ພວກຊາວເມືອງໃນຂົງເຂດພາກຕາເວັນຕົກສຽງເໜືອຂອງ ປາກີສຖານພາກັນຈົ່ມວ່າກ່ຽວກັບການຮັບມືຂອງລັດຖະ ບານຂອງເຂົາເຈົ້າຕໍ່ໄພຫາຍຍະນະນໍ້າຖ້ວມ ທີ່ໄດ້ເອົາຊີວິດປະຊາຊົນ ໄປແລ້ວ ຫລາຍກ່ວາ 1000 ຄົນ. ບັນດາເຈົ້າ ໜ້າທີ່ປາກີສຖານຍອມຮັບຮູ້ວ່າ ເຂົາເຈົ້າກຳລັງປະສົບຄວາມລຳບາກຢ່າງໜັກ ໃນການພະຍາຍາມເຂົ້າໄປໃຫ້ເຖິງພວກ ຊາວບ້ານຫລາຍພັນຄົນທີ່ຍັງຕົກຄ້າງຢູ່ ຍ້ອນໄພນ້ຳຖ້ວມທີ່ ເກີດຈາກຝົນລະດູມອນສູນທີ່ຕົກໜັກມາເປັນເວລາຫລາຍມື້ນັ້ນ.
ແຂວງ Khyber-Pakhtunkhwa ແມ່ນໄດ້ປະທະກັບໄພນ້ຳຖ້ວມຄັ້ງນີ້ທີ່ໜັກກວ່າໝູ່
ເຈົ້າໜ້າທີ່ຝ່າຍຄຸ້ມຄອງໄພພິບັດປະຈຳແຂວງທ່ານນຶ່ງກ່າວຕໍ່ ອົງການ ຂ່າວ AP ວ່າການຕິດຕາມເບິ່ງສະຖານະການທາງອາກາດໄດ້ສະແດງໃຫ້ເຫັນເຖິງຄວາມເສຍຫາຍທີ່ທ່ານບັນລະຍາຍວ່າ ໃນຂັ້ນກ້ວາງຂວາງ ແລະໜັກຫລາຍນັ້ນ.
ບັນດາເຈົ້າໜ້າທີ່ກ່າວວ່າ ເຂົ້າເຈົ້າຢ້ານວ່າຈະເກີດການລະບາດ ຂອງເຊື້ອໂຣກຕ່າງໆ ຈາກນໍ້າ ເຊັ່ນພະຍາດທ້ອງຂີ້ຮາກ ແລະໂຣກອະຫິວາ ໃນບັນດາພວກທີ່ລອດ ຊີວິດ ມາໄດ້ນັ້ນ. ສະຫະປະຊາຊາດກະປະມານວ່າ ປະຊາຊົນປາກີສຖານ ປະມານ 1 ລ້ານຄົນ ໄດ້ຮັບຜົນກະທົບຈາກໄພຫາຍຍະນະຄັ້ງນີ້.
ໃນຂະນະດຽວກັນ ທີ່ອັຟການີສຖານປະເທດເພື່ອນບ້ານຂອງປາກີສຖານນັ້ນ ໄພນໍ້າຖ້ວມ ກໍໄດ້ເອົາຊີວິດຜູ້ຄົນໄປແລ້ວຫລາຍກວ່າ 60 ຄົນ. ກຳລັງອັຟການີສຖານແລະເນໂຕ ກ່າວວ່າ ເຂົາເຈົ້າໃຊ້ພວກເຮືອບິນເຮລີຄອບເຕີ ເພື່ອທຳການຊ່ອຍກູ້ຊີວິດພວກທີ່ໄດ້ຮັບເຄາະຮ້າຍ ແລະແຈກຢາຍເຄື່ອງຊ່ອຍເຫລືອ ໃຫ້ແກ່ພວກປະຊາຊົນໃນຂົງເຂດທີ່ໄດ້ຮັບຜົນກະທົບ ຮ້າຍແຮງກວ່າໝູ່ ໃນອັຟການີສຖານ ຊຶ່ງມີຮວມທັງແຂວງ Kunar ແລະແຂວງ Nangarhar ນໍານັ້ນ.
