ລິ້ງ ສຳຫລັບເຂົ້າຫາ

5 ຄົນຖືກ ຂ້າຕາຍ ໃນການ ໂຈມຕີ ຂອງຊາວ ປາເລສໄຕນ໌ ທີ່ແນເປົ້າ ໃສ່ຊາວ ອິສຣາແອລ


ຕຳຫຼວດ ອິສຣາແອລ ຢຶຢູ່ຈຸດເກີດເຫດ ການແທງກັນ ຂອງ ຊາວ ປາເລສໄຕນ໌ ທີ່ເມືອງ Tel Aviv, ອິສຣາແອລ, 19 ພະຈິກ, 2015.

ການໂຈມຕີໂດຍຊາວ ປາເລສໄຕນ໌ ສອງຄົນທີ່ແນເປົ້າໃສ່ປະຊາ ຊົນ ອິສຣາແອລ ໄດ້ເຮັດໃຫ້ມີຄົນເສຍຊີວິດ 5 ຄົນໃນວັນພະຫັດ ວານນີ້ ຊຶ່ງເປັນມື້ທີ່ນອງເລືອດທີ່ສຸດສຳລັບ ອິສຣາແອລ ໃນການ ໂຈມຕີໃຊ້ມີດແທງຄົນ ແລະ ການໂຈມຕີອື່ນໆຂອງຊາວ ປາເລສ ໄຕນ ທີ່ແກ່ຍາວມາໄດ້ 2 ເດືອນແລ້ວ ນັ້ນ.

ໃນເຫດການຄັ້ງທຳອິດ, ຜູ້ຊາຍ ປາເລສໄຕນ ຄົນໜຶ່ງໄດ້ໃຊ້ມີດ ແທງຊາວ ອິສຣາແອລ 2 ຄົນເສຍຊີວິດ ໃນອາຄານຫ້ອງການທີ່ ເມືອງ Tel Aviv ກ່ອນທີ່ຈະຖືກຄວບຄຸມຕົວໂດຍຜູ້ທີ່ຢູ່ໃນເຫດ ການ ແລະ ຕໍ່ມາໄດ້ຖືກສົ່ງໃຫ້ກັບຕຳຫຼວດ, ອີງຕາມຄຳ​ໃຫ້ການ ຂອງຜູ້ເຫັນເຫດການ.

ສະຖານີວິທະຍຸຂອງ ລັດຖະບານ ອິສຣາແອລ ໄດ້ກ່າວວ່າ ທະຫານຮັກສາຄວາມປອດໄພໄດ້ ຊອກຫາອີກຄົນໜຶ່ງ ຜຸູ້ທີ່ໄດ້ຊ່ວຍເຫຼືອນັກໂຈມຕີຄົນດັ່ງກ່າວ.

ຕໍ່ມາໃນວັນພະຫັດວານນີ້, ປະຊາຊົນ 3 ຄົນ, 1 ຄົນໄດ້ຖືກຢືນຢັນວ່າເປັນຄົນ ອິສຣາແອລ ແລະ ຄົນອື່ນແມ່ນເຊື່ອວ່າເປັນຜູ້ເຂົ້າໂຈມຕີ ໄດ້ຖືກຂ້າຕາຍໃນການ​ຍິງປະ​ທະ​ກັນ ແລະ ດ້ວຍການໂຈມຕີທາງລົດ ໃກ້ກັບຊຸມຊົນຊາວຢິວຢູ່ທາງພາກໃຕ້ຂອງນະຄອນ Jerusalem. ພ້ອມດ້ວຍປະຊາຊົນຈຳນວນຫຼາຍຄົນໄດ້ຮັບບາດເຈັບ.

ມືປືນໄດ້​ເປີດ​ສາກຍິງ ແລະ ພະຍາຍາມທີ່ຈະໜີຈາກບ່ອນເກີດເຫດ ກ່ອນທີ່ຈະຂັບລົດຕຳເຂົ້າ ໃສ່ກຸ່ມຄົນທີ່ກຳລັງຍ່າງຢູ່ “ຢ່າງຕັ້ງໃຈ”, ອີງຕາມທະຫານ ອິສຣາແອລ. ທະຫານໄດ້ກ່າວວ່າ ທະຫານຮັກສາຄວາມປອດໄພໄດ້ຍິງໃສ່ຜູ້ໂຈມຕີ ແລະ “ໄດ້ລະບຸວ່າພວກເຂົາ ເຈົ້າຍິງຖືກ ມືປືນຄົນດັ່ງກ່າວ.”

ໃນຄື້ນຂອງຄວາມຮຸນແຮງນີ້ໄດ້ເຮັດໃຫ້ປະຊາຊົນ ອິສຣາແອລ ຢ່າງໜ້ອຍ 15 ຄົນເສຍຊີວິດ ຫລັງຈາກການໂຈມຕີໃຊ້ມີດແທງ ແລະ ການໂຈມຕີອື່ນໆໂດຍຊາວ ປາເລສໄຕນ ໃນໄລຍະ ເວລາ 1 ເດືອນເຄິ່ງທີ່ຜ່ານມາ. ປະຊາຊົນຫຼາຍກວ່າ 80 ຄົນ, ໂດຍສ່ວນໃຫຍ່ແມ່ນຜູ້ໂຈມຕີ, ໄດ້ຖືກຂ້າຕາຍໂດຍທະຫານຮັກສາຄວາມປອດໄພທີ່ຈຸດເກີດເຫດທຳຮ້າຍຮ່າງກາຍ ແລະ ໃນການປະທ້ວງທີ່ໃຊ້ຄວາມຮຸນແຮງໃນເຂດ West Bank ແລະ Gaza.

ທ່ານອາດຈະມັກເລື້ອງນີ້ຄືກັນ

XS
SM
MD
LG