ຫົວໜ້າຜູ້ຮັກສາການ ກະຊວງພາຍໃນປະຈຳແຄວ້ນປັນຈາບ
ໄດ້ຖືກສັງຫານ ໃນການໂຈມຕີດ້ວຍລະເບີດສະຫຼະຊີບ ເມື່ອ
ວັນອາທິດຜ່ານມາ. ຢ່າງໜ້ອຍ ອີກ 14 ຄົນໄດ້ເສຍຊີວິດນຳ
ໃນການໂຈມຕີດັ່ງກ່າວ ຢູ່ຫ່າງຈາກນະຄອນຫຼວງ ອິສລາມາບັດ
ໄປທາງ ກ້ຳຕາເວັນຕົກສຽງເໜືອ ປະມານ 100 ລັກກິໂລແມັດ.
ຜູ້ສື່ຂ່າວ Ayaz Gul ມີລາຍລະອຽດ ຈາກນະຄອນຫຼວງຂອງ
ປາກິສຖານ ຊຶ່ງໄຊຈະເລີນສຸກ ຈະນຳເອົາມາສະເໜີທ່ານ.
ບັນດາຜູ້ເຫັນເຫດການ ກ່າວວ່າ ຫົວໜ້າຜູ້ຮັກສາການ ກະຊວງພາຍໃນປະຈຳແຂວງປັນຈາບ ທ່ານ Shuja Khanzada ຜູ້ທີ່ເສຍຊີວິດນັ້ນ ກຳລັງຮັບຟັງ ຄຳຮ້ອງທຸກຂອງຊາວບ້ານ ຢູ່ທີ່ເຮືອນພັກຂອງທ່ານ ຢູ່ໃນເມືອງ Attock ໃນເວລາຜູ້ວາງລະເບີດສະຫຼະຊີບຄົນໜຶ່ງໄດ້ບີບຂະນວນ ລະເບີດທີ່ຜູ້ກ່ຽວມັດໃສ່ຮ່າງກ່າຍຕົນເອງ ໃຫ້ແຕກຂຶ້ນນັ້ນ. ລະເບີດທີ່ແຕກຂຶ້ນຢ່າງແຮງ ເປັນເຫດໃຫ້ອາຄານເຮືອນຫຼັງນັ້ນພັງທະລາຍລົງ ແລະ ໄດ້ເຮັດໃຫ້ຫຼາຍສິບຄົນ ຄ້າງຄາຢູ່ໃຕ້ຊາກຫັກພັງດັ່ງກ່າວ. ທ່ານ Saeed Elahi ທີ່ປຶກສາຂອງແຂວງດັ່ງກ່າວ ເວົ້າວ່າ ພົນລະເຮືອນ ແລະ ບັນດາທິມງານກູ້ໄພ ໄດ້ໄປເຖິງສະຖານທີ່ເກີດເຫດຢ່າງໄວວາ ເພື່ອທຳການເກັບກູ້ເອົາພວກຊາກສົບ ແລະ ຊ່ວຍເຫຼືອຜູ້ທີ່ໄດ້ຮັບບາດເຈັບ.
ທ່ານ Elahi ເວົ້າວ່າ “ແຕ່ໃຜໆກໍຮູ້ດີວ່າ ມັນເປັນເມືອງນ້ອຍທີ່ແອອັດ ຖະໜົນສາຍຕ່າງໆ ຄັບແຄບ ແລະ ຫຼາຍສາຍເປັນທາງຕັນ ສະນັ້ນ ອັນນັ້ນຈຶ່ງ ເປັນບັນຫາໃນການໄປເຖິງແຫ່ງດັ່ງກ່າວ.”
ໂຄສົກຂອງ ກົມໜ່ວຍງານກູ້ໄພໃນທ້ອງຖິ່ນ ທ່ານນາງ Deeba Shahnaza ກ່າວວ່າ ໄດ້ມີການພະຍາຍາມຈະສະຫລຸບຜົນຂອງການ ປະຕິບັດງານ ໃຫ້ວ່ອງໄວທີ່ສຸດເທົ່າທີ່ຈະເປັນໄປໄດ້.
ທ່ານນາງ Shahnaz ເວົ້າວ່າ “ສົບຂອງມື້ລາງພັນເອກບຳນານ Shuja ແມ່ນສາມາດ
ກູ້ເອົາອອກມາໄດ້ ແລະ ພາລະກິດການຄົ້ນຫາ ຍັງສືບຕໍ່ໄປຢູ່.”
ມື້ລາງຫົວໜ້າຜູ້ຮັກສາການ ກະຊວງພາຍໃນປະຈຳແຂວງປັນຈາບ ທ່ານ Khanzada
ໄດ້ນໍາພາການປາບປາມຕໍ່ຕ້ານພວກຫົວຮຸນແຮງ ທີ່ເປັນເຄືອຂ່າຍ ຂອງພວກທາລີບານ
ປາກິສຖານ ແລະ ກຸ່ມແອລກາອີດາ ໃນແຂວງດັ່ງກ່າວນີ້.
ທີ່ປຶກສາຂອງແຂວງທ່ານ Elahi ກ່າວວ່າ ທ່ານ Khanzada ຫົວໜ້າຜູ້ຮັກສາການ ກະຊວງ
ພາຍໃນປະຈຳແຂວງປັນຈາບ ຜູ້ທີ່ເສຍຊີວິດນັ້ນ ໄດ້ຖືກຂົ່ມຂູ່ມາແລ້ວຫຼາຍຄັ້ງ ໂດຍສະເພາະ ຫຼັງຈາກທີ່ຫົວໜ້າ ກຸ່ມ Lashkar-e-Jhangvi, ນາຍ Malik Ishaq ຂອງພວກຫົວຮຸນແຮງ ນິກາຍຊູນີ ໄດ້ຖືກສັງຫານ ເມື່ອເດືອນແລ້ວນີ້ ໃນການປະທະກັນ ກັບເຈົ້າໜ້າທີ່ຕຳຫຼວດ ປາກິສຖານ.
ທ່ານ Elahi ເວົ້າອີກວ່າ “ທ່ານ Khanzada ໄດ້ຖືກຂົ່ມຂູ່ຫຼາຍຄັ້ງແລ້ວ ຈາກກຸ່ມ
ກໍ່ການຮ້າຍຕ່າງໆ ທີ່ແຕກຕ່າງກັນ ຊຶ່ງປະຕິບັດການຕໍ່ຕ້ານກຸ່ມ ທີ່ທຳການຂົ່ມຂູ່
ນັ້ນເອງ ທີ່ໄດ້ເປີດສາກໂຈມຕີ ຢູ່ໃນແຂວງປັນຈາບນັ້ນ. ສະນັ້ນ ມັນກໍອາດເປັນ
ການຕອບໂຕ້ຕໍ່ເຫດການ ທີ່ຜູ້ນຳກຸ່ມ LeJ ຖືກຂ້າຕາຍນັ້ນກໍເປັນໄດ້.”
ບໍ່ພໍເທັ່າໃດຊົ່ວໂມງ ຫຼັງຈາກລະເບີດແຕກ ກອງທັບປາກິສຖານ ກ່າວວ່າ ຕົນໄດ້ປະຕິບັດ
ການໂຈມຕີ ທາງອາກາດຫຼາຍບັ້ນ ຕໍ່ບ່ອນທີ່ສົງໄສວ່າເປັນສະຖານທີ່ລີ້ຊ່ອນຕ່າງໆ ຂອງ
ພວກຫົວຮຸນແຮງ ໃນເຂດຊົນເຜົ່າ Waziristan ເໜືອ ທີ່ຕິດກັບຊາຍແດນ ປະເທດ
ອັຟການິນຖານ ຊຶ່ງໄດ້ສັງຫານ ພວກກະບົດ 40 ຄົນ ແລະ ອີກຫຼາຍຄົນໄດ້ຮັບບາດເຈັບ.
ການໂຈມຕີຫຼາຍໆບັ້ນຜ່ານມາຂອງພວກຫົວຮຸນແຮງ ໄດ້ສັງຫານ ຊາວປາກິສຖານ ຫຼາຍ
ໝື່ນຄົນ ໃນຊ່ວງທົດສະວັດ ທີ່ຜ່ານມາ. ແຕ່ຄວາມຮຸນແຮງ ກໍໄດ້ຫລຸດລົງ ຢ່າງຫຼວງຫຼາຍ
ເມື່ອສອງສາມເດືອນບໍ່ດົນມານີ້. ບັນດາເຈົ້າໜ້າທີ່ ອ້າງເຫດຜົນຂອງການຕົກຕ່ຳລົງນັ້ນ
ວ່າ ເປັນຜົນມາຈາກການສືບຕໍ່ ປະຕິບັດການຕໍ່ຕ້ານການກໍ່ການຮ້າຍ ຢູ່ໃນບໍລິເວນເຂດ
ຊົນເຜົ່າທີ່ມີຄວາມລໍ່ແຫຼມນັ້ນ.
