ເຈົ້າໜ້າທີ່ກ່າວວ່າ ຈຳນວນຜູ້ເສຍຊີວິດ ຈາກການໂຈມຕີ ດ້ວຍລະເບີດ 3 ບັ້ນຕິດຕໍ່ກັນ ຕໍ່ຂະບວນແຫ່ຂອງສາສະ ໜາອິສລາມ ນິກາຍຊີໄອທ໌ ໄດ້ເພີ້ມຂຶ້ນເປັນ 33 ຄົນ ແລະມີຜູ້ໄດ້ຮັບບາດເຈັບອີກ 250 ຄົນ.
ການໂຈມຕີທີ່ນະຄອນລາຮໍໃນພາກຕາເວັນອອກສຽງເໜືອ ຂອງປາກິສຖານໃນມື້ວັນພຸດວານນີ້ແມ່ນແນເປົ້າໝາຍໃສ່ ຊາວຊີໄອທ໌ຈຳນວນຫຼາຍພັນຄົນ ທີ່ເຂົ້າຮ່ວມຂະບວນແຫ່ ເພື່ອໄວ້ທຸກໃຫ້ແກ່ການເສຍສະຫຼະຊີວິດຂອງພະອາລີລູກ ເຂີຍຂອງພະສາສະດາໂມຮຳໝັດ. ນີ້ແມ່ນ ການໂຈມຕີ ຮ້າຍແຮງເທື່ອທຳອິດ ຢູ່ໃນປາກິສຖານ ນັບແຕ່ໄດ້ເກີດໄພນໍ້າຖ້ວມ ຂະໜາດໃຫຍ່ ເມື່ອນຶ່ງເດືອນກວ່າໆຜ່ານມາ.
ເຈົ້າໜ້າທີ່ເວົ້າວ່າ ການໂຈມຕີເລີ້ມດ້ວຍ ລະເບີດນ້ອຍລູກນຶ່ງ ທີ່ສ້າງຄວາມຕື່ນຕົກໃຈ ໃຫ້ແກ່ພວກທີ່ເຂົ້າຮ່ວມ ຂະບວນແຫ່. ບໍ່ເທົ່າໃດນາທີຕໍ່ມາ ຜູ້ໂຈມຕີສະລະຊີບ 2 ຄົນ ກໍໄດ້ບີບຄະນວນລະເບີດ ໃຫ້ແຕກຂຶ້ນເກືອບຕິດໆກັນ ຢູ່ໃນສອງຈຸດ ຂອງຂະບວນແຫ່.
ພວກໄປຮ່ວມພິທີຊາວຊີໄອທ໌ ທີ່ມີຄວາມໂກດແຄ້ນ ໄດ້ພາກັນໂຈມຕີຕຳຫຼວດປາກິສຖານທີ່ ເຂົາເຈົ້າຄິດວ່າ ມີຄວາມບົກຜ່ອງໃນການຮັກສາ ຄວາມປອດໄພນັ້ນ. ນອກນັ້ນແລ້ວ ຝູງຊົນ ຍັງໄດ້ພາກັນຈູດໄຟເຜົາລົດ ແລະປ້ອມຕຳຫຼວດນຳອີກ.
