ຕໍາຫລວດປາກີສຖານກ່າວວ່າ ພວກນັກຕໍ່ສູ້ຫົວຮຸນແຮງໄດ້ທໍາການໂຈມຕີສະຖານີຕໍາຫລວດ
ແຫ່ງນຶ່ງຂອງຕົນໃນພາກຕາເວັນຕົກສຽງເໜືອຂອງປະເທດ ເຮັດໃຫ້ເຈົ້າໜ້າທີ່ຕໍາຫລວດຢ່າງ
ໜ້ອຍ 10 ຄົນເສຍຊີວິດແລະໄດ້ບາດເຈັບຕື່ມອີກ 5 ຄົນ.
ບັນດາເຈົ້າໜ້າທີ່ຕໍາຫລວດໃນທ້ອງຖິ່ນກ່າວວ່າ ພວກຫົວຮຸນແຮງທີ່ປະກອບອາວຸດປືນແລະ
ລະເບີດມືໄດ້ທໍາການໂຈມຕີສະຖານີຕໍາຫລວດແຫ່ງນຶ່ງໃນເມືອງ Kolach ເມືອງນ້ອຍໆໃນ
ວັນເສົາວານນີ້ ຊຶ່ງມີເຈົ້າໜ້າທີ່ຕໍາຫລວດຢ່າງໜ້ອຍ 17 ຄົນປະຈໍາໜ້າທີ່ຢູ່ໃນເວລານັ້ນ.
ພວກກໍາລັງຮັກສາຄວາມປອດໄພຂອງລັດຖະບານແລະພວກຫົວຮຸນແຮງໄດ້ປະທະກັນເປັນ
ເວລາຫລາຍຊົ່ວໂມງ ກ່ອນພວກຕໍາຫລວດສາມາດຍຶດເອົາສະຖານີແຫ່ງນີ້ໄດ້ຄືນ.
ກຸ່ມຕາລີບັນໃນປາກີສຖານອ້າງເອົາຄວາມຮັບຜິດຊອບໃນການໂຈມຕີຄັ້ງນີ້ ໂດຍກ່າວວ່າ
ກຸ່ມຂອງຕົນໄດ້ສົ່ງຜູ້ໂຈມຕີໄປ 2 ຄົນ ຊຶ່ງຄົນນຶ່ງເປັນແມ່ຍິງ. ແຕ່ຍັງບໍ່ເປັນທີ່ຈະແຈ້ງຄັກແນ່
ເທື່ອວ່າມີພວກໂຈມຕີຈັກຄົນກັນແທ້ທີ່ໄດ້ເຂົ້າພົວພັນໃນການໂຈມຕີຄັ້ງນີ້. ກຸ່ມຕາລີບັນໄດ້
ໃຫ້ຄໍາໝັ້ນສັນຍາໄວ້ວ່າຈະທໍາການແກ້ແຄ້ນຕໍ່ການສັງຫານນາຍໂອຊາມາບິນລາເດັນ ຜູ້ນໍາ
ເຄືອຂ່າຍອາລກາອິດາ ໃນປາກີສຖານ ແລະທໍາການໂຈມຕີເປັນປະຈໍາຕໍ່ເປົ້າໝາຍຂອງພວກ
ກໍາລັງຮັກສາຄວາມປອດໄພນັ້ນ.
ເມືອງ Kolachi ຕັ້ງຢູ່ໃກ້ໆກັບຂົງເຂດຊົນເຜົ່າ Waziristanໃຕ້ ບ່ອນທີ່ສະຖານະການປ່ຽນ
ແປງໄດ້ງ່າຍໆຂອງປາກີສຖານ ທີ່ຜູ້ຄົນຮູ້ຈັກກັນວ່າ ເປັນທີ່ໝັ້ນແຫ່ງນຶ່ງຂອງກຸ່ມຕາລີບັນປາ
ກີສຖານແລະເປັນຂົງເຂດນຶ່ງທີ່ທາງການແນເປົ້າໝາຍໃສ່ພວກຫົວຮຸນແຮງນັ້ນ.
