ບັນດາເຈົ້າໜ້າທີ່ປາກີສຖານກ່າວວ່າ ລະເບີດລົດໄດ້ແຕກ
ຂຶ້ນທີ່ປໍ້ານໍ້າມັນແຫ່ງນຶ່ງໃນພາກຕາເວັນອອກຂອງປະເທດ
ເຮັດໃຫ້ປະຊາຊົນຢ່າງນ້ອຍ 20 ຄົນເສຍຊີວິດ.
ພວກເຈົ້າໜ້າທີ່ເຫລົ່ານີ້ກ່າວວ່າ ເຫດລະເບີດທີ່ເມືອງ Faisalabad ໃນແຂວງ Punjab ຍັງເຮັດໃຫ້ປະຊາຊົນຕື່ມອີກຢ່າງນ້ອຍ 100 ຄົນ ໄດ້ຮັບບາດເຈັບ. ລະເບີດລົດດັ່ງກ່າວໄດ້ເຮັດໃຫ້ຖັງບັນຈຸນໍ້າມັນໃນປໍ້າລຸກໄໝ້ເປັນແປວໄຟຂະໜາດໃຫຍ່ຊຶ່ງໄດ້ສ້າງຄວາມເສຍຫາຍໃຫ້ແກ່ພວກຕຶກໂຮງການລັດຖະບານຫລາຍຫລັງທີ່ຕັ້ງຢູ່ໃກ້ໆກັບປໍ້ານັ້ນ.
ກອງດິນຈີ່ທີ່ເພພັງລົງມາຈາກຕຶກອາຄານແລະເສດເຫລັກຈາກລົດທີ່ຖືກໄຟໄໝ້ ໄດ້ຊະຊາຍ ຢັ່ງຢາຍໄປທົ່ວບ່ອນໄຟໄໝ້ໃນຂະນະທີ່ພວກພະນັກງານຊ່ອຍກູ້ໄພກໍາກັບນໍາພວກຜູ້ຄົນທີ່ໄດ້ຮັບບາດເຈັບນັ້ນ.
ຍັງບໍ່ມີຜູ້ໃດອ້າງເອົາຄວາມຮັບຜິດຊອບໃນການໂຈມຕີຄັ້ງນີ້ເທື່ອ.
