ປະທານາທິບໍດີປານາມາ ທ່ານ Juan Carlos Varela ກ່າວວ່າ ລັດຖະບານປານາມາຈະສ້າງຕັ້ງຄະນະກຳມາທິການທີ່ເປັນອິດສະຫຼະຂຶ້ນເພື່ອທົບທວນເບິ່ງຂັ້ນຕອນການປະຕິບັດ ທາງດ້ານການເງິນຂອງປະເທດ ຫລັງຈາກໄດ້ເກີດຂ່າວນອງນັນກ່ຽວກັບເອກກະສານປານາມາ.
ທ່ານ Varela ກ່າວຢູ່ໃນຖະແຫລງການສັ້ນໆ ທາງໂທລະພາບ ທີ່ອອກໃນວັນພຸດວານນີ້ ວ່າ ຄະນະກຳມະການນີ້ ປະກອບດ້ວຍພວກນັກຊ່ຽວຊານທັງພາຍໃນ ແລະຕ່າງປະເທດ ເພື່ອຊັ່ງຊາຕີລາຄາເບິ່ງຂັ້ນຕອນການປະຕິບັດທາງດ້ານການເງິນຂອງປະເທດແລະການ ສະເໜີໃຫ້ເອົາມາດຕະການເພື່ອເສີມຄວາມເຂັ້ມແຂງໃຫ້ແກ່ຄວາມໂປ່ງໃສທາງດ້ານການເງິນແລະລະບົບກົດໝາຍ. ທ່ານ Varela ກ່າວວ່າ ປານາມາຈະແບ່ງປັນໃຫ້ປະເທດອື່ນໆຮູ້ຈັກກ່ຽວກັບຄຳແນະນຳຂອງຄະນະກຳມະການເພື່ອວ່າຈະໄດ້ມີການເອົາບາດກ້າວຮ່ວມກັນ ສຳລັບເພີ້ມຄວາມເຂັ້ມແຂງ ໃຫ້ແກ່ຄວາມໂປ່ງໃສໂດຍທົ່ວໄປສຳລັບພາກສ່ວນເສດ ຖະກິດ.
ໃນຂະນະດຽວກັນ ຝຣັ່ງໄດ້ຕື່ມຊື່ປານາມາເຂົ້າໃສ່ບັນຊີສີຂີ້ເທົ່າກ່ຽວກັບບ່ອນຫຼົບລີ້ບໍ່ເສຍພາສີຂອງໂລກແລະຊຸກຍູ້ໃຫ້ອົງການນາໆຊາດວ່າດ້ວຍການຮ່ວມມືທາງດ້ານເສດຖະກິດແລະການພັດທະນາຫຼື OECD ດຳເນີນການແບບດຽວກັນນີ້.
ເລຂາທິການໃຫຍ່ຂອງອົງການ OECD ທ່ານ Angle Gurria ກ່າວວ່າ ການຮົ່ວໄຫຼຂອງເອກກະສານປານາມາສະແດງໃຫ້ເຫັນວ່າພາກສ່ວນເສດຖະກິດຂອງປະເທດມີການໂຍະ ຍານຜ່ອນຜັນໃຫ້ແກ່ວັດທະນະທຳຂອງການມີຄວາມລັບ ແລະ ເອີ້ນສິ່ງດັ່ງກ່າວວ່າເປັນສະຖານທີ່ສຳຄັນແຫ່ງບສຸດທ້າຍທີ່ອະນຸຍາດລູກຄ້າຂອງ ຕົນເຊື່ອງເງິນຈາກພວກເຈົ້າໜ້າທີ່ຄຸ້ມຄອງກົດໝາຍ.
ບໍລິສັດທະນາຍຄວາມ Mossack Fonseca ຂອງປານາມາ ທີ່ພົວພັນກັບຂ່າວນອງນັນ ຄັ້ງນີ້ກ່າວວ່າ ເອກກະສານ 11 ລ້ານ 5 ແສນໜ້າ ໄດ້ຮົ່ວໄຫລຈາກຫ້ອງການຂອງຕົນໃນອາທິດນີ້ກ່ຽວກັບບັນຊີເງິນຝາກຢູ່ຕ່າງປະເທດຂອງພວກທີ່ຮັ່ງມີ ມີອິດທິພົນແລະມີຊື່ສຽງຂອງໂລກທີ່ໄດ້ຖືກລັກຂະໂມຍໂດຍພວກເຈາະຂໍ້ມູນແຮັກເກີ້ ບໍ່ແມ່ນເປີດເຜີຍຄວາມລັບໂດຍບຸກຄົນພາຍໃນ.
ທ່ານ Ramon Fonseca ນຶ່ງໃນບັນດາຜູ້ກໍ່ຕັ້ງບໍລິສັດ Mossack Fonseca ກ່າວໃນ ວັນອັງຄານວານນີ້ວ່າ ການໂຈມຕີເຈາະຂໍ້ມູນຄອມພິວເຕີ້ແມ່ນມາຈາກຕ່າງປະເທດແຕ່ ບໍ່ໄດ້ແຈ້ງໃຫ້ຊາບວ່າແມ່ນປະເທດໃດແທ້. ທ່ານກ່າວວ່າພວກເຮົາມີທິດສະດີແລະຈະຕິດ ຕາມເບິ່ງທິດສະດີດັ່ງກ່າວ.
