ລິ້ງ ສຳຫລັບເຂົ້າຫາ

ປາກິສຖານ ສົ່ງກຳລັງໄປເພີ່ມ ທີ່ນະຄອນກາຣາຈີ

  • ໄພສານ ວໍຣະຈັກ

ແມ່ຍິງຄົນນຶ່ງ ໄວ້ທຸກໃຫ້ແກ່ສະມາຊິກໃນຄອບຄົວຂອງນາງ ທີ່ເສຍຊີວິດ ຢູ່ນະຄອນກາຣາຈີ ໃນຄວາມຮຸນແຮງມື້ນີ້ (8 ກໍລະກົດ 2011)

ປາກິສຖານໄດ້ສັ່ງໃຫ້ທະຫານຕື່ມອີກ 1,000 ຄົນເຂົ້າປະຈຳການທີ່ນະຄອນກາຣາຈີພ້ອມ
ກັບມີຄຳສັ່ງໃຫ້ຍິງໄດ້ທັນທີ ພວກຜູ້ຊາຍປະກອບອາວຸດທີ່ພົວພັນໃນການໂຈມຕີ ຫຼັງຈາກ
ມີຜູ້ເສຍຊີວິດຢ່າງນ້ອຍ 65 ຄົນ ໃນຄວາມຮຸນແຮງທາງດ້ານການເມືອງແລະຊົນເຜົ່າເປັນ
ເວລາ 3 ມື້ຢູ່ທີ່ນະຄອນດັ່ງກ່າວ.

ຫ້າງຮ້ານຕ່າງໆທີ່ນະຄອນກາຣາຈີ ໄດ້ປິດກິດຈະການ ໃນວັນສຸກມື້ນີ້ ຂະນະທີ່ພັກການ
ເມືອງໃຫຍ່ໃນເຂດທ້ອງຖິ່ນຄືຂະບວນການ Muttahida Qaumi ທີ່ເອີ້ນຫຍໍ້ວ່າ MQM
ນັ້ນ ຮຽກຮ້ອງໃຫ້ເປັນມື້ໄວ້ທຸກແລະໂຮມຊຸມນຸມປະທ້ວງ.

ຕຳຫຼວດເວົ້າວ່າການເສຍຊີວິດທີ່ວ່ານີ້ເປັນພາກສ່ວນນຶ່ງໃນການປະທະກັນລະຫວ່າງສອງ
ພັກການເມືອງໃນແຂວງ Sindh ຄືລະຫວ່າງຂະບວນການ MQM ແລະພັກແຫ່ງຊາດ
ອາວາມີທີ່ເອີ້ນຫຍໍ້ວ່າ ANP ນັ້ນ.

ຂະບວນການ MQM ສ່ວນໃຫຍ່ແມ່ນຕາງໜ້າໃຫ້ແກ່ປະຊາຄົມທີ່ປາກພາສາ Urdu ແລະ
ມາຈົດຮອດເດືອນແລ້ວ ຂະບວນການດັ່ງກ່າວຍັງເປັນພາກສ່ວນນຶ່ງຂອງລັດຖະບານປະສົມ
ທີ່ປົກຄອງແຂວງ Sindh. ສ່ວນພັກ ANP ແມ່ນຕາງໜ້າໃຫ້ແກ່ພວກຊົນເຜົ່າ Pashtuns.

ຜູ້ນຳຂອງຂະບວນການ MQM ທ່ານ Raza Haroon ກ່າວໃນວັນພະຫັດວານນີ້ວ່າສະ
ມາຊິກຂອງຂະບວນການ MQM ໄດ້ຕົກເປັນເປົ້າໃນການໂຈມຕີຍ້ອນວ່າທາງຂະບວນການ
ໄດ້ຖອນໂຕຈາກລັດຖະບານປະສົມ.

ອົງການນິລະໂທດກຳສາກົນຮຽກຮ້ອງໃຫ້ເຈົ້າໜ້າທີ່ປາກິສຖານທຳການສືບສວນເບິ່ງຢ່າງ
ລະອຽດກ່ຽວກັບການຕັ້ງເປົ້າໝາຍໃນການສັງຫານ ບໍ່ພຽງຢູ່ທີ່ນະຄອນກາຣາຈີທໍ່ນັ້ນ ແຕ່
ໃນທົ່ວປະເທດປາກິສຖານນຳດ້ວຍ. ອົງການນິຣະໂທດກຳສາກົນກ່າວໃນວັນພະຫັດວານ
ນີ້ວ່າ ຄວາມຮຸນແຮງທີ່ເພີ່ມທະວີຂຶ້ນ ແລະຄວາມບໍ່ປອດໄພຢູ່ໃນປະເທດໃນໄລຍະສອງປີ
ຜ່ານມານີ້ ແມ່ນໄດ້ສະທ້ອນໃຫ້ເຫັນ ເຖິງວິກິດການທີ່ຮ້າຍແຮງ ກ່ຽວກັບກົດໝາຍ ແລະ
ຄວາມເປັນລະບຽບ ຮຽບຮ້ອຍຢູ່ໃນປາກິສຖານ.

ຄະນະກຳມາທິການສິດທິມະນຸດຂອງປາກິສຖານກ່າວວ່າ ມີ 490 ຄົນແມ່ນຜູ້ເຄາະຮ້າຍທີ່
ຕົກເປັນເປົ້າໃນການສັງຫານທີ່ນະຄອນກາຣາຈີໃນໄລຍະ 6 ເດືອນທຳອິດຂອງປີນີ້.

ມີປະຊາຊົນປະມານ 16 ລ້ານຄົນອາໄສຢູ່ທີ່ນະຄອນກາຣາຈີຊຶ່ງເປັນສູນກາງທາງດ້ານເສດ
ຖະກິດໃນພາກໃຕ້ປາກິສຖານ. ນະຄອນດັ່ງກ່າວໄດ້ເກີດຄວາມຮຸນແຮງທາງດ້ານສາສະໜາ
ມາດົນນານແລ້ວ ລະຫວ່າງທີ່ນັບຖືສາສະໜາອິສລາມນິກາຍຊຸນນີ່ແລະນິກາຍຊີໄອທ໌ ແລະ ມີການໂຈມຕີຂອງພວກຫົວຮຸນແຮງ.

XS
SM
MD
LG