ​ອອກ​ຈາກຕຳ​ແໜ່​ງ​ໄປ​ນັ້ນ. ຄາດ​ວ່າ​
ຈະ​ມີ​ການ​ລົງ​ປະຊາ​ມະຕິ​ຮັບ​ເອົາ​ຮ່າງ​ກົດໝາຍ​ດັ່ງກ່າວ​ໃນ​ເດືອນ​ໜ້ານີ້.

ຮ່າງ​ກົດໝາຍດັ່ງກ່າວ​ຮຽກຮ້ອງ​ໃຫ້​ມີ​ການ​ເລືອກ​ຕັ້ງ​ປະທານາທິບໍດີ​ແລະ​ສະມາຊິກ​ລັດຖະສະພາ
ດ້ວຍ​ການ​ດຳ​ເນີນ​ຂັ້ນ​ຕອນ​ການ​ເລືອກ​ຕັ້ງ​ປະທານາທິບໍດີ​ເລີ້ມ​ຂຶ້ນ​ພາຍ​ໃນ 90 ມື້​ແລະ​ການ​ເລືອກ
​ຕັ້ງ​ສະມາຊິກ​ລັດຖະສະພາ​ພາຍ​ໃນ 6 ​ເດືອນ. ​ແຜນການໄລຍະ​ຂ້າມ​ຜ່ານ​ນີ້ບົ່ງ​ໄວ້​ວ່າການ​ປ່ອນ
ບັດ​ເລືອກ​ຕັ້ງ​ເອົາ​ສະມາຊິກ​ລັດຖະສະພາ​ຈະ​ເກີດ​ຂຶ້ນ​ກ່ອນ ​ແຕ່​ຮ່າງ​ລັດຖະທຳ​ມະນູນນີ້​ຈະ​ເປີດ​ທາງ
​ໃຫ້​ມີ​ການ​ປ່ອນ​ບັດ​ເລືອກ​ຕັ້ງ​ເອົາ​ປະທານາທິບໍດີ​.

ກົດ​ບັດ​ດັ່ງກ່າວ​ ​ຈະ​ເຮັດ​ໃຫ້ທະຫານ ສາມາດດຳ​ເນີນ​ຄະດີ​ພວກ​ພົນລະ​ເຮືອນ​ໄດ້ ​ແຕ່​ລະບຸໄວ້ຢ່າງ​
ເຈາະ​ຈົງວ່າ ການ​ດຳ​ເນີນ​ຄະດີ​ນັ້ນ​ຈະສາມາດ​ປະຕິບັດ​ໄດ້​ໃນສະ​ເພາະຄະດີ​ຕ່າງໆທີ່​ພົວພັນ​ກັບ​
ຄວາມ​ຜິດ​ຕ່າງໆ​ເຊັ່ນ ການ​ໂຈມ​ຕີ​ໂດຍ​ກົງ​ຕໍ່​ພວກ​ທະຫານ ສະຖານ​ທີ່​ຕ່າງໆ ຫຼືອຸບປະກອນ​ຂອງ
​ກອງທັບ​ເທົ່າ​ນັ້ນ.

​